PÒ͘-TŌ
Lâng ê kè-ta̍t
1955.08 tē 800 hō p.24-26
(Bo̍k-su: Tè Pek-hok)
Lâng ê kè-ta̍t chāi-tī tá-lo̍h? Goá siūⁿ lán nā jīn-bat Sèng-keng, chhim-chai í-hā só͘ kóng chit saⁿ-hāng sū, chiū oē bêng-pe̍k hit ê kè-ta̍t sī sím-mi̍h: -
(1) Lâng ê kè-ta̍t sī chāi-tī lí-kái lâng ê lâi-goân. Lâng sī tuì tá-lo̍h lâi--ê? Chìn-hoà-lūn ê Ta̍t-ní-bûn kóng, "Lâng sī tuì kâu lâi chìn-hoà--ê. Pêng-iú! Lâng tàu-tí sī kâu lâi piàn ê mah? Nā-sī án-ni, lâng chiū-sī kâu ê hō͘-è, lí siūⁿ hit ê kè-ta̍t ū goā-choē? Si̍t-chāi kâu boē-oē piàn-choè lâng, in-uī kâu kap lâng ê oa̍h-miā sī bô sio-siâng. Lâng ū lêng, lâng oē-hiáu kèng-pai Sîn, kâu chiū boē-oē. Chìn-hoà-lūn put-kò sī chi̍t ê ha̍k-soat nā-tiāⁿ, m̄-sī chin-lí. Nā-sī án-ni, lâng tàu-tí sī tuì tá-lo̍h lâi--ê? Sèng-keng ê thâu-chi̍t pún kā lán kóng, "Lâng sī Siōng-tè só͘ chhòng-chō--ê, sī Siōng-tè ēng toē-chiūⁿ ê thô͘-hún chhiau choè lâng, pûn oa̍h-khuì ji̍p tī lâng ê phīⁿ-khang lāi, chiū chiâⁿ-choè oa̍h ê lêng-hûn, sī chiàu Siōng-tè ê hêng-siōng kap khoán-sit lâi chō--ê, sī chhòng-chō lâm--ê, lú--ê, in-uī (1) Lán ê seng-khu sī Siōng-tè chhin-chhiūⁿ só͘ chō ê kia̍t-chok). (2) Lâng ê lêng-hûn sī Siōng-tè chhin-chhiūⁿ pûn oa̍h-khuì ê oa̍h-lâng. (3) Lâng ê sèng-chêng khoán-sit sī chhiong-moá Siōng-tè ê tì-huī kap chhong-bêng, koh ū Siōng-tè ê Sèng-kiat, jîn-ài, kong-gī, sìn-si̍t kap lîn-bín, sī ke̍k-kî siān-bí kap êng-kng--ê, lí siūⁿ hit ê kè-ta̍t ū joā-choē? Siōng-tè ài thê-ko lâng ê tē-uī, nā-sī sè-kan lâng ka-kī ài kàng-kē, jīn-tēng ka-kī sī kâu lâi chìn-hoā--ê. Si̍t-chāi chin khó-sioh! Pêng-iú! Siōng-tè ài lí sìn I ê oē, I beh ko-senglí, hō͘ lí thang lâi êng-kng I, lí ū hoaⁿ-hí á-bô?
(2) Lâng ê kè-ta̍t sī chāi-tī jīn-bat lâng ê oa̍h-miā. Lâng ū jio̍k-thé kap lêng-hûn, lâng ê kè-ta̍t sī chāi-tī i ê lêng-hûn kap oa̍h-miā. Goā-kok bat-ū chi̍t ê hoà-ha̍k-ka, i hun-sek lâng ê sin-thé, kiat-kó kóng, Lâng ê kè-ta̍t chí-ū chi̍t ê lêng-gûn nā-tiāⁿ, chiū-sī:
(1) Lâng ê sin-thé 100 hūn ê 70-80 sī chuí-hun, chiū-sī ke̍k piān-gî--ê. (2) Lâng ū chí-iû, thang choè sat-bûn 6 tè. (3) Lâng ū lîn-chit, thang choè hé-chhat 220 ki. (4) Lâng ū chio̍h-hoe chit, thang siau-to̍k chi̍t ê koe-nâ. (5) Lâng ū jiû-n̂g chit, thang thāu chi̍t-chiah káu ê ka-cháu. (6) Lâng ū thih-hun, thang phah chi̍t ki thih-teng. (7) Ū iâm chi̍t-pé. (8) Ū thn̂g chi̍t au. (9) Ū tām-po̍h iâm-khì thang choè hé-io̍h lâi pàng chi̍t mn̂g chhèng.
