SÈ-KÀI SIAU-SIT
1954. 10, no. 790, pp. 10-11
Tek-kok.
Kin-nî 7 goe̍h, Sai Tek kap Tang Tek Ki-tok-kàu Sin-kàu pêng sìn-tô͘ ū chū-chi̍p tī Tang Tek ê Leipzig. Lō͘-bé hit mî, in ū chū-chi̍p tī chi̍t ê chháu-po͘, chha-put-to ū 50 bān lâng chū-chi̍p. Chit ê hoē phah-sǹg sī sè-kài kàu-hoē ê tē-it toā ê chū-hoē. Chit ê Kirchentag (kàu-hoē ji̍t) ê programme sī ēng Sèng-keng gián-kiù choè tiong-sim. Chóng toê-ba̍k chiū-sī "Lán tio̍h tī Chú ê ǹg-bāng lâi hoaⁿ-hí." Tī hit sî ū chheng-liân te̍k-pia̍t ê chū-hoē; ū kéng chi̍t ê phiau-gú, "Lán tio̍h khiā-chāi tī Ki-tok. I bô beh hō͘ lán tú-tio̍h sit-pāi."
Tang Tek.
Tang Tek chèng-hú tī chit kuí-nî ū teh khí chi̍t ê lí-sióng ê kiōng-sán to͘-chhī. Chit ê to͘-chhī chiū-sī beh kì-liām Su-ta-lîm, kiò choè Stalinstad. Tī hit ê só͘-chāi pún-lâi bô beh khí pài-tn̂g tī in ê kè-e̍k lāi. Chóng-sī in-uī Kū-kàu kap Sin-kàu ê Ki-tok-tô͘ tī hit ê toē-hng hoán-tuì. Ko͘-put-chiong kūn-lâi tio̍h koé in ê kè-e̍k, hiān-sî ū teh khí nn̄g keng ê lé-pài-tn̂g, Sin-kàu--ê kap Kū-kàu--ê.
Eng-kok.
E. A. PAYNE (Pheine) Phok-sū kūn-lâi ū ki-hoē thang khì Lō͘-se-a ê Be̍k-se-ko, í-ki̍p choē-choē só͘-chāi. I sī Eng-kok Chìm-lé Kàu-hoē ê chóng-kàu-sū, só͘-í ū khì thàm Lō͘-se-a ê Chìm-lé-hoē. I pò-kò kóng, hiān-sî ū 5000 keng pài-tn̂g kap 572,000 (57 bān 2 chheng) niá soé-lé ê hoē-iú. Chiàu i ê pò-kò, sui-jiân Chheng-liân-hoē, Chú-ji̍t-o̍h téng-téng, bô thang chū-iû tit-tio̍h chèng-hú ê ún-chún, iā ū tú-tio̍h choē-choē hāng ê pek-hāi, iáu-kú i kóng, "Goán hoat-kiàn oa̍h-oa̍h ê Ki-tok kang-chok tī Lō͘-se-a."
Bí-kok.
Phó͘-sè Kàu Liân iáu-bē chū-chi̍p tī Evanston ê í-chêng, hit toē-hng Thian-chú-kàu ê toā kam-tok ū hoat chi̍t tiuⁿ bûn-su hō͘ choē-choē só͘-chāi ê Thian-chú-kàu-tô͘, kìm-chí in khì hù chit ê hoē. In-uī kóng, Kū-kàu boē ēng-tit chham-ka tī Sin-kàu ê tiong-kan, in-uī Sin-kàu-tô͘ teh gián-kiù kàu-hoē ê pún-chit sī sím-mi̍h.
Bí-kok Princeton.
Lán Tâi-oân Tiúⁿ-ló Kàu-hoē chi̍t uī tāi-piáu Tân Khoe-chùn Bo̍k-su khì Princeton hù tē 17 hoê sè-kài Tiúⁿ-ló Kàu-hoē Chóng-hoē. I ū siá phoe tńg-lâi kóng, lán Tiúⁿ-ló Kàu-hoē ū choē-choē chin hó ê chí-tō-chiá, tiong-kan ū choē-choē lâng teh chióng-lē kàu-hoē tio̍h koan-sim tī Phó͘-sè Kàu Liân.
Ngāu-san-oân.
Kin-nî T. K. C. Hā-lēng-heō ê sî, tī lé-pài-ji̍t ū te̍k-pia̍t khui Tè Jîn-siū Phok-sū ê kì-liām lé-pài. uī-tio̍h chit ê kì-liām ū hiàn-kim; só͘ hiàn ê chîⁿ-gia̍h ū 852 kho͘ 7 kak. Tī chia ài tāi-piáu Ngāu-san-oân Táng-sū-hoē kā T. K. C. chu-uī seh to-siā.
(Bo̍k-su: Bêng Iú-tek pò).
