HÁI-GOĀ THONG-SÌN
Eng-kok ê ìn-siōng
(1966 : 2. 15 tī Eng-kok N̂g Se-hiong kèng-siá)
1957.04 tē 820 hō p.16-17
Pún-phiⁿ pit-chiá sī Chóng-kàn-sū Bo̍k-su ê lēng-oān. I ū ko-tō͘ ê phoe-phoàⁿ-le̍k kap chèng-khak ê koan-chhat, só͘ siāu-kài chit phiⁿ ìn-siōng-kì ún-tàng beh in-khí lán chin hó ê hèng-chhù koh ke-thiⁿ lán ê kiàn-sek.
Tī kū-nî 11 goe̍h ê Kàu-hoē Kong-pò, ū tha̍k tio̍h Bí Bo̍k-su chit pang tńg-khí Tâi-oân liáu só͘ siá Eng-kok lâng tuì Eng-kok ê ìn-siōng, tha̍k liáu kám-kak chin chhù-bī. Taⁿ chit-tia̍p goá èng chú-pit ê hó-ì ài chò Tâi-oân lâng (á-sī goā-kok lâng) ê li̍p-tiûⁿ, lâi siá tām-po̍h goá tuì Eng-kok ê ìn-siōng.
Goá tī 1955 nî 8 goe̍h 1 hō, chiūⁿ-lio̍k Lûn-tun kàu-taⁿ, í-keng tī Eng-kok ngiâ-chih nn̄g pái ê Kiù-chú-tàn, kap hoan-gêng nn̄g ê sin-nî lah. Chit tiong-kan siū Siōng-chú ê si-un thiàⁿ-thàng kap Bó-hoē ê koan-sim chiàu-kò͘, í-ki̍p tī kò͘-hiong só͘ siàu- liām lia̍t-uī hiaⁿ-tī chí-moē ê kó͘-lē kap tāi-tó, hō͘ goá sui-jiân lī-khui Tâi-oân hn̄g-hn̄g, iáu-kú oē thang tī chia pêng-an keng-koè sūn-sū kè-sio̍k goá ê ha̍k-gia̍p, goá tāi-seng bē kìm-tit ài siá kuí kù kā lia̍t uī chhéng-an kap seh-siā.
Goá iā ū tit-tio̍h chin hó ê kî-hoē, tī hioh-khùn tiong, khì hóng-būn hiah ê í-chêng bat tī Tâi-oân chò kang ê soan-kàu-su, chiū-sī: Lân I-seng, I-seng niû, Bān Hāu-tiúⁿ, Hāu-tiúⁿ niû, (Liân Ngá-lē Ko͘-niû), Muî Bo̍k-su niû, Sòng Bo̍k-su niû, Hi Bo̍k-su, Bo̍k-su niû, Bûn I-seng, I-seng niû, oē Sian-siⁿ, Kap Lú-o̍h ê Gô͘ Le̍k-chì Hāu-tiúⁿ téng. In sui-jiân boē thang koh tńg-khì Tâi-oân chò kang, iáu-kú in ê sim mî-jit5 teh siàu-liām Tâi-oân, iā ài goá nā ū ki-hoē tek-khak tio̍h thè in kā in tī Tâi-oân ê "pêng-iú" chhéng-an!
Taⁿ goá ài chiong goá tuì Eng-kok ê ìn-siōng kán-tan hun chò saⁿ pō͘-hūn lâi tâm:
1) Kàu-hoē hong-bīn.
2) Kàu-io̍k hong-bīn.
3) Siā-hoē hong-bīn.
1) Kàu-hoē hong-bīn.
