首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 查經：對路加所看ê耶穌
查經：對路加所看ê耶穌
卷期：第784號 本次： 日期：1954/4 刊名：台灣教會公報 頁數：20
篇名：查經：對路加所看ê耶穌 [ Cha-keng:Tuì Lō͘-ka só͘ khoàⁿ ê Iâ-so͘ ]
作者：郭東榮 Koeh Tong-èng
  顯示 : 漢羅 全羅 並列  

對路加福音所看的耶穌
(牧師：郭東榮)
1954. 04, no. 784, pp. 20-23
路加的目的：路加福音首要的目的，是對一个異邦人紹介主耶穌。這个異邦人叫做Thê-o-hui-lô（華譯：提阿非羅）大人，是踮佇羅馬的大官，是一个新悔改的信徒。但是雖然一个人做對象，路加是猶過有意思對一个人來對一切的異邦人紹介主耶穌是無通giâu疑的所在。
路加的人物：路加佮馬太á是約翰無共款，毋是十二使徒的一个。伊寫聖經的才調，完全是倚靠對使徒聽見，ia̍h閣自己有得著聖神的充滿來寫，伊的祖公是猶太人，職業是醫生，常常有用醫生的專門語，久久佮保羅做伙傳道，使徒行傳也是伊寫--的。
路加的寫法：文章美麗流暢，記事正確，有秩序，不止有搜索材料，確定年代的款式。
路加所寫的耶穌：
1. 耶穌是世界的救主.
路加親像保羅主張福音的世界性，福音毋是猶太人可以獨佔的私有財產，是世界萬人有份的公有財產。所以福音猶傳到萬國，ia̍h路加特別對當時的世界的首都羅馬的傳道，有感覺興趣的款式。咱會通對下面幾nā項的事實，來看出路加所看的耶穌是世界的救主。
A. 路加寫耶穌的家譜的時，寫到亞當，伊不止寫到大衛，亞伯拉罕，一直寫到亞當。按呢就是欲表明耶穌毋若kan-ta猶太人的血統，就是世界始祖亞當的後裔。
B. 無重視猶太人的民族關係，幾nā擺論起撒馬利亞人的故事
(1) 撒馬利亞人無接待耶穌（路加9:53）。學生真憤慨，但是耶穌顛倒責備學生，來表示耶穌無分外族的人，有一視同仁的疼心。
(2) 好的撒馬利亞人（10:33）。耶穌允准呵咾撒馬利亞人，當時的猶太人不止看輕撒馬利亞人，予in知外族的人也有比in較好，會堪得呵咾，來打倒猶太人的偏見。
(3) 會曉感恩的thái-ko的撒馬利亞人（17:17）。九个猶太人thái-ko得著好，袂曉感謝上帝，只有一个撒馬利亞人會曉感恩。耶穌應講，十人敢攏無得著清氣mah？彼九个佇tá-lo̍h？這个別族的人，以外猶無別人轉來歸榮光上帝mah？
以上遮个記事，證明耶穌關心異族，提高in的地位，暗中包含耶穌世界性的福音。
C. 耶穌第一擺出來傳道，做代先的教示的中間講，「未有先知佇本所在予人接納伊」（4:24）。閣再引例講，以利亞的時天亢旱，以色列中有濟濟守寡人，以利亞無奉差去揣in一人，只有去西頓的撒勒代(sic)揣一个守寡人。閣先知以利亞的時，以色列中有濟濟thái-ko的，其中無一人得著清氣，只有敘利亞人乃縵若定。
D. 這个特色，在耶穌閣活了最後的吩咐，閣較明白（路加24:47）。也反悔佮赦罪的道理，欲佇伊的名來傳到萬邦。
2. 耶穌是罪人的救主。
路加一貫的思想，是救恩，是白白的恩典，毋是對律法的功勞，是對信仰。ia̍h閣充滿耶穌對受棄拺的人，人毋挃的罪人，提出拯救的話佮行動。
免講這个意見，毋若kan-ta在路加若定，在馬太也會通發現，親像失迷的羊的譬喻佮「人子來是欲揣失落的來救伊」等等。但是路加這个思想，顯著獨越其他的福音書，袂通追隨在四福音書的中間，只有佇路加有的有兩項記事非常美麗閣重要，就是在十字架等悔改的賊佮放蕩子的譬喻。
A.十字架頂悔改的賊(23:40-43)
在這个記事，咱會通仰望佇十字架頂得欲離開世間的耶穌的仁愛的面。佇遮咱會通學習三點。
