San-tē Si̍p-gē-só͘
1954. 12, no. 792, pp. 12
Chú-lāi ê hiaⁿ-tī chí-bē, goá ài kài-siāu, Tâi-oân Ki-tok-kàu San-tē Si̍p-gē-só͘ ê chêng-hóng hō͘ tāi-ke chai. Pún-só͘ tī Chú-āu 1951 nî 7 ge̍h chhóng-li̍p. Chong-chí sī uī-tio̍h ài poê-iúⁿ San-tē tông-pau seng-oa̍h ki-lêng, kap chhim-chō sìn-gióng ki-chhó͘. Hō͘ in oē khak-li̍p chū-ióng, chū-thoân, to̍k-li̍p kàu-hoē ê ki-chhó͘. Pún-só͘ tē-chí goân siat tī Koan-se tìn, Má-bú-tok oá kūn san-tē ê tē-hng. In-uī hia kau-thong put-piān, iū bô tiān-teng ê siat-pī, m̄-nā ha̍k-seng ê seng-oa̍h put-piān jī-chhiáⁿ kok-chióng ê seng-sán-phín ūn-siau khùn-lân, só͘-í chit pái ū chhian-chhut lâi Tiong-le̍k tìn. Pún-só͘ kūn Tiong-le̍k kàu-hoē. In-uī goá pêng-sò͘ tuì chhù-bī, só͘-í siông-siông tī hia teh léng-tō in ê chū-hoē. Hiān-sî siu-iông ê ha̍k-seng oá 30 miâ, khah choē sī tuì se-pō͘ kok San-tē hiong lâi ê. Kūn--ê, ū Ngó͘-hong, Kak-pán, Thài-an. Hn̄g--ê, ū Sìn-gī, Jîn-ài, Hô-pêng chiah ê hiong, ū プルン, タイヤル, サイセット 3 chèng-cho̍k ê ha̍k-seng, saⁿ-kap seng-oa̍h, lé-pài. Si̍p-gē pō͘-hūn, ū hun 6 pō͘, chiū-sī mî-phē, ba̍k-kang, tek-kang, tîn-kang, chit-pò͘, chhâi-hông. Ha̍k-seng chin jīn-chin ha̍k-si̍p, in ê chè-phín chin kian-kò͘, kè-chîⁿ iū sio̍k. Kî-tiong mî-phē pō͘ só͘ chè-chō ê mî-phē, tē-it siū choân-séng kok kàu-hoē ê hoē-iú, ài ēng ê hó hong-phêng. Só͘ ēng ê mî-hoe, sī Bí-oān-hoē só͘ phoè-kip iu-liông mî-hoe, kap pún-séng lâm-pō͘ san-tē só͘ sán ê pún-tē mî-hoe, kè-chîⁿ pí chhī-bīn khah sio̍k, phín-chit iu-liông, nāi ēng. Hoan-gêng kok hoē-iú lâi kau-koan, Thong-sìn chhù siá tuì Tiong-le̍k tìn, Tiong-le̍k Ki-tok Tiúⁿ-ló Kàu-hoē Lí Lîm-chhiū siu.
(Lí Lîm-chhiū pò).
