首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 信仰偉人戴華舜牧師
信仰偉人戴華舜牧師
卷期：第817號 本次： 日期：1957/1 刊名：台灣教會公報 頁數：20
篇名：信仰偉人戴華舜牧師 [ Sìn-gióng uí-jîn Tè Hoa-sùn Bo̍k-su ]
作者：許水露 Khó͘ Chuí-lō͘
  顯示 : 漢羅 全羅 並列  

信仰偉人戴華舜牧師
1957.01 817號 p.20-21
James Hudson Taylor (A. D. 1832 - 1905).
(許水露).
[編者註：戴華舜牧師就是內地會的創設者。較常是稱呼做戴德生牧師。許牧師另外用戴華舜的名，但是人是siāng一个，佇遮閣加紹介伊的小傳，穩當會通加添對戴牧師佮內地會的認捌，siâng時會通得著靈性上的鼓勵。]
聖保羅講：「上帝用阮勸恁；阮為著基督求恁佮上帝閣和」 (II 哥 5:21)。閣講：「阮一概無窒礙--人，免得這个職份犯嫌；就是凡事証明本身合佇做上帝的差用，是佇濟濟吞忍、患難、欠缺、困迫、受拍.....、擾亂，著磨，無睏，無食....」 (II 哥 6:3-10)。受稱呼做信仰偉人，不屈的使徒戴華舜牧師拄拄親像頂面所記，聖保羅先生對哥林多教會所講--的。戴牧師的一生真受苦，總--是對伊熱烈的信仰，不屈的精神來克服一切的困難，到尾成做中國內地傳道協會的創設者，伊的一生，通分做下面幾項：-
1. 對出世到重頭生(重生) (1832-1849)。
1) 伊的出世：A. D. 1832年5月21日，出世佇英國的Iok-kù-sià的Bān-su-lé。伊的老父起初開藥店，後--來有做一个有力的傳教師。伊的老母是牧師的查某囝。
伊的少年時代：起初伊有懷疑的思想。伊的老母為著伊心真艱苦，常常為伊迫切祈禱。到15歲，有去蹛銀行做銀行員。
3) 伊的重頭生：有一日伊的老母為著伊入一間房，用鎖匙鎖牢--leh，迫切為著伊的囝戴華舜禁食祈禱。拄拄彼時，伊想愛欲讀冊；就去伊的老父的冊櫥提一本《得完成基督的事業》的細本冊來讀。Teh讀的中間，心內生起自覺罪的念頭，感覺得著得救的必要性；就即時深信佇十字架頂完成的贖罪。伊就跪落懺悔認罪。隨時得著重頭生。彼時拄拄伊的老母為著伊迫切祈禱勝利的時。彼時伊17歲。祈禱的效力實在真大--ah！！
2. 對立志到來佇中國傳道。(A. D. 1850-1865).
1) 伊立志準備：伊對重頭生了，就覺得著去中國傳教。對彼時起，伊就直直準備。伊有一日，共 牧師借一本關係中國的文獻的冊來讀。牧師共伊講無辦法通去中國傳道，總--是伊攏無失志，只有日夜迫切祈禱，萬事交託上帝。
2) 伊為著準備，就去讀Halu的醫學校。畢業了，去病院奉職，一面奉職，一面學習欲去中國傳教，學困苦的生活。逐日儉省，逐早起學食糜，逐暗學食飯，中晝頓食一粒蘋果，將伊所收入的錢儉三分二欲做傳教的路用。伊無愛食牛乳(milk) 佮黃油 (Butter)這款奢侈品。
3) 伊幫贊散hiong人：伊毋是只有用嘴講，伊有確實勵行基督的教示。伊有一日去探訪一間貧民的家庭，看著一个老母真媠，手--裡抱一个紅嬰仔，無乳通予伊食，極散hiong，到欲餓死的款，伊就欲對袋仔內提出伊所有的錢，來幫贊這个婦人人。
4) 得著上帝的幫贊：隔日伊無物 通食，忽然提郵便的人，提一張批予--伊，內面下一張銀單寫半英磅的錢欲送--伊。彼張批講昨日12點鐘久的出書，趁 400 倍，一屑仔做感謝的意思。愛幫贊人--的，會得著上帝的幫贊。
5) 去死回生：伊佇病院teh勤務的時，有一日teh死體解剖的時，無細膩，染著毒，險險死，迫切禁食祈禱，後來閣得著活。伊深信這个就是上帝愛伊去中國傳道的信任狀。
6) 伊出發來中國傳教：伊佇A. D. 1853年，伊對Lī-pa-lu (Riverpool 利物浦) 坐船經過六個月久才到上海。當時佇上海有排外運動，teh排斥外國人。伊忍受百般的艱苦。
(1)伊佮中國人做伙蹛。(2)伊食中國食。(3)穿長衫疊馬褂，戴碗帽。(4)伊留頭毛pīⁿ毛尾。拄拄親像中國人。親像保羅講，我向逐樣人，成做逐樣款，一概是欲救人。
7) 後來伊去中國的內地傳教。
伊tú著： (1)賊馬的危險。(2) 同族的危險 (外國領事叫伊去罰金，講伊去區域外傳道，bē用--tit。(3)刺中的危險。予人放火燒厝，物件燒了了。
8) 伊的結婚佮歸國：伊佮同勞者Tāi-a姑娘結婚 (Miss Laiyer)。後--來為著身體欠安，閣倒來英國。
3. 對創設中國傳道協會到別世 (A. D. 1866-1905).
1) 伊佇英國報告傳教的好消息，佮籌備創設中國協會。
2) 後來得著15名同志，佮濟濟錢，就佇A. D. 1866年5月，閣去中國的內地來創設中國傳道協會，佮極力傳教。起初chhoā 15 名同志傳教師到中國內地傳教，到尾變做歸千名單位的宣教團體。
3) 對一个無驚羅馬教王的馬丁路德(Martin Luther) 來成就宗教改革。對一个阻止法蘭西革命的衛斯理(John Wesley)來教化全英國。對一个毋驚苦難的戴華舜 (James Hudson Taylor) 來傳到中國全地。
4) 伊tú著真大的逆境：伊佇中國內地傳教的時：(1) Tú著3个囝攏死佇中國。(2)所疼的牧師娘也染著熱病死。(3)濟濟物予人搶--去。(4)受人窘逐。(5) 總是伊攏無失志，只有信仰，用祈禱，用忍耐來克服一切的困難，來創設中國傳道協會。
5) 伊盡忠到死 (A. D. 1905)。
伊克服一切的患難，成做一个大傳教師，大指導者。佇1887年，捌佇一年的中間要求100个新的宣教師來幫忙傳教。佇宣教師上真罕有的大事業。到佇1905年6月3日，最後講：「最偉大--的，只有上帝，咱著十二分的心來信靠上帝」，講煞伊的靈魂永歸上帝，伊的遺體埋葬佇中國的內地，享壽73歲。到佇A. D. 1926年的統計。戴牧師所創設的中國傳道協會: (1)宣教師1234名。(2)中國籍的傳教師 3944名。(3)信徒數67500名。佮台灣長老教會的信徒數差不多濟。通知伊的信仰真好。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461