Chiong Siōng-tè ê mi̍h hō͘ Siōng-tè
(Kang Bān-lí siá)
1958年1月829卷 p.10-11
Kàu-hoē lāi ū chin-choē lâng kóng, cha̍p-hūn ê chi̍t-hūn hōng-hiàn sī lu̍t-hoat, ia̍h lán choè Ki-tok-tô͘ ê lâng sī tī un-tián ē, m̄-sī tī lu̍t-hoat ē, só͘-í m̄-bián cha̍p-hūn-chi̍t ê hōng-hiàn. Koh ū lâng kóng, m̄-bián chap7-hūn-chi8, nā ū cha̍p-hūn-chi̍t ê chi̍t-poàⁿ chiū kàu-gia̍h. Hiaⁿ-tī ah, chhiáⁿ lán m̄-thang boē kì-tit, lán ê Chú Iâ-so͘ só͘ kóng ê oē, ‘Bo̍h-tit phah-sǹg goá lâi sī beh hoè-bô lu̍t-hoat, á-sī sian-ti, goá lâi sī beh èng-giām. Kàu thiⁿ-toē hoè-bô, lu̍t-hoat ê chi̍t tiám, chi̍t ui̍h ia̍h koat-toàn boē hoè-bô.' Lán ê Chú Iâ-so͘ put-tàn bô hoè-bô lu̍t-hoat, I ū kiông-tiau lu̍t-hoat, I ū kóng, "Lín bat thiaⁿ-kìⁿ ū tuì kó͘-chá lâng kóng, M̄-thang hāi-sí lâng, hāi-sí lâng ê , tio̍h siū sím-phoàⁿ, chóng-sī goá kā lín kóng, kìⁿ-nā siū-khì i ê hiaⁿ-tī ê tio̍h siū sím-phoàⁿ. Lín bat thiaⁿ-kìⁿ ū oē kóng, Tio̍h thiaⁿ lí ê chhù-piⁿ, oàn-hūn lí ê tuì-te̍k; nā-sī goá kā lán kóng, Tuì-te̍k lí ê, tio̍h thiàⁿ in; khún-tio̍k lí ê, tio̍h thoè in kî-tó." Só͘-í lán ê Chú ia̍h kóng choè Ki-tok-tô͘ ê put-tàn tio̍h ū cha̍p-hūn-chi̍t ê hōng-hiàn sī tio̍h " CHIONG SIŌNG-TÈ Ê MI̍H LAP(sic.) HŌ͘ SIŌNG-TÈ" lâi kiông-tiau hōng-hiàn ê ì-gī kap cheng-sîn.
Sím-mi̍h sī Siōng-tè ê mi̍h? Lán lâng ta̍k lâng lóng kóng chit hāng mi̍h sī goá ê, hit hāng ia̍h sī goá ê. Kiám ū-iáⁿ? Goá ū chi̍t ê pêng-iú, khí chi̍t keng ê toā lâu, i chin hoaⁿ-hí, tuì goá kóng, goá chi̍t keng lâu sī goá pún-sin só͘ siat-kè--ê, goá pún-sin kàm-tok--ê, chit keng lâu si̍t-chāi sī goá ê. Chóng-sī, tī la̍k nî āu, hit keng toā lâu ū piàn choè chi̍t ê phoà-chhù, in-uī hō͘ chà-tân chà-pháiⁿ. Goá ia̍h ū chi̍t ê pêng-iú, kong-ho̍k āu ū chûn chin choē chîⁿ, i bat kā goá kóng,ū cha̍p-goā-ek bān, hit ê lâng hiān-sî bô tiàm tī Tâi-oân, in-uī i ê chîⁿ lóng liáu-khì, koh iáu khiàm lâng chin-choē chîⁿ. Koh ū chi̍t ê lâng, i ū sì ê kiáⁿ, nn̄g ê cha-bó͘-kiáⁿ, chóng-sī tī kū-nî, chit ê lâng sí ê sî, i ê kiáⁿ to lóng í-keng sí liáu, só͘-í bô lâng thang sàng i. Lán ê sèⁿ-miā mā m̄-sī lán ê. Tuì án-ni lán thang chai, lâng bô ū só͘-iú-koân, in-uī lâng boē-oē chhòng-chō, koán-lí kap pó-siú i só͘ ū ê kàu éng-oán. Lán lâng m̄-thang boē kì-tit tī sè-kan só͘ ū ê bān-hāng mi̍h sī pí lâng khah tāi-seng siū chhòng-chō, só͘-í lâng boē-oē tit thang tuì pí lâng khah tāi-seng siū chhòng-chō ê bān-hāng mi̍h kóng, lín chiah ê lóng sī sio̍k tī goá ê. Chú-koân sī Siōng-tè ê, Siōng-tè í-goā bô lâng oē chhòng-chō, koán-lí kap pó-siú, só͘-í Siōng-tè sī î-it ê chú-koân-chiá. "Toē kap kî-tiong só͘ chhiong-moá ê, sè-kài kap tiàm tī i tiong-kan ê, lóng sio̍k Iâ-hô-hoa"( Si-phian 24:1).
