世界消息
1954. 05, no. 785, pp. 11-13
(1)英國聖經會。
照這个會的報告，舊年1953年是真好的年。這个聖經會有用真濟款完全猶毋捌做字來寫的腔口印聖經。佇亞非利加12款，南亞美利加3款，亞細亞15款，南洋13款。
(2)瑞西國。
佇國內一省的教會的大會近來聚集的時，有得著 Karl Barth神學博士的指導講演。伊的題目是關係今年欲聚集佇美國普世教會第二總會所欲拄著的問題。伊講，照伊看，彼个會看現代的使命對一方面著對聖經所有的教示講。也閣一方面著看現世的人所會曉疼的話語來講。伊問講，有向望無？應講，有，向望是佇耶穌基督。因為佇基督所有的向望有較進步的所在。世界的人有大向望：佇民主有向望，佇科學有向望，佇國家有向望，佇舊宗教有向望；總是遮的攏是否定佮臨時時--的。
(3)朝鮮。
現時佇朝鮮教會雖然拄著歷史毋捌有的艱苦，猶過有teh大進步。譬喻來講，Taegu市戰爭前有新教拜堂7間，1947年有17間，1952年有60間，今年正月初一有104間。彼个都市是較無台北的人數遐濟。
(4) 盲啞會
近來真出名的青暝人Mr. Bo͘lter有來台灣探南北盲啞學校。伊是英國受高等教育的青年人。佇第二次戰爭受傷青暝。伊起頭真失望，後來對道理感覺大使命，幫贊別的青暝人。現時踮佇New York (紐約)做世界盲啞會的總幹事。關係這个事，近來看這个會的報告講，有一位青年查某人，目睭有危險的病。醫生共伊講，閣幾月日伊會青暝，無法度通持防。所以伊趕緊暗記500節的聖經，講伊青暝的時愛傳主的福音，所以欠用500節通做好的題目。 |
