首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 設教一百週年倍加運動
設教一百週年倍加運動
卷期：第790號 本次： 日期：1954/10 刊名：台灣教會公報 頁數：3-4
篇名：設教一百週年倍加運動 [ Siat-kàu chi̍t-pah chiu-nî poē-ka ūn-tōng ]
作者：許有才 Khó͘ Iú-châi
  顯示 : 漢羅 全羅 並列  

設教一百週年教會倍加運動

(南大議長：許有才)

1954.10，no.790，pp.3-4

這屆的南部大會通過一个議案，就是設教一百週年教會倍加運動。主旨就是南部設教是主後1865年，算到1965年就滿一百週年，對今算起頭尾閣11年，扣實是10年久，咱就迎接--著。為著著備辦有意義的記念佮慶祝，就決定佇這10年間，著出力傳福音，建設教會，到彼時予教會比這tia̍p加添重倍，做禮物來感謝主。議決的時，全員起立贊成，閣即時表示贊同佮感激的心，自由獻金做這个路用，120外个議員，共獻3 萬外箍，這號的表決佮這款的表現，實在是未曾有的壯舉。

想--起來這是重大的決策，這个運動是設教一世紀的好的結尾，也是第二个世紀的好的開始。是未曾有的嘗試，是一項的冒險，也是一个信心。信心常常是有冒險，閣信心是容允冒險的。以下愛對這chân事講幾句的感想。

    1. 這是好時機的好計畫。

一百週年實在是一个好時機，值得予咱通記念。主降生到今才lím-lím有20 个一百週年。上帝予咱的教會經過一百年，用安然佮進展來度過艱難崎嶇的路徑，不論逆境，不論順調，攏予咱行佇興通佮順利的路。有講盡袂的恩賜對咱的前輩，透到佇咱來致蔭咱。咱kiám毋著感謝mah？閣咱會得有份佇這个，算是真好的幸遇，咱無人會抵著兩擺的一百週年今咱欲用啥物禮拜來感謝主。咱無thâi豬，屠羊，也毋kan-ta 喊喝、鬧熱。咱是計畫佇10年內，建設加倍的教會。現時咱有150 間，向望10年後閣得著150 間以上，通做禮物來感謝主。為著這个來計畫，來努力，來活動，來奉獻，來祈禱。這个運動是每一个會友攏有份的計畫。這也是該然的運動，欲予基督的體ná長大的。

    2. 有特色。

過去咱的傳道，除去初設時代以外，較常是自然膨脹。看見有會友佇遐teh聚集lah，然後才派先生去駐在。甚至已經成立教會lah，iáu-kú聽候無先生通去。咱看保羅in是對反。是去無會友，無教會的所在傳道。In揀相當的市鎮做中心來設教會。就是代先派人去傳道，然後設教會。這个運動就是欲親像按呢。代先選擇教會的候補地，若是適當，不論遐有會友抑無會友，也欲去設。佇咱南部4中會內，猶有90 个2鄉鎮講無教會。重要的埠頭猶真濟，應該著去設。

閣再來咱的佈道是散散掖，散散播，無有計畫性。今是有計畫具體的辦法，是欲集中佇所選擇的所在，也佈道經過一定的時間，就欲成立教會。

這个運動有分做7 个部門，就是推行部、財政部、連絡部、資料部、傳道部、訓育部、醫療傳道部等，teh計畫佮推進。

    3. 有可能。

    (1)九十年久才有150 間，若是此後10年久也想欲設150 間，kiám毋是空想風譀mah？過去一年平均設無上兩間，有影是真慢，咱著承認咱的努力無夠。總是咱著知，凡事起頭難，是對佇無半間做出發--的。但是現時咱有150 間的教會，有44500 个會友，有130 个傳教者，有500外个長老，有700外个執事，做咱的基礎。若每間教會10年中間努力去設一間就到額，抑是每10 間教會，一年加設一間也有。或是咱有4个中會一年合力設4 間，就10年後kiám毋是就160 間 mah？若有計畫，有努力，穩會。

    (2) 財政按算一千萬，毋是講無一千萬就袂通建設。總是若是必須來講，也毋是咱所袂起--的。每年若有1000人歡喜每月獻100箍就有。抑是每年若有10000人每月獻10箍就有。財政組會替咱想，予咱好奉獻的路。閣這10年久，因為愛財力集中佇這个運動，有停止kí-sêng教會起拜堂向別教會募捐的事。咱但有努力，毋是做袂到的事。

    4. 毋通袂記得--的。

不過謀事在人，欲予伊成是在耶和華。其實這个事耶和華便便的意思欲共咱成。只有是teh聽候咱計謀nā-tiāⁿ。咱著祈禱上帝，幫贊咱全體的兄弟姊妹，攏siâng一个心志，會為著上帝計畫大的事，會協力為著上帝做大的事。著求lah。

   「耶和華ah！求你佇遮的年的中間閣興起你的所做；佇遮的年的中間顯現」(哈巴谷3：2)。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461