Lâng lóng bô chú-koân, lâng put-kò sī Siōng-tè ê koán-ke jî-í. Iâ-hô-hoa, Siōng-tè chiong hit ê lâng hē tī Ai-tiân hn̂g lāi CHÈNG-CHOH KÒ͘-SIÚ ( Chhòng-sè-kì 3:15). Lâng só͘ ū ê mi̍h kap i pún-sin ê sèⁿ-miā lóng sī Siōng-tè ê, só͘-í ta̍k ê Ki-tok-tô͘ sī Siōng-tè ê koán-ke. Beh choè hó koh chīn-tiong ê koán-ke, chì-chió tio̍h ū chit gō͘ hāng ê tiâu-kiāⁿ:-
1. Lâng tio̍h sêng-jîn kap chiap-siū Siōng-tè sī chhòng-chō sè-kan it-chhè só͘ ū ê chō-bu̍t Chú, iā sī sè-kài ê pó-chhî-chiá, koh sī bān-hāng mi̍h ê Chú-koân-chiá, ia̍h sī î-it ê só͘-iú-koân-chiá. " Thiⁿ toē kap i it-chhè só͘ ū ê í-keng choè oân, tī tē chhit ji̍t Siōng-tè oân I só͘ chò ê kang"( Chhòng-sè-kì 2:1).
2. Lâng tī sè-kan só͘ ū ê lóng sī Siōng-tè tè(sic.) kau-thok i koán-lí, lâng sī Siōng-tè ê koán-ke, Siōng-tè chiong lán ê sí-chó͘ hē tī Ai-tiàn hn̂g, sī beh hō͘ i chèng-choh kap kò͘-siú, m̄-sī choè chú-koân-chiá.
3. Lâng tī teh sú-iōng i ê chîⁿ, sî-kan, châi-lêng kap i só͘ ū ê, lóng tio̍h chun-tiōng Siōng-tè ê chí-ì, m̄-thang chū-choan, chiàu ka-kī ê ì-sù, tio̍h chhin-chhiūⁿ Sèng-si só͘ kóng:-
Goá ê chîⁿ-gûn hiàn hō͘ Lí,
ēng chhut lóng thàn Kí(sic.) chí-ì,
Goá ê châi-chêng Lí siúⁿ-sù,
Kam-goān hêng Lí choè khì-kū.
4. Lâng beh hióng-siū it-seng ê khoài-lo̍k, tio̍h ū kám-siā ê sim,
put-sî bô boē kì-tit Siōng-tè teh chiàu-kò͘ kap kiong-kip lán ta̍k lâng só͘ khiàm-ēng ê, in-uī Siōng-tè koan-sim tī lín, chiàu Sèng-si só͘ kóng: -
Kéng-gū hó pháiⁿ sī Chú só͘ tiāⁿ,
Tiàm Chú si̍t-ē, ún-tàng bián kiaⁿ,
Siōng-tè teh chiàu-kò͘ lí.
5. Lâng tio̍h m̄-thang boē kì-tit , ū chi̍t ji̍t lán tio̍h ài tī éng-oán ê chú-cháiⁿ-chiá, Siōng-tè ê bīn-chêng lâi chheng-soàn lán só͘ tuì I siū kau-thok koán-lí ê it-chhè. Lán m̄-chai beh thiaⁿ-kìⁿ Chú tuì lán kóng, Hó koh chīn-tiong ê lô͘-po̍k, á-sī kóng, Pháiⁿ koh pîn-toāⁿ ê lô͘-po̍k, chit ê sī chin iàu-kín, lán bô soán-te̍k boē ēng tit ê sū.
Hiaⁿ-tī ah, só͘-í goá in-uī Siōng-tè ê lîn-bín, khǹg lín hiàn ka-kī ê seng-khu choèN3chè(sic.), sī oa̍h--ê, sèng--ê, Siōng-tè só͘ hoaⁿ-hí--ê chit ê chiū-sī " Chiong Siōng-tè ê mi̍h la̍p hō͘ Siōng-tè. "
