論奠基典禮抑是奠杵式
(蔡長義)
奠基典禮就是奠杵式。 "式"是日本字眼，「典禮」是中國字眼;這咱攏無異義。總是因為有人掠做「破土」就是定基典禮，所以tī chia生起誤解。有人soah teh問看咱ê「典禮」tio̍h koh加添:破土典禮抑m̄免？所以我ài kap大家研究，到底是tio̍h， 抑是免。
照看「破土」 m̄是「奠基典禮。」Tī 新 ê台灣神學院兩項攏有舉行。請咱詳細看「典禮」52面"定杵式" ê像路尾括弧內兩choā ê文字--起工ê時若ài做起工式禮拜，thang用這個家己變通--Tuì án-ni來看，破土=起工式禮拜=起工典禮，破土m̄是奠基典禮。起工典禮m̄免koh加添一項目，若家己變通來用就好。
有人kiám-chhái beh講起工典禮(破土)就是奠基典禮;若是án-ni我ài請問起工典禮ê時kiám有人下杵式mah? (杵式有留一空， 下聖詩，聖經，抑是參加典禮ê人ê 簽名單， 抑是名單等)。起工典禮kiām m̄是kan-ta tī 平地用鋤頭掘空nā-tiāⁿ mah? 這般照看是tuì 這個誤解chiah生起風波。因為有人聽破土這句khah無慣勢，所以此後mài用這句，用開工 (起工)典禮就好。án-ni khah boē hō͘人跋倒。請大家也m̄-thang將定基典禮kap 開工典禮兩項拍相chham (混同)，致到掠giâ鋤頭掘地做奠基典禮，án-ni 拍算是誤解。
Taⁿ我已經tuì 法規委員會編輯典禮ê立場來闡明看到底tio̍h koh加添破土 ê典禮抑是m̄免。向望咱會理解「典禮」ê內面m̄免koh加添類同 (類同) ê典禮;也向望這個辯論，質問m̄免koh生起。 |
