Chū-chīn
1903.06 219 koàn p.44-46
(Toā-o̍h ê ha̍k-seng Liāu Sam-tiōng kì--ê.)
Ji̍t-pún-kok ê hong-sio̍k ū-ê lán khoàⁿ chò m̄-hó; chiông-tiong chi̍t-hāng chiū-sī chū-chīn ê sū. In chū-chīn ê in-toaⁿ khah-siông sī in-uī lâm-lú saⁿ ì-ài bô chiâⁿ sim-goān; á-sī khiàm lâng gîn bô thang hêng; hoān-tio̍h kok-hoat, kiaⁿ chia̍h-choē hit-hō. Koh in chū-chīn ê hoat,pêng-siông sī ēng soh, to,chhèng lâi chū-chīn; á-sī hō͘ hoé-chhia kauh-sí. Lūn tuì chit-hō lâi sí, tī Ji̍t-pún-kok ta̍k-nî ū chin chē.
Tī chit kuí-goe̍h-kan tī Tang-kiaⁿ ê Bān-tiâu-pò 6 goe̍h tē 8 hō, ū koh kì chit-chân chū-chīn ê sū; chóng-sī i chū-chīn ê in-toaⁿ kap chū-chīn ê hoat-tō͘ chham téng-bīn só͘ kóng--ê ū toā-toā koh-iūⁿ. Taⁿ kán-lio̍k kì tī ē-té.
Chāi Ji̍t-pún-kok Tang-kiaⁿ kú-kú í-keng ū siat Ko-téng ha̍k-hāu; ha̍k-hāu lāi ū hun chē-chē ha̍k-kho, chiū-sī Tia̍t, I, Lí, Bûn, Hoat, Kang, Lông chiah-ê; in só͘ ha̍k-si̍p--ê sī bô saⁿ-tâng, lán bián lóng kóng. Chhin-chhiūⁿTia̍t-ha̍k-kho, choan-choan sī teh káng-kiù bān-hāng ê tì-sek, lán ê Sèng-chheh in iā ū káng- kiù, chóng-sī bô tek-khak ū sìn. Hit tiong-kan ū chi̍t ê ha̍k-seng sèⁿ Tîn- chhoan miâ Chhò ( Fujimuru Misawo )(sic.), kin-nî 18 hoè; in peh sèⁿ Nâ-ká, miâ Thong-sè-sī (Naka Michiyo),sī bûn-ha̍k ū miâ-siaⁿ ê phok-sū.
Tîn-chhoan ji̍p Tia̍t-ha̍k-kho 2, 3 nî, i ê chu-chit chin hó, só͘ ha̍k-si̍p--ê chin chêng-kong. Sui-jiân án-ni chóng--sī i chai bān-hāng mi̍h, khah gâu káng-kiù iā sī chē-chē bē hiáu-tit; koh chhòng- chō bān-mi̍h ê Siōng-tè i iā káng-kiù bô. Se-kok chē-chē ê kek-bu̍t-su iā sī án-ni. Só͘-í i chīn-sim tì-chì ài siūⁿ khoàⁿ ū sím- mi̍h hoat thang lâi kiông-ke̍k i-ê tì-sek, kàu-boé bô; chiū chin hoân-ló kan-khó͘ kàu tòng-bē-tiâu. Ū chi̍t-ji̍t ka-tī khì tī Hoa-giâm(Kegon no taki) ê chuí-chhiâng tâu-chuí-sí. ( Chit-ê chuí-chhiâng kīn tī chi̍t-ê chhut-miâ ê siâⁿ, kiò-chò Ji̍t-kong (Nikko). Chêng-nî Pa Sian-siⁿ kap Sian-siⁿ-niû ū bat khì hia iû-le̍k ). Boē sí ê sî, i tī khàm-téng ū tiû-tû thó͘-khuì; āu-lâi pak-khui chhiū-phoê chiū siá jī tī chhiū ê jī-nn̂g--nih. I ê oē kóng :－
" Khoah-toā--ah ! Chit-ê thiⁿ-tē. Kú-tn̂g ah! chit ê kó͘-kim. ēng 5 chhioh sió-sè ê seng-khu kiám ē tit-thang káng-kiù i mah? Ho-lé-sió ( chiū-sī Tek-kok chò Tia̍t-ha̍k chheh ê Sian-siⁿ ) chit-ê Sian-siⁿ só͘ káng-kiù ê Tia̍t-ha̍k kàu-boé ū sím-mi̍h lō͘-ēng ta̍t-chîⁿ leh? Bān-hāng-mi̍h pún-goân ê lí kan-ta thang ēng chi̍t-kù-oē lâi kóng i, chiū-sī Bē-thang ké-bêng. Taⁿ goá ê sim phāu- hīn ut-chut,kàu chia koat-toàn beh sí-- lah ! Í-keng khiā tī gâm-téng sim-tiong ū siáⁿ bô pêng-an--leh! chiah chai toā-toā pi-siong kàu-ke̍k chiū-sī toā-toā khoài-lo̍k."