Tī Tâi-oân lán Tiúⁿ-ló Kàu-hoē ê hoat-tián thang kóng si̍t-chāi chin te̍k-chhut, iā pêng-sò͘ lán só͘ chheng ‘Kàu-hoē' ê bêng-sû iā chin tan-sûn, siông-siông chí-ū hān tī "Tiuⁿ-ló Kàu-hoē" nā-tiāⁿ. Chóng-sī tī Eng-kok á-sī goā-kok chiū bô hiah-nih kán-tan. Lán ê Bó-hoē tī Eng-kok chí-ū 350 keng ê kàu-hoē kap oá 7 bān ê sìn-tô͘, che pí-kàu tio̍h Sèng Kong-hoē (Eng-kok Kok-kàu) ū chi̍t bān keng 教會; Cho͘-ha̍p kàu-hoē ū 22 bān ê sìn-tò͘, kap 3 chheng goā keng ê kau-hoē; á-sī Chìm-sìn-hoē ū 20 bān ê sìn-tô͘, kap 2 chheng goā keng ê kàu-hoē; thang kóng sī chi̍t ê chin sè ê kàu-phài. Chit khoán kàu-phài ho̍k-cha̍p ê thé-thóng, sǹg sī goá tuì Eng-kok kàu-hoē thâu chi̍t ê ìn-siōng.
Tē jī ê ìn-siōng chiū-sī kám-kak kàu-hoē chin lāu. Che kap lán Tâi-oân siàu-liân ê kàu-hoē ū sím-mi̍h koh-iūⁿ? Tuì chek-ke̍k hong-bīn lâi khoàⁿ, chhin-chhiūⁿ Sèng Kong-hoē chē-chē ê lé-pài-tn̂g lóng-sī tī tiong sè-kí só͘ kiàn-li̍p ê, chì chió iā ū 600-800 nî í-siōng ê le̍k-sú. Kî-thaⁿ Cho͘-ha̍p kàu-hoē, Chìm-sìn-hoē, Bí-bí-hoē, á-sī Tiúⁿ-ló-hoē iā lóng ū 200-400 nî ê thoân-thóng. Ta̍k kàu-phài ê chong-pài gî-sek lóng ū in thoân-thóng-tek ê chòng-giâm sèng, chit khoán ê hiān-siōng tī lán siàu-liân ê Tâi-oân kàu-hoē sī khah oh-tit khoàⁿ ê. Sìn-tô͘ tī chit ê khoan-kéng lāi tióng-sêng, chiū chū-jiân sêng-siū hē-thóng-tek ê sìn-gióng kap kàu-lí.
Chóng-sī tuì siau-ke̍k hong-bīn lâi khoàⁿ, kàu-hoē kì-jiân lāu, chiū bē bián-tit hām-lo̍h bô-léng bô-sio ê hiān-siōng, khiàm-khoeh siàu-liân lâng hit hō ê hoa̍t-phoat kap oa̍h-khì. Tû-khí sió-sò͘ jia̍t-sim ê sìn-tô͘ í-goā, toā to-sò͘ ê hoē-iú sui-jiân sêng-jīn ka-kī sī Ki-tok-tô͘, (in ê chong-kàu nā m̄-sī Thian-chú-kàu chiū lóng sī Ki-tok-kàu), iáu-kú in choân-jiân bô koan-sim tī kàu-hoē.
Sui-jiân sī án-ni, iáu-kú Eng-kok ê kàu-hoē tuì tē-jī chhù sè-kài tāi-chiàn í-lâi, te̍k-pia̍t tī chit kuí nî lāi, siū Phó͘-sè Ki-tok-kàu Liân-bêng( World Co͘ncil of Churches), á-sī ha̍k-seng Liân-bêng ūn-tōng (S. C. M.) ê éng-hióng, it-hoat hùn-khí choân-kok ê sìn-tô͘, chhiok-chìn kàu-phài ê ha̍p-it, ho̍k-heng kàu-hoē, hoàn-khí pêng sìn-tô͘ ê sù-bēng kám, thang ta̍t-tò soân-iông ho̍k-im tī choân-kok, í-ki̍p choân sè-kài ê bo̍k-phiau. (Thāi-sio̍k)