Che-sī hun-sek liáu ê kè-ta̍t. Chóng-sī lâng ê si-thé, lí siūⁿ hit ê kè-ta̍t ū joā-choē? Chiū-sī tian-tò the̍h-chîⁿ thiap--lâng, lâng iā m̄-ài ín-siū. án-ni lán thang chai lâng ê kè-ta̍t sī chāi-tī lâng ê oa̍h-miā. Chú Iâ-so͘ bat kóng, "Lâng tit-tio̍h choân sè-kài lâi sòng-sit i ê sèⁿ-miā ū sím-mi̍h lī-ek? In-uī lâng beh chhut sím-mi̍h lâi tuì-oāⁿ i ê sèⁿ-miā? (Mk 8:36). Iâ-so͘ khoàⁿ chi̍t ê lâng ê kè-ta̍t sī chāi-tī i ê oa̍h-miā, chi̍t ê lâng ê lêng-hûn sī pí choân sè-kài khah kuì-khì.
Chóng-sī kin-á-ji̍t ū choē-choē lâng uī-tio̍h ài tit-tio̍h bêng, lī, hù, kuì, chiū chiong oa̍h-miā pàng--khì, sio̍k-gú kóng, "Niáu uî si̍t bông, lâng uî châi sú", choē-choē lâng tham-ài chîⁿ-châi lâi sòng-sit in ê sèⁿ-miā, iā ū choē-choē lâng uī-tio̍h ài hòng-chhiòng jio̍k-thé ê su-io̍k, khi phiâu, tó͘, ím, lâi hāi in ê sin-thé kap lêng-hûn, si̍t-chāi chin khó-sioh. Téng-kù Chú Iâ-so͘ só͘ kóng ê oē, sī pau-hâm lêng ê oa̍h-miā, in-uī tē-it ê A-tong, jîn-luī ê sí-chó͘ hoān-choē sit-lo̍h Siōng-tè só͘ sù ê lêng-miā, nā-sī tē-jī ê A-tong, Iâ-so͘ Ki-tok tuì sí koh-oa̍h lâi ho̍k-tò i, beh hō͘ lán sìn-khò I, tiàm tī I lâi tit-tio̍h lêng-miā, hō͘ lán oa̍h teh ū ǹg-bāng, ū pêng-an kap hoaⁿ-hí, lâng nā tit-tio̍h chit ê lêng-miā, oē-thang sêng-siū éng-oa̍h, hit ê kè-ta̍t sī iâⁿ-koè choân sè-kài. Pêng-iú! Lí ū hoaⁿ-hí tiàm tī Ki-tok lâi chiap-siū I ê oa̍h-miā bô?
(3) Lâng ê kè-ta̍t sī chāi-tī chhim-bat Siōng-tè. Ko͘-chá ū chi̍t ê Hi-pek-lâi ê ông, i ê miâ kiò-choè Só͘-lô-bûn, lūn i ê êng-hoâ hù-kuì kap tì-huī, sī bô lâng oē ta̍t-tio̍h i, i kàu nî-lâu ê sî, ū siá chi̍t pún chheh kiò-choè Thoân-tō-su, i kám-thàn jîn-seng kóng, "Bān-sū lóng sī hi-khang! Lâng tī ji̍t-kng ê ē-bīn it-chhè só͘ lô-le̍k ê, sī chhin-chhiūⁿ sa-iáⁿ lia̍h-hong. Lâng ê kè-ta̍t sui-jiân sī án-ni, I koh kóng, nā-sī lâng oē-hiáu-tit thàn i siàu-liân ê ji̍t lâi kì-liām chhòng-chō i ê Chú, lâi kèng-uì I, án-ni chiū ū kè-ta̍t. Pêng-iú! Lí ū hoaⁿ-hí jīn-bat chhòng-chō lí ê Chú lâi kèng-uì I á-bô? Só͘-lô-bûn ông ê lāu-pē Tāi-pi̍t ông, iā bat chò si kóng, Lâng sī cháiⁿ-iūⁿ ê pi-bî, i kóng, "Lâng chhin-chhiūⁿ pûn chi̍t ê khuì, i ê ji̍t chhin-chhiūⁿ iáⁿ (Si-phian 144:4).
