首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 三句「sek材」
三句「sek材」
卷期：第817號 本次： 日期：1957/1 刊名：台灣教會公報 頁數：5
篇名：三句「sek材」 [ Saⁿ Kù"Sek-chhâi" ]
作者：黃武東 N̂g Bú-tong
  顯示 : 漢羅 全羅 並列  

三句「識才」
1957.01 第817號 p.5-7
(發行人：黃武東)
起筆愛共逐家恭喜。咱的公報照看佇東南亞的教會機關報紙的中間是第一早--的。感謝主，予咱閣迎接新的年。願逐家今年加倍愛顧，也求主賜福本報。予伊閣較gâu發揮伊傳福音救人的使命。
關係教會teh揀人當職的事，前本人捌佇本報發表一篇論，講起三个原則，就是講：-會做，欲做，予伊做（能為，肯為，任為）。咱欲揀人來當教會的公職，著看伊，會做--袂？欲做--毋？若會做，閣肯欲做，按呢才通予伊做。雖然會做，若毋願做，結局「押雞毋成孵。」雖然真愛做，若袂做，也是害。若會做，閣欲做，咱若毋予伊做，就「活馬縛踮死樹頭，」真拍損。所以這三个原則照我想攏袂拆離得。
今本人閣想著三句話，愛寫佇遮，求逐家的雅正。
咱的總會常置委員會已經有決定欲設置總會事務所佇台北市內。最近得著加拿大教士會的好意，將中山北路的宣教師宿舍一座樓欲借總會做臨時事務所，就是現時明牧師的宿舍的對面座。
預定今年二月中 (大約12─15) 欲開第四屆總會，向望同時會通紲開用同會單位組織的總會。既然這个總會成立。就在來佇南北兩大會的政治力量佮行政資源攏歸屬佇這个總會。為著欲運用遮的職責，總委決定至少著有以下這幾位的專任幹事。就是一个傳道幹事，設法傳道局的事；一个傳道教士，來設法山地佮其餘宣道會的事；一个青年佮教育的幹事，來設法T. K. C. 佮S. S. 的事；也一名財務幹事，來設法一切的財政，也著一名女宣道會的幹事，設法女宣道會的工，閣著一位公報專任的主筆。以外也著有一名總幹事，通幫贊議長服務全盤的的工課。以上遮的人才是總會成立後所著欠用的工人。第三屆的總會有交帶設計委員會人選提名來赴次屆總會認命。設計委員會為著愛慎重佮愛對全体的教會中來追求人才的起見，已經有發批予 8 中會佮有關機關，請in 推荐。
今各位讀者！「予伊大欉的上帝」猶過栽樹沃水的是人。起厝；起好、起歹、用柴、用草，用金銀的攏是人。事業欲成，欲敗，在佇「得其人，抑是不得其人」。咱的總會此去的運營也是按呢。所以咱著求上帝指示咱，親像早年佇伯利恆指示撒母耳一樣，知影通揀合用的人大衛。
本人佇遮講三句「sek材」做參考。
頭一句「sek材」就是識材，會認識材料。文王會曉去渭水揣子牙，劉備三顧草廬請諸葛。這攏是捌人才的人。有時佇對敵的中間也會通揣著好人才。齊桓公得著管仲，就是按呢。各位咱台灣教會毋是無人才，有時是因為咱毋-捌，致到「明珠闇投」。今咱欲按怎才會捌人？就是著咱的主指示，親像撒母耳起頭毋-捌，險險講毋著。佳哉主的神指示。所以咱著謙卑，拍死自我，求主指示。
2. 第二句的「sek材」就是適材，用拄好的材料。親像咱講：「適材適所」。人人有伊的特長佮使命。合用就好用，毋通亂用。剃頭刀卻會切菜得，無采。菜刀卻會剉柴得，拍損！平平是人，總有伊的用路。若合用，伊好咱也好，若無合用，就伊倒咱也倒。
3. 第三句「sek材」是惜材，就是保惜人才。較好的人才都著保惜。本人學生時代，捌聽著教會中兩句話。一句「打擂台，」人若peh上擂台，就共打--落來。意思就是若佇教會中有一个較出腳--的，就會齊共揠--落來。閣一句話，就是「豬牢hia̍t」豬牢內無大隻豬，因為一隻大隻，一隻掠去刣。
照看這兩句話是當時的教界的諷刺言詞。教界的風氣若果然變到按呢，是真不幸。
各位讀者，咱著求主憐憫咱的教會。逐家gâu保惜人才。欲打倒一个人是快快，欲養成一个人才是無容易。咱若無相保惜，結局是害家己。
感謝主，近來主有將好的人才，漸漸teh賞賜咱，也佇歐美teh共咱鬥養成通做將來好的人才。咱若會保惜，就教會前途有光明。
以上佇這个年頭，特別佇總會要求人才的這霎，排列這三句做各位的參考。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461