Chàn-bí Chú koh-oa̍h ê Si

(Iok-hān 11:25, 26)

1956.04 tē 808 hō p.25

(Chiu Thian-lâi chok)

1. Ha-le-lu-iah! Chú ū koh-oa̍h!

Goá sim hoaⁿ-hí, o-ló bô soah;

Chín-kiù choē-jîn, kong-lô choè chiâⁿ,

Chheng-ho͘ goá Chú, chì-sèng ê miâ:

Sìn-khò Kiù-chú, sià goá choē-ok,

Chheng goá choè gī, thang ji̍p thian-kok,

Kám-siā Siōng-tè, chì toā un-tián,

Pe̍h-pe̍h siúⁿ-sù, lóng bô iân-chhiân.

2. Ha-le-lu-iah! Chú ū koh-oa̍h!

Goá sim hoaⁿ-hí, o-ló bô soah;

Jîn-seng o͘-àm, chhiⁿ-chhìn ê lō͘,

Choè goá tâng-phoāⁿ, sī Chú, Iâ-so͘;

Goá choè lâng-kheh, keng-kè khòng-iá,

Chú nā ín-chhoā, choè goá bo̍k-chiá;

Chhiⁿ-chhuì chháu-po͘, thián-khui gán-chiân,

Chhun-thiⁿ kong-kéng, chiū beh chhut-hiān.

3. Ha-le-lu-iah! Chú ū koh-oa̍h!

Goá sim hoaⁿ-hí, o-ló bô soah;

Chí-ū tio̍h sìn, bo̍h-tit kiaⁿ-hiâⁿ,

Thiaⁿ Chú bēng-lēng, tè Chú lâi kiâⁿ:

Khún-kiû Sèng Sîn, tiàm goá sim-lāi,

Kám-hoà goá sim, ài Chú só͘ ài;

Kun-tè goá Chú, éng-oán bô lī,

Bô-lūn ta̍k uī, goá lóng beh khì.

4. Ha-le-lu-iah! Chú ū koh-oa̍h!

Goá sim hoaⁿ-hí, o-ló bô soah;

Taⁿ tio̍h pò-iông, Chú ê kiù-un,

ín-chhoā choē-jîn, kap Chú chhin-kūn:

Goá goān kap Chú, tâng sí, tâng oa̍h!

Kiàn-tì sèng-hoē, thian-kok kóng-khoah;

Chīn chi̍t-sì-lâng, choè Chú ha̍k-seng,

Ho̍k-sāi goá Chú, éng-oán bô thêng.

（A-men.）

Hū-kì:-Chit siú sī uī-tio̍h Koh-oa̍h-choeh lâi choè--ê. Chóng-sī put-koán sî lóng thang gîm, in-uī ū pau-hâm Ki-tok-kàu ê iàu-lí kap kun-pún ê hok-im, koh ū biô-siá koh-oa̍h ê Chú kap kò-jîn ê koan-hē, í-ki̍p sìn-gióng seng-oa̍h ê lí-sióng tī-teh. Hi-bōng kàu-kài Sèng-si chok-khek-chiá lâi hù-khek; beh choè to̍k-chhiùⁿ-khek, á-sī ha̍p-chhiùⁿ-khek lóng hó, só͘ choè ê khek, soà ìn tī thêng-siá-pán, pun hō͘ kàu-hoē ê Sèng-koa-tuī ián-chhiùⁿ ê sî, chiah soà kià chi̍t-pō͘ lâi hō͘ goá. Sin-khek iáu-bē chhut-sì ê í-chêng, thang lîm-sî ēng Sèng-si 274 siú ê tiāu lâi tāi-thoè. （屏東市上海路參拾號　周天來）