Lâng lóng sī hu-ké, pí khong-khì khah khin (S. 62:9). Lâng ê ji̍t-chí chhin-chhiūⁿ chi̍t-pa-chiúⁿ (S. 39:5). Sui-jiân sī án-ni, i koh kóng, Goá ê ǹg-bāng sī chāi-tī lí (S. 39:7). án-ni hō͘ lán thang chai lâng ê kè-ta̍t sī chāi-tī i jīn-bat ka-kī tī Siōng-tè ê bīn-chêng sī cháiⁿ-iūⁿ ê pi-bî, pāi-hoāi, tông-sî oē-hiáu-tit jīn-bat Siōng-tè lâi ǹg-bāng oá-khò I, koh lán nā chhim-chai jīn-bat Siōng-tè, I beh hō͘ lán chai-iáⁿ I cháiⁿ-iūⁿ koan-sim thiàⁿ lán sè-kan lâng. Tāi-pi̍t kóng, "Lâng sī sím-mi̍h, lí kèng-jiân bat i, siàu-liām i" (S. 144:3), koh kóng, "Lâng ê kiáⁿ sī sím-mi̍h, lí koàn-kò͘ i?" (S. 8:4).
Lán tī Siōng-tè ê bīn-chêng si̍t-chāi sī pi-bî, bô kè-ta̍t. Sui-jiân sī án-ni, iáu-kú Siōng-tè jīn-bat lán, siàu-liām lán, koàn-kò͘ lán, lí khoàⁿ Siōng-tè thiàⁿ lán kàu án-ni! Lí siūⁿ hit ê kè-ta̍t ū joā-toā ah! Iok-pek i bat kóng, "Lâng sī sím-mi̍h, tì-kàu lí lia̍h i choè toā, tì-kàu lí chiong i khoà tī sím-mi̍h (Ip. 7:17), án-ni lâng sui-jiân sī bî-soè, iáu-kú Siōng-tè lia̍h lán choè toā, khoà-sim tī lán. Lí khoàⁿ Siōng-tè chiong to̍k-seⁿ Kiáⁿ lán ê Chú Iâ-so͘ siúⁿ-sù lán, uī-tio̍h lán ê choē sí tī si̍p-jī-kè téng, lí siūⁿ Siōng-tè cháiⁿ-iūⁿ khoà-sim tī lán! Iok-pek koh kóng, "Sè-kan lâng sī sím-mi̍h, oē sǹg choè chheng-khì ah? Hū-jîn-lâng só͘ seⁿ ê sī sím-mi̍h, oē sǹg choè kong-gī mah?" (Ip. 15:14).
Lán m̄-nā sī pi-bî koh chài chhut-sì, chiū-sī ù-oè ê choē-jîn, sī put-gī ê lâng, chóng-sī Siōng-tè thiàⁿ lán, hō͘ lán sìn-khò Iâ-so͘, choē thang tit-tio̍h sià-bián, hō͘ lán tuì Chú Iâ-so͘ ê pó-huih, choē thang tit-tio̍h soé-chheng. Siōng-tè koh chheng lán chit ê choē-jîn choè-gī, hō͘ lán kap I koh hô, koh thang choè I ê kiáⁿ-jî, hō͘ lán m̄-bián tîm-lûn, oē-thang tit-tio̍h éng-oán oa̍h! Lí khoàⁿ Siōng-tè thiàⁿ lán kàu án-ni! Pêng-iú, lí siūⁿ án-ni lâng ê kè-ta̍t ū joā-toā ah! án-ni lâng ê kè-ta̍t sī chāi-tī chhim-chai jīn-bat Siōng-tè lâi sìn-khò I.
