Kài-siāu P. K. U. ê kang-chok

(P. K. U. Su-kì: Loā Péng-tông).

1954. 12, no. 792, pp. 21

  Kài-siāu P. K. U. ê kang-chok ê khài-iàu kap kok-pō͘ ê pō͘-tiúⁿ.

1. Kì-liām siat-kàu pah chiu-nî, Sìn-tô͘ muí lâng tio̍h kak-chhíⁿ; Tāi-hoē uī che í-keng koat, Cho͘-sêng chhit pō͘ teh siat-hoat.

2. Tē-it chhui-hêng pâi chò chêng Iau-kiû sìn-tô͘ chīn sú-bēng; Hōng-hiàn kî-tó kap chò kang, iā tio̍h hiàn-chîⁿ thang kiù-lâng.

3. Tē-jī chai-chèng tio̍h khak-si̍t, Choè-chió tio̍h hiàn cha̍p-hūm-chi̍t; Lí nā uī Chú án-ni chò, Seng-oa̍h tek-khak bián hoân-ló.

4. Tē-saⁿ chiū-sī liân-lo̍k pō͘, ài tit lāi-goā lâi hia̍p-chō͘; ǹg-bāng tit-tio̍h chîⁿ kap lâng, Poē-ka ūn-tōng chiah ún-tàng.

5. Tē-sì hō-miâ kiò chu-liāu, èng-hù kok pō͘ só͘ su-iàu; Chhiáⁿ lín kok pō͘ bián khoà-lū, Nā khiàm chu-liāu chia lóng ū.

6. Koh-lâi hùn-io̍k pâi tē-gō͘, Hùn-liān jîn-châi thang hia̍p-chō͘; Chiong-lâi kang-lâng tio̍h ka-poē, M̄-bián kàu-sî bô tàng chhoē.

7. Tē-la̍k hō-miâ Thoân-tō-pō͘, Iau-kiû sìn-tô͘ toā hia̍p-chō͘; Nā ū phài-lâng kàu kuì-tē, Lí tio̍h hia̍p-chok m̄-thang the.

8. Tē-chhit hō-miâ kiò i-liâu, I-pēⁿ thoân-tō chò bo̍k-phiau; Bô-chîⁿ phoà-pēⁿ siū i-tī, ēng che lâi thoân Chú tō-lí.