Siá chiah-ê oē liáu chiah thiàu-lo̍h chuí-chhiâng sí. āu-lâi lâng khì chhoē i- ê sin-si chhoē bô, kan-ta hip I só͘ siá ê jī, kap i pêng-ji̍t ê siōng, ìn tī pò-nih hō͘ lâng khoàⁿ.
Lán khoàⁿ chit-chân sū chiū thang siūⁿ :－
Chit-ê lâng i khiok chai bān-hāng-mi̍h, sè-kan bô lâng káng-kiù ē-tit-chīn. Ché khiok ū iáⁿ; chóng-sī ché thang hián-bêng bān-mi̍h sī Siōng-tè chhòng- chō, Siōng-tè ê pún-sū tì-sek, sè-kan siāng tì-sek ê iā bē chhek-to̍k pí-phēng tit ( thang khoàⁿ I Lîm. 1 : 25; Iok-pek 26 : 36 : 22, 37 :- 41 : ) Thang kà-sī lán, Siōng-tè hiah toā koân-lêng, lán tio̍h kèng-ho̍k chun-chông.
I sui-jiân ū tì-sek thiaⁿ tō-lí káng-kiù tō-lí, iáu-kú m̄-bat Siōng-tè chò bān tì- sek ê goân-pún lâi kèng-uì I, ( Chim-giân 1:7 ) tì-kàu chi̍t-sî kheng-seng chū-chīn. Che sī hō͘ lán chai lâng m̄-bat Siōng-tè, bô kèng-uì Siōng-tè sī chin chhám, sui-jiân tì-huī, kiù-si̍t sī gû- chhún ( I Lîm. 1 : 9, 10 ). Lán bat Siōng-tè lâi kèng I, sī chin ū hok-khì. Sèng-keng kóng, Kèng-uì Siōng-tè chiū-sī tì-huī; tû khì pháiⁿ chiū-sī chhang-miâ ( Iok-pek 28:28 ); che chin-chiàⁿ ū iáⁿ. iū-koh hō͘ lán siūⁿ, lâng kan-ta thiaⁿ tō- lí, bat tō-lí, nā sī bô sìn, bô tit-tio̍h, án-ni lâi sí--khì sī chin óng-khut, hô- hòng thang ka-tī chū-chīn mah? Nā kóng, " Chá-khí thiaⁿ tō-lí ê-hng chiū khó-í sí ", chóng káⁿ m̄-sī chit-ê ké-soeh. Lán hiān-sî oa̍h--teh thiaⁿ tō-lí ê lâng, tio̍h chhì-mn̄g khoàⁿ lán ū sìn boē ? ( II Lîm. 13 : 5 ) Nā boē, tio̍h koáⁿ-kín sìn, nā bô chi̍t chá-àm kan nā put-chheh sí-- khì , sī kài m̄-ta̍t; hit-sî hoán-hoé sī tî-- liáu.
I kan-ta beh khò ka-kī ê tì-sek lâi káng-kiù, só͘-í m̄-bat Siōng-tè. (Thang khoàⁿ I Lîm 1: 21- 26, Lō͘ 10: 21- 22). Che sī hō͘ lán chai, lâng beh káng-kiù bāng-bu̍t ê lí tio̍h jīn Siōng-tè choè chō-bu̍t-chú lâi kàng-hok i, kui êng-kng i, chiah khah ē bêng. Lán beh káng-kiù Siōng-tè ê tō-lí iā-sī án-ni. Koat-toān m̄-thang khò ka-kī ê tì-sek; tio̍h jîn-ài, chheng-khì, ì-sù siān-liông, sìn Chú bô ké chaih ē bat; nā-bô sī khang-khang (I Thê 1: 5). Káⁿ m̄-sī chhin-chhiūⁿ chit-ê lâng kan-ta phīn khu-khu ê kiàn-sek, beh lâi káng-kiù toā-toā ê koân-lêng? Ai--ah! Ū sím-mi̍h koh-iūⁿ the̍h lê-khak beh lâi iúⁿ ta hái-chuí, chē chíⁿ-té beh lâi khoàⁿ chīn thiⁿ leh! Kan-ta tô͘-huì-sim-le̍k bô-chhái kuí-nā nî só͘ ha̍k-si̍p ê tì-sek, tiap-á-kú hiat hō͘ chuí lâu--khì. Chāi siōng lī bē-tit kui êng Siōng-tè, hû-chō͘ jîn-kun; chāi hā lī bē-tit hián-iông pē-bú tì-ìm kiáⁿ-sun. Kan-ta chiong 5 chhioh ê seng-khu chòng tī hî-pak-lāi, káⁿ m̄-sī chin thang khó-sioh ah! "Tha̍k ê lâng eng-kai tì-ì siūⁿ." (Thài 14: 15)
