Iâ-so͘ Lâi-le̍k-koa

Iâ-so͘ chio ha̍k-seng

(Má-thài 4:18-22)

1957.09 tē 825 hō p.19-20

(Toh Hêng-lī)

1. Chú Iâ-so͘ tng hit-sî,

    Kiâⁿ kàu Ka-lī-lī;

    Khoàⁿ-kìⁿ ū lâng teh thó-hî,

    Chiū-sī Pí-tek in hiaⁿ-tī.

2. Chú chiū kóng lâi toè goá,

    Sú-bēng chin-chiàⁿ toā;

    A-hiaⁿ Se-bûn miâ Pí-tek,

    Thiaⁿ-tio̍h che oē chin kám-kek.

3. In sió-tī Au-tek-lia̍t,

    Thiaⁿ-tio̍h iā chin jia̍t;

    Nn̄g-lâng chiū pàng in ê bāng,

    Suî-sî toè Chú khì chio lâng.

4. Chú tuì chia koh chìn-chêng,

    Koh chio sin ha̍k-seng;

    Khoàⁿ-kìⁿ Ngá-kok kap Iok-hān,

    Kap in lāu-pē teh pó͘-bāng.

5. Chú chiū kóng lâi toè goá,

    Mî-ji̍t kap goá toà;

    Nn̄g-lâng liâm-piⁿ lī-khui chûn,

    Suî-sî peh-khí chiū chhin-kūn.

6. Chú Iâ-so͘ chio ha̍k-seng,

    Kè-kiōng cha̍p-jī teng;

    Má-thài cha̍p-chiuⁿ ê Sèng-keng,

    Lāi-bīn lâng-miâ lóng kì-bêng.