CHÚ-JI̍T-O̍H: Iâ-so͘ Lâi-le̍k-koa

1957.06 tē 822 hō p.24-25

(Toh Hêng-lī chok)

Iâ-so͘ siū soé-lé (Má-thài 3:13-17)

1. Tng hit sî tī Iû-thài,

Soé-lé Iok-hān lâi;

Soan-thoân chiū kóng tio̍h hoán-hoé,

It-chīn choē-koà tio̍h kín koé.

2. Tio̍h ài chai, thian-kok kūn,

Tāi-ke m̄-thang khùn;

Hoán-hoé soé-lé lâi chhin-kūn,

Thian-kok ún-tàng ū lí hūn.

3. Kiâⁿ soé-lé ê Iok-hān,

Kap lâng bô saⁿ-tâng;

Soaⁿ-kan khòng-iá sì-kè toà,

Saⁿ chhēng iûⁿ mn̂g hâ phê-toà.

4. Iok-hān lâi ài oān-chō͘,

Siu-ti̍t Chú ê lō͘;

Saⁿ-tǹg bô hó ê ji̍t-si̍t,

Chhoàn chia̍h chháu-meh kap iá-bi̍t.

5. Choē-choē lâng kàu Iok-tàn,

ài lâi chhē Iok-hān;

Hoaⁿ-hí tuì I niá soé-lé,

It-chīn choē-koà kam-goān ké.

6. Choē-choē lâng teh gī-lūn,

Lâng-lâng lâi chhin-kūn;

I kiâⁿ soé-lé ê kang-chok,

Phah-sǹg kiám-chhái sī Kí-tok.

7. Iok-hān kóng tio̍h ài chai,

Pí goá lō͘-boé lâi;

I sī tāi-seng goá sī tè,

Kap I lâi pí goá chin sè.

8. Lō͘-bé lâi ū koân-lêng,

Phok-ài koh chhong-bêng,

Goá sī sio̍k-jîn ū lâ-sâm,

Tháu I oê-toà iā boē kham.

9. I nā lâi ài beh ēng,

Lêng-hé kap Sèng-lêng;

Hō͘ lín oân-choân têng-thâu-siⁿ,

Hoán-hoé choē-ok lâi koé-pìⁿ.

10. Tī hit-sî Iâ-so͘ lâi,

ài pò Iok-hān chai;

Chiū kóng kā goá kiâⁿ soé-lé,

Iok-hān tio̍h-kiaⁿ chiū tò-thè.

11. Hiòng Chú kóng put-ha̍p lí,

Chhiáⁿ lí hō͘ goá sî;

Goá sī eng-kai chiū-kūn lí,

Chhiáⁿ lí m̄-thang lâi chek-pī.

12. Iâ-so͘ kóng lūn kàu che,

Chhiáⁿ lí m̄-thang the;

Beh chò bô͘-hoān ài khiam-pi,

Tio̍h kiâⁿ só͘ ū ê lé-gî.

13. Che Iok-hān m̄-káⁿ the,

Iâ-so͘ chiū soé-lé;

Liâm-piⁿ tuì chuí chiū peh khí,

Khoàⁿ-kìⁿ kî-koài ê tāi-chì.

14. Thiⁿ hut-jiân uī I khui,

Khoàⁿ-kìⁿ ū chi̍t uī;

Chiū-sī Siōng-tè ê Sèng Sîn,

Chhin-chhiūⁿ chíⁿ-á teh kàng-lîm.

15. Che chíⁿ-á sī Sèng Snî,

Hioh tī Chú téng-bīn;

Tuì thiⁿ koh chhut Sîn ê siaⁿ,

Hō͘ lâng thiaⁿ-tio̍h chin toā kiaⁿ.

16. Chhut siaⁿ kong chit ê kiáⁿ,

Chin chiàⁿ tit goá thiàⁿ;

I sī hō͘ goá só͘ hoaⁿ-hí,

Sè-kan lâng-lâng ài thiaⁿ I.