Sin-nî kàu, lâng-lâng kóng kiong-hí. Ná chhin-chhiūⁿ kū-nî thàn-tio̍h chîⁿ, kin-nî hó kè ji̍t teh kiong-hí, ná chhin-chhiūⁿ ke chia̍h chi̍t hè, koh ū suí-saⁿ thang chhēng teh kiong-hí. Chóng-sī chāi tī Ki-tok-tô͘ sin-nî kiong-hí m̄-sī kun-kù tī chiah-ê. Ki-tok-tô͘ tī sin-nî kóng kiong-hí sī tio̍h kun-kù tī sìn-gióng kap ǹg-bāng.
Kū-nî kè liáu, sin-nî kàu, ta̍k lâng lóng teh kóng kiong-hí.Tàu-tí sī teh kiong-hí sím-mi̍h?Tuì tē-kiû ê ūn-hêng lâi khoàⁿ, put kò sī i beh koh chiàu kū-sî ê lō͘-chām têng-chài chhut-hoat lâi se̍h thài-iông nā-tiāⁿ, kiám m̄-sī?“Ji̍t chhut, ji̍t lo̍h, kín-kín cháu tò-tńg i só͘ chhut-lâi ê só͘-chāi, hong chhe ǹg lâm, koh tò-tńg ǹg pak, tńg-se̍h bô soah, iā tò-tǹg tī i tńg-seh ê khoâⁿ” ( Thoân 1:5,6).Chhin-chhiūⁿ án-ni sī kū ê hoán-hok nā-tiāⁿ, m̄-sī sin ê chìn-tián; siōng-chhiáⁿ toē-kiû ná kūn tī bia̍t-bô ê ji̍t, thái ū kiong-hín, thái ū ǹg-bāng?
Kho-ha̍k-chiá, gē-su̍t-ka, chong-kàu-ka, tō-tek-ka sū-si̍t lóng gia̍h lí-sióng ê kî ǹg bī-lâi teh chìn, chóng-sī tàu-tí ū ǹg-bāng á-bô? Lán ba̍k-chiu ha̍p oá khuì tn̄g ê sî, kho-ha̍k oē thang tuì lán kòng-hiàn sím-mi̍h? Tī siong-tuì-tek ê sî-kan tiong, tī iú-hān ê tē-kiû téng, put-kò kuí cha̍p nî ê jîn-seng, thái ū sím-mi̍h ǹg-bāng? Hoán-tńg sī choa̍t-bāng nā-tiāⁿ.
Tī chit khoán sū-chêng tiong, chhiáⁿ lán thiaⁿ choa̍t-tuì éng-oán ê sè-kài lâi ê siaⁿ. Iâ-so͘ kā in kóng, “Koh-oa̍h kap oa̍h-miā sī chāi-tī goá; sìn goá ê lâng sui-bóng sí, iáu-kú beh oa̍h; kìⁿ-nā oa̍h lâi sìn goá ê lâng éng-éng boē sí. Lí sìn chit ê mah?”(Iok 11:26) Lán ê Chú chiū-sī koh-oa̍h kap oa̍h-miā ê Chú, I iau-kiû lán sìn-gióng, sìn-gióng chiah oē hō͘ lán tuì kū ê seng-oa̍h chō chin bêng ê kài-hān-soàⁿ. Choa̍t-bāng pìⁿ-choè ū ǹg-bāng sī tuì sìn koh-oa̍h kap oa̍h-miā ê Chú. Pó-lô kóng, “iā oá-khòi, tuì sìn lâi ji̍p tī hiān-kim só͘ toà ê un-tián…..”(Lô-má 5:2). Tuì sìn lán í-keng m̄-sī kū ê lâng lah! Tuì sìn lán í-keng sī sin ê lâng, ū hoaⁿ-hí kap ǹg-bāng moá-moá ê lâng lah! “…..hiān-kim lán choè Siōng-tè ê kiáⁿ; chiong-lâi cháiⁿ-iūⁿ, iáu-bē hián-bêng. Lán chai I nā hián-bêng, lán chiū chhin-chhiūⁿ i…..”(Iok-hān 3:2) Tuì chit khoán “hiān-kim” ê khak-sìn, tiāⁿ-tio̍h ū “Chiong-lâi” hit khoán ê sū. Só͘-í nā bô ū sìn-gióng chiū bô ū chin ê ǹg-bāng.
Lán ê sìn-gióng seng-oa̍h tī ū choē ê khoân-kéng tiong iā chin khoài hām-lo̍h tī choa̍t-bāng kap o͘-àm tiong. Ka-têng ū sî oē hoat-seng khùn-lân ê sū-chêng; kiám-chhài ka-kī phoà-pīⁿ tîm-tāng, tó-chhn̂g; ū sî kap lâng hoat-seng bô sim-sek ê būn-tê; hit sî oē giâu-gî Siōng-tè, bô léng bô jia̍t ê sìn-gióng seng-oa̍h ná siong-tiōng, choè-āu o͘-àm. Tio̍h oē kì-tit lán ê Chú kóng, “Tī sè-kan lín ū khó͘-lān; to̍k-to̍k lín thang pàng-sim; goá í-keng khah-iâⁿ sè-kan”(Iok-hān 16:33) Hō͘ lán ū sèng-lī ê khak-sìn ê chiū-sī sìn-gióng kap tuì hia lâi ê ǹg-bāng.
Kin-nî beh pìⁿ choè sím-mi̍h nî, lán m̄-chai. Goān Chú chiok-hok lán ngiâ-chih sin ê nî; hō͘ lán ū sìn kap ǹg-bāng, tuì chia siⁿ-chhut chek-jīm, hoaⁿ-hí kap sèng-kiat, êng-iāu thang kui tī Siōng-tè. À-bēng
