Kò͘ Hōng-bêng Tiúⁿ-ló
1954. 10, no. 790, pp. 13
Kò͘ Hōng-bêng Tiúⁿ-ló sī kò͘ Si Khun-phêng Bo̍k-su, Si Sek-ke Bo̍k-su ê kè-bó.
I tī A. D. 1893 nî 2 goe̍h 23 ji̍t, chhut-sì tī Chiong-hoà chhī. Tī A. D. 1954 nî 8 goe̍h 30 ji̍t, tī Lo̍k-káng pia̍t-sè, hióng-siū 62 hoè.
I tī 1926 nî sìn Chú, siāng nî kè hō͘ kò͘ Si Gē-oán Sian-siⁿ chò sio̍k hiân, hit sî i ū 5 ê kiáⁿ, siōng sè-hàn ê sī Sek-ke Bo̍k-su, hit sî 11 hoè nā-tiāⁿ.
Tī i sìn Chú liáu-āu 28 nî tiong ê seng-oa̍h, ū kuí-nā hāng hō͘ lán thang o̍h, thang siàu-liām, kán kì tī ē-bīn:-
1. Tuì ka-têng. Ū chò hiân-bó liông-chhe, gâu hia̍p-chō͘ tiōng-hu sìn Chú kap châi-poê kiáⁿ-jî. Ū hō͘ Khun-phêng Bo̍k-su, Péng-hông Sian-siⁿ ji̍p Sîn-ha̍k-hāu, Hiong-tô Sian-siⁿ ji̍p Tâi-tiong Su-hoān, Sek-ke Bo̍k-su ji̍p Tióng-êng Tiong-ha̍k kap Sîn-ha̍k-hāu, Khun-phêng Bo̍k-su-niû ji̍p Lú Sîn-ha̍k. Chin sī hiân-bêng ê loē-chō͘.
2. Tuì kàu-hoē. Ū chīn-chit tiong-sêng. I tam-tng chip-sū 7 nî, tiúⁿ-tó 15 nî, kiōng 22 nî, hō͘ choân kàu-hoē ê lâng só͘ o-ló, chun-kèng. Hoē-iú i bô chi̍t ê m̄-bat, put-lūn hn̄g kīn, ta̍k ka-têng i lóng ū kàu. Muí pài 6 sī i tēng-kî ê hóng-būn hoē-iú. Chò sū hiân-bêng kó-toàn, ióng-kám ti̍t-chìn. I ài-sioh kàu-hoē iâⁿ-koè ka-têng, chin gâu chiàu-kò͘ kàu-hoē ê mi̍h-kiāⁿ. I ū tam-jīm Chú-ji̍t-o̍h ê hāu-tiúⁿ kap kàu-oân ê kang-chok kiōng 25 nî kú. Koàn-thiat sí-chiong, koan-sim kàu-hoē it-chhè. Chin khó-kèng.
3. Tuì sìn-gióng sī jia̍t-sim khiân-sêng, mê-ji̍t ho̍k-sāi Chú, kî-tó tha̍k keng bô ià, sìn-gióng kian-kiông, ióng-óng māi-chìn ê lú eng-hiông.
Tī i iáu-boē sìn Chú ê sî, sī chi̍t ê chō͘ jio̍k gī-kiap ê lú tò͘-sū. Kàu siū Chú chín-kiù liáu-āu, choân seng uī Chú ê sèng-gia̍p phah-piàⁿ. Hoān-sū bô lia̍h sèⁿ-miā chò iàu-kín, chí-ū ài chīn i tuì Chú só͘ niá-siū ê chit-hūn, put-lūn hong hō͘, bô thêng. Só͘-í tī i sìn Chú 28 nî tiong, kàu-hoē toā-sió ê chi̍p-hoē, I chi̍t lâng it-tēng bô khiàm-se̍k, nā thiaⁿ-kìⁿ tó-uī ū poê-lêng-hoē, chhin-chhiūⁿ iau chhuì-ta, chin ài khì chham-ka.
Tī i phoà-pīⁿ tiong, lé-pài-ji̍t tī pīⁿ-chhn̂g-nih iā sī ka-kī tha̍k Sèng-keng, kî-tó, tâng-sim kèng-pài Siōng-tè. I tī Sòng Phok-sū lâi Tâi ê sî, bat siū kéng chò Tiong Tiong Pò͘-tō-tuī hù chóng-tuī tiúⁿ, iā bat siū soán chò Lâm-pō͘ Kàu-hoē Lú Soan-tō-hoē ê uí-oân. I só͘ ài gîm ê Sèng-si sī 268 siú, choè-āu choân kàu-hoē ê sìn-tô͘ khì hóng-būn i ê sî, ū kap i saⁿ-kap gîm chit siú, lâi piáu-sī i tuì sè-kan it-chhè ê sū-chêng chin bêng-pe̍k...... Chit siú si gîm liáu, koè 15 tiám cheng chiū pia̍t-sè. I tī pīⁿ tiong ê seng-oa̍h, ū tit-tio̍h i ê kiáⁿ-jî Hiong-tô Sian-siⁿ kap sim-pū Hûn Tiúⁿ-ló, Chuí Chip-sū in ê khoàⁿ-kò͘, hō͘ i an-jiân kui thian. Goān Chú an-uì uî-cho̍k. ǹg-bāng lán iā lóng oē o̍h i ê hó bô͘-iūⁿ. A-men.
(Káu goe̍h 6 ji̍t, Kí Un-jiû pò).
