首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 東洋記錄
東洋記錄
卷期：第221張 本次： 日期：1903/8 刊名：台南府城教會報 頁數：62
篇名：東洋記錄 [ Tang-iûⁿ Kì-lio̍k ]
作者：吳道源 Gô͘ Tō-goân
  顯示 : 漢羅 全羅 並列  

東洋記錄
1903.08 221卷 p.62-64
(吳道源記ê.)
第13號有落雨，所以我kap一個朋友坐火車去神戶[Kobe] 探朋友。秋山善一先生kap伊ê家後，也攏tī-hia。Tī 14 e晡koh倒轉來大阪。
第15號去Kài市看水族館，水中所有ê魚鱉有鱗無鱗ê攏有。Koh入博覽會機器館，內面逐等號製造ê機器真濟。也有製紙--ê,也有製電氣車--ê,也有製茶--ê,製麵線--ê,織布--ê,製印字--ê,製雪文--ê,無牛家己會挨磨--ê,造火車--ê;真濟款，看bē盡，記bē了。Koh有灌溉ê水龍，thang汲水30丈深，一點鐘久出水千外石；價錢2，250箍。我看這等號ê器具不止有合台灣ê路用，因為有真濟ê看天田，人若合股買，就有真大ê利益。這水龍tī大阪有thang買。Koh看林業館、水產館、農業館、教育館；逐項ê物件，土產、水產無m̄齊備。
第16號入動物園，內面山禽野獸，鱷魚、虎、豹、獅、象、駱駝、狐狸、狗熊、人熊、猩猩、白鶴，孔雀、雉雞鳥，逐項講bē盡。Koh入通運館，參古館，tī 這館有排列各國ê名物寶器，有ê價值連城。也有中國古早ê寶器，也有漢朝ê瓦、王莽ê鼎，陀螺形，寶玉ê如意，逐國攏有提物去賽會。敢是因為這pang日本第5回ê 博覽會，tú好前年有入萬國公會，也是扑贏中國；所以逐國ê人正有chiah熱心來博覽。
第17號禮拜日有雨，博覽會場邊，有設一間日本基督教聯合ê宣道堂；有幾若ê牧師也有先生，通日tī-hia輪流講道理；有時吟詩，聽ê人也真濟，tī 這個宣道堂m̄但禮拜日聚集，就是逐日也是án-ni，所以利益人不止大；人tī-hia坐歇睏，m̄免了錢，甚至有茶thang止渴，也有道理thang聽，靈魂身軀平平得著利益。這項也是真thang歡喜，咱教會無輸世俗，咱也將道理出品kap in入博覽會。
第18號有hō͘總務課長chhoā阮去看金宮 ê火柴劇；婦人囡仔幾若百個，有ê--包，有ê--封，扛手活動，機器也真巧妙。看了就去大阪ê造銀局，這個局真大，有分幾若間；有--ê teh熔銀，有--ê鑄銀板，有--ê鑄銀角仔，有--ê鑄金鈸仔，有--ê鑄銅koa，有--ê teh鑑定分量，逐項ê機器不止巧妙。看了就到一間商業改良ê會議所，不止大間，內面椅桌排列真整齊，thang容允1，500人。
後來koh到 Chhoan-pak-chhoan A-pō製紙ê合資會社；內面有3個大機器，是英國kap德國出ê。另外有原動機，這個機器轉漂料機器，合成機造紙機、焙乾機，逐個toè伊振動，紙家己乾，家己剪齊，家己疊真好勢。一日一個機器會thang造四萬綑ê紙。原料是將破布、稻草、麻槁、木料摻藥落去au ê。
Koh到金根紡織合資會社，製棉ê紡織廠，真大間，也疊樓；較濟是用玻璃khàm,所以不止光。查某囡仔2000外人teh巡機器。代先用棉花過一個器具，就變棉板；koh過織，就成棉條；koh過一個，成棉紗；也有分做幾十號ê紗，有大有細。將紗牽落kui，就歸家己會織布；一日一個kui會織得三丈外，一人會thang掌3個kui，不過是巡看，若有紗斷就拾起來接nā-tiāⁿ，無用人ê手掌，kui也免用腳踏，真正巧妙。親像孟子講：「工欲善其事，必先利其器」，聖哉是言耶。
第19號下晡三點鐘坐火車；五點半到京都[Kiotò]。
第20號阮相kap坐車到滋賀縣，近江滿是紡織株式會社。這個會社是苧仔，抑是麻，下tī大石碾，碾幼就入機器，就做絲；koh經過機器，就變做絲燃；koh過機器成做車仔線，有--ê大ê,有--ê細，有--ê織做紡袋，有--ê別物ê路用。較濟是將hit幾若號ê線縛規綑，載去中國賣。後來koh到石山寺，看琵琶湖周圍ê八景，tī 這巖頂有玉造ê所在。前年俄國太子就是到hia看光景，beh倒轉ê 時hō͘日本人用槍扑著頭殼ê所在。
