CHA̍P-LIO̍K:Bô thang pí ê hó pêng-iú
(Iok-hān 15:13).
1956.08 tē 812 hō p.25-26
(Chiu Thian-lâi e̍k)
1. Lán tāi-kē m̄-sī bô pêng-iú;
Thang saⁿ-kap kau-poê khoài-lo̍k;
Bô thang pí ê chì-hó pêng-iú,
Chí-ū Chú Iâ-so͘ Ki-tok;
Sui sī tông-pau kut-jio̍k ê chhin,
iā m̄-ta̍t Siōng-tè Sèng Kiáⁿ;
Sim-mi̍h lâng bat uī goá choē-jîn,
Lâi pàng-sak i ê sìⁿ-miā?
2. Tiàm sè-kan sī choē-jîn pêng-iú,
Hoaⁿ-hí hō͘ in lâi chhin-kūn;
Chiūⁿ-thiⁿ liáu-āu iû-goân chi̍t-iūⁿ
Sī êng-kng ê toā Jîn-kun;
Goá sī pi-bî ù-oè ê lâng,
Chú pó-huih soé-chheng choē-ok;
Si-un tháu-pàng, sù goá ǹg-bāng,
Thang sêng-chiap Siōng-tè ê kok.
3. Sui-jiân sêng-siū Chú ê kiù-un,
Sim boē hiáu-ngō͘ Chú ê thiàⁿ;
Lī-khui chiàⁿ-lō͘, sim-ba̍k hūn-tūn,
Bô êng-kng Chú ê sèng miâ;
Chhin-chhiūⁿ án-ni, oai-chhoa̍h Ńg-chiáⁿ,
Chú iáu-kú lîn-bín, hû-chhî;
Eńg-oán bô piàn, chiâu-chn̂g ê thiàⁿ,
Chì-hó pêng-iú chiū-sī Lí!
A-men.
Hū-kì:- Chhut-miâ ê Sèng-si chok-chiá John Newton (1725-1807) Bo̍k-su só͘ chò ê. Chheng siàu-liân ê hiaⁿ-ché nā ài gîm chit siú si, ún-tàng ē tit-tio̍h lêng-sèng-siōng hó ê chō-chiū. Koh chi̍t pài hoàn-khí in ê sìn-gióng, kap Ki-tok ū chhin-bi̍t ê lêng-kau, chiah ē thang tit-tio̍h sìn-gióng tông-chì ê hó pêng-iú lâi saⁿ-kap ho̍k-sāi Ki-tok, koh ē thang kiò-chhíⁿ hiah ê bô sìn-gióng ê tâng-phoāⁿ lâi hoán-hoé sìn Iâ-so͘!
Chhiáⁿ ēng Ji̍t-pún ê Chàn-bí-koa 343 siú (1931-1954 nî pán) ê tiāu lâi gîm.
