CHÚ-JIT7-O̍H:Iâ-so͘ lâi-le̍k-koa

1957.02 tē 818 hō p.25

(Toh Hêng-lī chò).

1. Tī kó͘-chá N̂g chheng nî,

Chin-chiàⁿ toā kî-īⁿ;

Thiⁿ-téng ū chhut toā-lia̍p chhiⁿ,

Hoat-chhut toā kng chiò àm-mî.

2. Tī tang-hng sam phok-sū,

Khoàⁿ che choè pîn-kù;

Ti̍t-ti̍t kiâⁿ kàu Iû-thài toē,

Sì-kè mn̄g lâng ti̍t-ti̍t chhoē.

3. Sam phok-sū lóng choè-tīn,

Chhē Chú chin in-khîn;

Sì-kè kiû lâng kā i kóng,

Iû-thià chhut-sì ê sin Ông.

4. Chú chhut-sì, chhiⁿ chhut-hiān,

Goán chhē lóng boē siān;

Goán khoàⁿ thiⁿ chhiⁿ ti̍t-ti̍t lâi,

Choan-sim lâi chia beh kèng-pài.

5. Iû-thài kok Hi-lu̍t ông,

Si̍t-chāi chin chhiⁿ-kông;

Thiaⁿ-kìⁿ chit hō ê hong-siaⁿ,

Sim-koaⁿ jû-loān toā chhiⁿ-kiaⁿ.

6. Keng-ha̍k-sū, chè-si-thâu,

Bēng-lēng lóng chiâu-kàu;

Chiū mn̄g Ki-tok ê chhut-sì,

Kū-iok Sèng-keng cháiⁿ-iūⁿ kì.

7. Iû-thài toē Pek-lī-hêng,

Sèng-keng kì chin bêng;

Chiū-sī Sian-ti Í-sài-a,

Chhit chiuⁿ só͘ kì bô cheng-chha.

8. Tuì án-ni Hi-lut2 ông,

Chiū tuì phok-sū kóng;

Chhiáⁿ lín kín khì Pek-lī-hêng,

Tiau-cha sin ông chhē kàu sêng.

9. Nā chhē--tio̍h koáⁿ-kín lâi;

Siông-sè pò goá chāi;

Chai-iáⁿ eⁿ-á tiàm tó-uī,

Hō͘ goá iā thang khì pài-kuī.

10. Sam phok-sū thiaⁿ ông oē,

Khí-sin chiū koh chhē;

Thiⁿ-chhiⁿ choè thâu chhoā in khì,

Chhoā kàu bé-tiâu lâi chí-sī.

11. Sam phok-sū chiū ji̍p-chhù,

Khoàⁿ-kìⁿ ū pîn-kù;

Suî-sî kuī-lo̍h pài Eng-jî,

Kám-siā Siōng-tè sù Hok-khì.

12. Khui pó-a̍p hiàn lé-mi̍h,

Kuī-lo̍h lâi tiâu-kìⁿ;

Jú-hiuⁿ n̂g-kim kap bu̍t-io̍h,

Sêng-sim hōng-hiàn bô thiàⁿ-sioh.

13. Bîn-bāng tiong Chú chí-sī,

Kah in m̄ thang khì;

In-uī Hi-lut3 beh hāi I,

Beh hāi eⁿ-á hō͘ I sí.

14. Kiò phok-sū tio̍h oan-lō͘,

M̄-thang chiūⁿ kè-bô͘,

Phok-sū oan-lō͘ kín-kín cháu,

Bô kìⁿ Hi-lu̍t ông in tau.

15. Tò-khì liáu Chú thiⁿ-sài,

Chhut-siaⁿ koh-chài lâi;

Thok-bāng Iok-sek chhoā bú-kiáⁿ,

Cháu khì Ai-ki̍p tô sìⁿ-miā.

16. Hi-lu̍t ông teh thèng-hāu,

Hoê-hok lóng bô kàu;

Chai-iáⁿ phok-sū lâi phiàn i,

Sim-koaⁿ m̄-goān toā siū-khì.

17. M̄ kam-goān, chhut bēng-lēng,

Kè-bô͘ ài ta̍t-sêng;

Nn̄g-hoè í-hā ê eng-jî;

It-chīn ēng to lóng thâi sí.

18. Tī hit-sî choân kok-lāi ,

Chhiⁿ-chhám toā pi-ai;

Chē-chē lāu-bú sòng-sit kiáⁿ,

Pi-siong thî-khàu toā chhut-siaⁿ.