Tī代鎮hia自明治18年起工，tuì山頂鑿一條河，穿過兩個山，到27年才好。Hit這個山空ê河，船會thang來往；人kap貨tuì hia過不止近，這個河有真大路用，tuì琵琶湖拾水到京都灌沃土地。也續tī水孔設一間京都水利局；擺設20外個原動機，京都攏是倚靠這港河水ê力來運動機器，m̄免倚靠土炭抑是石油。所以京都ê自來水，自來火，逐等號ê機器廠攏tuì 這個局ê原動機發力運動。阮hit e晡三點鐘就坐船tuì hit個山孔河經過；tī河內逐隻船攏有點燈；來往ê船不止濟，到5點半就出這個河口，tī河口也有設水底ê kiām氣鐵路，將車載船到街路下貨；就koh載到河裡，船就浮tī水裡便便thang koh駛tuì河裡過；真奇巧，koh好看。
21號，去本願寺，以及33間堂，kap治恩院；tī內面有皇帝歇ê所在；古跡字畫寶器，也bē少，順續去看丘武亭以及武德殿；續到舊禁城看經殿。Koh入京都ê盲啞學校；這間學是日本第一早咱教會ê牧師設ê。啞口臭耳人會用手做話，用指頭仔做50音；3、4年ê學生攏普略會講會讀，也會刺鞋、作樂、做工夫，種種ê技藝，無輸平常人。青瞑ê也學lia̍h-lêng、歷史、筆算、地理學、sèng-lí學，以及身體學、音樂，濟濟項ê工藝tuì án-ni出學了大家也無輸平常人。
22號頂晡8點半鐘，坐急行ê火車，到e昏9點鐘就到東京。落車就有台灣協贊會員，也有一個長老姓尾崎名宗良；伊是台灣協會ê委員。伊真好禮逐日來chhoā阮四界行，四界看光景。阮一禮拜久tiàm tī東京，禮拜e晡4點半，順續kap德福去明治女學校，探黃英kap吳笑；in兩個4年久tī-hia讀冊，卻有不止大有益，in所讀ê第一濟ê是英文，第二和漢文、算數、學女工、sèng-lí學、家政、地理、歷史、物理學、化學、畫圖、寫字、體操、詩歌、教法、禮式，照次序逐禮拜攏著讀chiah-ê課程。我見著in大家真歡喜；總是可惜in兩個台灣ê話soah bē記得，無半句會曉聽，也bē曉講，真奇怪，敢是因為in兩個罕得講本地話ê因端，所以án-ni。到6點相辭就倒轉來，到e昏時7點半，我kap德福去新榮橋ê教會赴in ê宣道會；有一個美國ê牧師，伊是teh做明治學院ê教師，名S. P. Tuetan；koh有先生名大野直州，伊也是明治學院ê教師；in請阮坐，續將in另外teh做宣道會所beh吟ê幾若首詩hō͘阮看in ê法，也是另外巧妙，代先大野先生唱，台頂就連連吟3首詩，才讀新約路加18:18~30。讀了就請一個先生tī台頂祈禱；續koh吟一首詩，就請牧師章所讀ê聖經開拆講道理。講明白就祈禱退位，就koh一個將伊所講ê再koh叮嚀勉勵。煞尾koh吟一首詩，牧師祝福才散。In攏是坐tī台頂，án-ni hō͘人ê心較bē記得厭；逐人較注神聽。我扑算這個是好用。
以後幾若日，我有去看幾若間ê學堂，逐間攏不止整頓；m̄但 kan-ta用冊教學生nā-tiāⁿ，另外逐科攏有備辦器械，抑是物件thang hō͘學生看一目可以瞭然。親像學物理就有火車，抑是電氣，抑是濟濟項hō͘學生看逐項ê理。若學礦學，就有逐項礦內ê物利便thang看，就快明；學農學，有逐項ê種子thang試種；學林學就有逐項ê樹栽thang看；學醫學就有逐等號ê骨頭，抑是臟腑ê模形利便thang參考。講究逐間ê學堂真整頓，實在會堪tit講得著泰西ê學問。Tuì án-ni咱教會ê人，無較輸世俗，大才調ê人真濟。親像議院長也是教會ê人；另外有10外個做議員，國家ê政事濟濟教會ê人teh鬥料理。咱tī-chia kap in大精差；我向望咱台灣ê兄弟大家致意著設法hō͘子弟讀冊；也著想看有甚物法來整頓學堂，hō͘學堂大興起。日本ê興起是tuì得著西學，了後漸漸強；咱若無設法hō͘子弟得著新ê學問，kan-ta區區守舊款，無各樣大清國政府。請試看某人有3個子，伊設法hō͘ in做3條路。第1個tuì 7歲到27歲hō͘人倩做工，平均算每年得著24箍；20年久共thàn有480箍koh將所thàn ê生息得著利息480箍，共有960箍。
(後卷beh koh印。)
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461