(1) 做惡做毒的大歹人，猶過有良心。
(2) 無論對甚物人都袂到最後的時陣毋通失望。
(3) 上帝救人，有人佇臨終的時共伊救。但佇遮愛注意一項，就是雖然耶穌無對這个賊仔講起十字架的贖罪，就想講無倚靠主的贖罪來得救，若按呢想就是誤解；有主的贖罪，這个賊仔才得救；毋是無主的贖罪來得救。24章47節，「反悔佮赦罪的道理欲佇伊的名來傳到萬邦。」對這句話就通知。
B.放蕩子的譬喻（15:11）
關係這个譬喻，有一个神學者講起幾nā點，耶穌佇遮所包含的教示。
(1) 在主看，罪人毋是kan-ta做賊，刣人放火。
(2) 濟濟人到極步chàiⁿ悔改認罪。
(3) 毋捌上帝的人，常常在佇進退兩難，對人生感覺絕望，chiàⁿ開始新生涯。
(4) 上帝對離開伊去放縱的人感覺悲傷，ia̍h對人悔改轉來，感覺無限的歡喜。
(5) 離開上帝的恩典最遠的，是倚靠家己的義，佇上帝的面前無自覺自己的罪的人。
(6) 佇這个譬喻，特別愛注意放蕩子的老爸，「相離猶久遠，伊的老爸看見伊，就憐伊，走去抱伊的頜頸，直直共伊唚。」這个是欲表現老爸向望囝悔改，有teh祈禱積極的teh期待，這个老爸積極的疼囝的事實的具體化，就是基督的十字架。
耶穌毋是kan-ta敎示人若認罪悔改，天爸就欲赦免人若定，耶穌為著欲予罪人悔改，會通朝見天爸，有獻伊的性命，罪人的朋友耶穌佇遮表示伊的最高的同情佮疼痛。
3. 耶穌是散hiong人的救主
有一个無深捌基督教的人，講起路加會通看見社會主義佮共產的傾向，這是一知半解的看法。有影耶穌確實對散hiong人有表示特別的同情。耶穌自己是散hiong人，拋鄉離井漂流佇四方，家己捌講，「狐狸有空,天中的鳥有岫，獨獨人子無掛頭殼的所在」（9:58）。伊佇世間無餘裕的金錢，共人借錢來講起錢的譬喻（太 27:35）。死的時除去一領舊衫以外，無留甚物財產，葬佇別人的墓，耶穌sòng-hiong欠缺，但自己無感覺見笑，反轉感覺榮耀。耶穌的生涯欲安慰散hiong人，人的價值不在金錢，散hiong人也會做偉大的事業。耶穌呵咾行洗禮約翰講，對婦人人的胎出來，無一个比約翰較大。約翰正是腰轄皮帶，身軀穿駱駝毛的衫，食野裡的蜜佮草蜢的sòng-hiong人。咱佇幾nā位的聖經會通看見耶穌是散hiong人的朋友，gâu同情散人。
(1) 路加 4:18，「主的神臨到我，因為伊用油抹我，予我傳福音予sòng-hiong人。」
(2) 路加 14:13，「若是你辦筵桌的時，著請sòng-hiong的。」
(3) 路加 21:3，「就講，我真實共恁講，這个sòng-hiong的守寡人所hiat的比眾人所hiat的較濟。」
ia̍h有記在對富人有濟濟擺的警戒。
路加 6:24，「若是恁好額人有災禍矣！」耶穌的意思是無財產的人較快做基督徒，有財產毋是罪，無犯法，不過有危險性。富人若無得著上帝特別的感動，欲奉獻，非常的為難。有錢快受迷，靠財的人常常無靠上帝，無克己的成活，靈性快墮落，有時是財勝命，甚至勝上帝。
佇路加12:15，「人的活命不在所有的豐盛。」就是在佇上帝為著伊的囝所備辦的疼心，良心，天爸的保護，這用金錢袂買--得，金錢的勢力有限。
對按呢咱會通知，主耶穌重社會全體的福利較過頭個人的奢華，但愛主意使徒的社會主義佮今日的共產，斷然無共款。今日的共產用清算的手段，用鬥爭無上帝。使徒是對疼上帝，疼人，毋是強迫，是家己歡喜。其他佇「富人佮拉撒路，」以及路加6:24，「Sòng-hiong的人有福氣ah。」馬太是寫心內sòng-hiong，對遮的會通知耶穌何等疼sòng-hiong人。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461