HÁI-GOĀ THONG-SÌN
Eng-kok ê ìn-siōng
(Chiap chêng goe̍h hō ê 17 bīn)
(1956 : 2. 15 tī Eng-kok N̂g Se-hiong kèng-siá)
1957.05 tē 821 hō p.14-15
Ū chi̍t hāng chin suí ê bô͘-iūⁿ hō͘ lán thang o̍h ê, chiū-sī in tuì kàu-hoē ê sù-bêng ê jīm-sek......"Thoân hok-im hō͘ bān peh-sèⁿ." Chha-put-to muí chi̍t kàu-phài lóng ū siat te̍k-pia̍t ê ha̍k-īⁿ, poê-iúⁿ Soan-kàu-su chhut-khì hái-goā thoân-tō. Hoē-iú iā lóng chin koan-sim, tāi-ke kam-sim lo̍k-ì chàn-chō͘ chit ê sū-gia̍p.
Tī kū-nî ê joa̍h-thiⁿ, tuì Tâi-oân lâi ê Tiuⁿ Tek-hiong, Sòng Choân-sēng kap goá pún-sin ū khì chham-ka choân kok tē-jī chhù ê Ki-tok-kàu Chheng-liân Tāi-hoē. Tû-khí Thian-chú-kàu í-goā, choân-kok ê kàu-hoē lóng ū phài tāi-piáu, iok-lio̍k 1000 miâ. Kàu-hoē hiàn-sim ê chheng-liân ēng "Kiōng-tông ê sìn-gióng kap kiōng-tông ê sù-bēng" chò phiau-gú, jia̍t-lia̍t kiám-thó kàu-hoē ê guî-ki kap chiong-lâi èng-kai ló͘-le̍k ê hong-chiam. Thang chai Eng-kok kàu-hoē sui-jiân sī lāu, iáu-kú i ê chiân-tô͘ iáu khó-koan.
2) Kàu-io̍k hong-bīn.
Goá hiān-chāi tī chia só͘ ha̍k-si̍p ê choan-kho sī kàu-io̍k, só͘-í goá tuì tī Eng-kok kàu-io̍k hong-bīn ê jīm-sek kiám-chhái ū pí pa̍t hong-bīn khah chheng-chhó.
Eng-kok ê kàu-io̍k chè-tō͘, goá tú-á lâi ê sî kám-kak chin hun-loān hok-cha̍p, kap lán Tiong-kok ê, á-sī Bí-kok ê kàu-io̍k chè-tō͘ oân-choân bô sio-siāng. Goân-lâi Eng-kok kàu-io̍k ê khí-goân pēng m̄-sī sió-o̍h, tiong-o̍h ê kiàn-li̍p, chiū-sī Gû-tin (Oxford 1168 A. D.) kap Kiàm-kiô (Cambridge 1209 A. D.) Tāi-ha̍k ê heng-khí. Kàu tī 1382 A. D. Bûn-chê-su-ta̍t (Winchester) ê chú-kàu chiah siat-li̍p thâu chi̍t keng ê Bûn-tián ha̍k-hāu (Grammar School), chiū-sī hiān-chāi ê tiong-téng ha̍k-hāu. Tong-sî siat-li̍p Bûn-tián ha̍k-hāu ê bo̍k-te̍k thang kóng chí-ū poê-iúⁿ ha̍k-seng cheng-thong Lia̍p-teng-bûn, (in-uī Lia̍p-teng Bûn sī tiong sè-kì ê ha̍k-su̍t giân-gú), thang seng-ji̍p tāi-ha̍k chhim-chō, chiâⁿ-chò ha̍k-su̍t choân-châi. Chóng-sī phó͘-ki̍p-tek ê kok-bîn kàu-io̍k ê thui-hêng sī kàu 500 nî āu, tī 1880 A.D. ê kàu-io̍k hoat-àn thong-koè liáu, Eng-kok ê kàu-io̍k-sú chiah tián-khui sin ê kí-goân, khak-li̍p sió-o̍h chò kok-ka kàu-io̍k chè-tō͘ ê ki-chhó͘. Í-āu koh keng-koè 70 nî kú ê hùn-tò͘ kap piàn-chhian, tī 1944 kái-hêng phó͘-ki̍p kàu-io̍k hān-tēng tuì 5 hoē kàu 15 hoè. Só͘-í hiān-chāi tī Eng-kok muí chi̍t ê gín-ná, kàu 15 hoè lóng ū hióng-siū it-poaⁿ kàu-io̍k ê koân-lī, iā in tek-khak tio̍h chīn chit ê gī-bū.
Tng gín-ná sêng-siū phó͘-thong kàu-io̍k ê ki-koan ê sî, m̄-bián siū khó-chhì ê ap-pek, só͘-í in thang chū-iû ha̍k-si̍p, chīn-liōng tui-kiû in ê hèng-chhù kap te̍k-tiông. Khah-siông in lóng chù-tiōng tī si̍t-chè-te̍k ê hong-bīn, chhin-chhiūⁿ cha-po͘ gín-ná chù-tiōng kang-gē, kī-su̍t; cha-bó͘ gín-ná chù-tiōng táⁿ-jī liāu-lí ka-sū téng. Chóng-sī tī in sió-o̍h oân-pit hit nî, 11 hoè ê sî, choân-kok ê gín-ná lóng tio̍h chham-ka kok-ka chhì-giām, (Selection Examination) iā tuì chit ê khó-chhì ê seng-chek hun-phoè tiong-o̍h ê seng-ha̍k, chiū-sī iu-siù ê gín-ná (20-30%) chiàu in ê chì-goān thang chìn-ji̍p Bûn-tián ha̍k-hāu, á-sī chit-gia̍p ha̍k-hāu (Technical School). Kî-û ê lóng tio̍h kè-sio̍k phó͘-thong tiong-o̍h (Secondary Modern School), kàu in 15 hoè oân-moá, kok-bîn kàu-io̍k ê gī-bū chiū thang lī-khui ha̍k-hāu chhut-khì siā-hoē ho̍k-bū. (Thāi-sio̍k)
