Iâ-so͘ lâi-le̍k-koa

(Toh Hêng-lī chok)

Iâ-so͘ chiūⁿ Iâ-lō͘-sat-léng

(Lō͘-ka 2:41-52)

1957.04 tē 820 hō p.23

1. Chú Iâ-so͘ cha̍p-jī hoè,

Chiūⁿ tiān beh hù cheh,

Kap i pē-bú saⁿ-tâng kiâⁿ,

Peh chiūⁿ Iâ-lō͘-sat-léng siâⁿ.

2. Siú choeh-kî lóng bêng-pe̍k,

ài tńg Ná-sat-le̍k,

Iâ-so͘ iáu tī sèng-tiān lāi,

Pē-bú choân-jiân lóng m̄-chāi.

3. Khí-thâu kiâⁿ chin pêng-an,

Lia̍h chò tī tiong-kan,

Pē-bó an-sim ti̍t-ti̍t kiâⁿ,

Keng-kè chi̍t ji̍t chiah chai-iáⁿ.

4. Khoàⁿ bô kiáⁿ, kiâⁿ tò-tng8,

iân-lō͘ ti̍t-ti̍t mn̄g,

Saⁿ-ji̍t chhoē bô iáu m̄-chai,

āu-lâi khoàⁿ tī sèng-tiān lāi.

5. Kap sian-siⁿ teh tām-lūn,

Chhin-chhiūⁿ ū ha̍k-būn,

Si̍t-chāi gâu mn̄g koh gâu thiaⁿ,

Ta̍k lâng khoàⁿ liáu chin Tio̍h-kiaⁿ.

6. Só͘ ìn-tap chin hó thiaⁿ,

Kî-koài I chhang-miâ,

Ta̍k lâng khoàⁿ liáu chin gông-ngia̍h,

Tuì tī án-ni chhut miâ-siaⁿ.

7. Pē-bó kàu khoàⁿ-tio̍h kiáⁿ,

Sim-koaⁿ toā gông-ngia̍h,

Khui siaⁿ chiū kiò goá ê kiáⁿ,

Siáⁿ-sū hō͘ goán toā kiaⁿ-hiâⁿ.

8. Goán n̄g lâng chhē bô lí,

M̄-chai lí tò-khì,

Cháiⁿ-iūⁿ lī-khui goán sin-piⁿ,

Hō͘ goán chhē kàu án-ni-siⁿ.

9. Iâ-so͘ kóng, bián chhē goá ,

Goá kap Siōng-tè toà,

Chhiáⁿ lín pē-bú tio̍h ài chai,

Goá tiàm Pē chhù sī eng-kai.

10. In pē-bú boē bêng-pe̍k,

Sim-koaⁿ ū kám-kek,

Só͘ ìn ê oē chin kî-biāu,

Iâ-so͘ só͘ kóng khǹg tiâu-tiâu.

11. Chú Iâ-so͘ chiū peh-khí,

Kap in chiū saⁿ-sî,

Pē-bú bēng-lēng chin hoaⁿ-hí,

Suî-sî kap in chiū tńg-khì.

12. Chú Iâ-so͘ tiàm in chhù,

Sū-sū sūn pē-bú,

Put-lūn chho͘-iù toā sè-hāng,

Pang-chān pē-bú chò ba̍k-kang.