SÈ-KÀI SIAU-SIT
(Bo̍k-su: Bêng Iú-tek)
1954. 12, no. 792, pp. 9-10
Bí-kok.
Bí-kok kàu-hoē tī kuí-nā nî ê tiong-kan, hoē-iú jîn-sò͘ ū ke-thiⁿ choē-choē. Ki-tok-kàu ū choân peh-sìⁿ ê 35% (1953), Thian-chú-kàu 19% (1953). Kap 1940 nî pí-kàu Ki-tok-kàu ū ke-thiⁿ choân peh-sìⁿ ê 7%, Thian-chú-kàu ū ke-thiⁿ 3%.
ìn-tō͘.
1956 nî, chiū-sī Bí-kok Bí-í-bí-hoē khì ìn-tō͘ thoân-kàu 100 nî ê kì-liām. Tī hit sî Chóng-hoē beh chū-chi̍p tī Bí-kok ê Miⁿeapolis. uī-tio̍h chit ê kì-liām-hoē, ìn-tō͘ chin chhut-miâ ê Sèng-koa-tuī beh tāi-piáu ìn-tō͘ khì hù Chóng-hoē.
Lâm Bí.
Tī Lâm Bí Lō͘-tek Má-teng Sìn-gī-hoē ū heng-khí tī ta̍k só͘-chāi. Sui-jiân Thian-chú-kàu ū choē-choē nî ê le̍k-sú tī hit só͘-chāi, iáu-kú Sìn-gī-hoē ê hoē-iú ū 75 bān.
Ji̍t-pún.
Brunner Phok-sū kūn-lâi tī kàu-hoē káng-ián ê sî, ū o-ló kàu-hoē ka-têng lé-pài ê hong-hoat. I ū o-ló 3 tiám: (1) Chit khoán ê lé-pài ū khah chhin-chhiūⁿ Sin-iok lāi só͘ ū ê lé-pài. (2) Chit khoán ê hong-hoat, khah oē ióng-sêng hó ê jîn-bu̍t chhut-lâi. (3) oē khah pang-chān pêng sìn-tô͘ bat Sèng-keng.
Ka-ná-tāi.
Tī Tâi-oân choè kang choē-choē nî ê Gô͘ Ui-liâm Bo̍k-su-niû, hiān-sî toà tī Guelph ê só͘-chāi; i kin-nî 87 hè. Téng-ji̍t siu-tio̍h i ê phoe, kóng bô kuí lé-pài chêng, ū 4 ê Tâi-oân pêng-iú khì thàm i, chiū-sī kin-nî choè Chóng-hoē tāi-piáu chhut-kok ê. I kóng, khoàⁿ-kìⁿ in ê sî, ū kóng boē chhut ê hoaⁿ-hí, hui-siông kám-kek kàu lâu ba̍k-sái.
Pa-le̍k-su-thèng.
Ū chi̍t uī Ki-tok-kàu ê chí-tō-chiá Dr. MaxEnker, kūn-lâi pò-kò kóng, Sin to̍k-li̍p ê Í-sek-lia̍t kok ū sin khoán ê chheng-liân Ki-tok-tô͘ chiām-chiām chhut-lâi. In sui-jiân sìn Iâ-so͘ sī Bí-sài-a iáu-kú m̄-bián thoat-lī Iû-thài ê kū hong-sio̍k, iáu-kú oē thang chīn-tiong tī in ê kok-ka.
(Thāi-sio̍k).
