Hō-chhoan Hong-gān kap i ê soat-kàu
"Iâ-so͘ ê siā-hoē ūn-tōng ê pún-chit"
(Lō͘-ka 4:17, 18)
Chiu Thian-lâi
1958年2月830期 p.11-13
1. Siōng-tè sī pí siā-hoē ūn-tōng khah toā.
Siōng-tè pí siā-hoē chú-gī khah toā. Siōng-tè ê ì-sù sī choân-thé, siā-hoē chú-gī ê ì-sù sī choân-thé ê chi̍t-pō͘-hūn nā-tiāⁿ. In-uī án-ni , lán tio̍h ài chai Iâ-so͘ ê ūn-tōng sī pí siā-hoē ūn-tōng koh-khah toā kui-bô͘. Iâ-so͘ ê ló͘-le̍k sī tī ba̍t-pâng, I thàu-chá, thiⁿ iáu put-chí àm, chiū khì soaⁿ-ni̍h kî-tó, bat thong-mî tī soaⁿ-téng kî-tó. Siā-hoē m̄-sī I ê choân-pō͘, kò-jîn chú-gī ê sîn-pì chú-gī jî-í; án-ni sī toā chhò-gō͘. I ê ūn-tōng. Só͘-í m̄-sī kan-ta koan-hē kò-sèng ê ūn-tōng, chiū-sī hō͘ kò-sèng oē liân-kiat ê siā-hoē ūn-tōng. In-uī tī hok-im-su ê lāi-bīn í-keng ū kì chin-choē, goá só͘ tù "Sèng-chheh siā-hoē-ha̍k ê gián-kiù," sui-jiân bô thiat-tí, iáu-kú goá ū kán-tan kóng liáu, chóng-sī Iâ-so͘ ê siā-hoē su-siúⁿ ê hoat-tián, goá iáu-bē kóng-khí, só͘-í tī chia beh sió-khoá lâi kóng.
2. Iâ-so͘ ê siā-hoē
Iâ-so͘ tuì siū iú-he̍k choè-chho͘ ê ji̍t, chiū tú-tio̍h kin-á-ji̍t ê siā-hoē su-siúⁿ-ka só͘ siūⁿ ê kun-pún būn-toê. Tē-it, chiū-sī mī-pau ê būn-toê, tē-jī, chiū-sī pàng-sak chiām-chìn-tek ê chhiú-toāⁿ lâi kéng chin kín-khoài ê chhiú-toāⁿ, tē 3 ê iú-he̍k, chiū-sī koân-le̍k ê chông-pài, kap pháiⁿ thò-hia̍p ê būn-toê. Siám-pī 3 chióng iú-he̍k ê Iâ-so͘, ū kéng "Siōng-tè kok" ê chit tiâu éng-kiú ê tō-lō͘. I tò-tńg lâi Ka-lī-lī ê soan-thoân, chiū-sī lūn Siōng-tè kok ê soan-thoân, tī I ê seng-gâi it-koàn lóng sī án-ni.
Iâ-so͘ Ná-sat-le̍k ê soan-giân, ū ín-khí Í-sài-a 61 chiuⁿ ê chi̍t-pō͘-hūn, si̍t-chāi sī chi̍t ê chin suí ê soan-giân, ū éng-kiú-sèng tī-teh; hit ê soan-giân ū pau-hâm 5 têng ê siā-hoē kái-hòng, chiū-sī:- (1) "Hō͘ goá thoân hok-im hō͘ sòng-hong(sic.) lâng"(keng-chè-tek kái-hòng). (2) "Chhe goá i-hó siong-sim ê lâng"( sim-lí-tek kái-hòng). (3) "Pò-kò siū-lia̍h ê tit-tio̍h tháu-pàng" (siā-hoē-tek kái-hòng).(4) "Kā chhiⁿ-mî ê kóng, in oē tit-tio̍h koh kng"( seng-lí-tek kái-hòng).(5) "Lâi tháu-pàng siū ap-chè ê lâng"(chèng-tī-tek kái-hòng), sī chin-chiàⁿ ū hó ê ì-sù, tuì Iâ-so͘ ê chhuì thoân-chhut-lâi! Keng-chè ê kái-hòng m̄-sī I ê su-siúⁿ ê choân-pō͘, koan-hē kèng-uì Siōng-tè kap Siōng-tè kok, í-ki̍p oa̍h-miā ê būn-toê sī koh-khah iàu-kín, che tī Chú ê Kî-tó-bûn khó-í thang tuì-chiò lâi ha̍k-si̍p.
Chóng-sī kiâⁿ soé-lé Iok-hān chhe ha̍k-seng, mn̄g Iâ-so͘ kóng, "Só͘ beh lâi ê sī Lí mah? Á-sī goán tio̍h ǹg-bāng pa̍t lâng ah?" Iâ-so͘ só͘ ìn ê chin kî-biāu , I iā bô kóng sī, iā bô kóng m̄-sī; chha-put-to chiong Ná-sat-le̍k ê soan-giân koh têng-chài kéng chi̍t-piàn: " Chiū-sī chhiⁿ-mî ê khoàⁿ-kìⁿ, pái-kha ê kiâⁿ, thái-ko ê chheng-khì, chhàu-hī-lâng ê thiaⁿ-kìⁿ, sí ê lâng koh-oa̍h, sòng-hiong lâng tit-tio̍h thiaⁿ hok-im. Kìⁿ-nā bô tī goá lâi tio̍h-tak ê ū hok-khì"(Thài 11:5 , 6). Nā chiàu kàu-gī-tek lâi khoàⁿ, kiám-chhái ū lâng beh chèng-bêng Iâ-so͘ sī teh kiâⁿ sîn-jiah, nā-sī án-ni, chiū " Sòng-hiong lâng tit-tio̍h thiaⁿ hok-im," chit hāng m̄-sī sîn-jiah, só͘-í goá beh kóng sī chí tī Iâ-so͘ ê lāi-bīn, ū-giân í-keng teh sêng-chiū; só͘-í kiâⁿ sîn-jiah m̄-sī I ê siā-hoē ūn-tōng ê tiong-sim, bo̍k-tek sī beh tuì Bí-sài-a lâi tit-tio̍h kái-hòng, "Soan-thoân Chú hoaⁿ-hí ê sî," chiah ū kiâⁿ sîn-jiah; só͘-í tī I ê thâu-náu-lāi chiū ū "Hó ê Sat-má-lī-a lâng" ê thiàⁿ ê hêng-tōng kap chhin-chhiat í-ki̍p "Lín kìⁿ-nā ài lâng khoán-thāi lín ê, lín iā tio̍h án-ni khoán-thāi lâng" ê n̂g-kim-lu̍t só͘ chi-phoè, tō-tek siā-hoē ê kiàn-siat, chit khoán hó ê su-siúⁿ cháu chhut-lâi! Iâ-so͘ chin toā-táⁿ kóng, "Goá ài lîn-bín , m̄-ài chè-sū, chit kù sím-mi̍h ì-sù , lín tio̍h khì o̍h. In-uī goá lâi m̄-sī beh chio gī-lâng, sī beh chio pháiⁿ-lâng."(Thài 9:13) Iâ-so͘ ê kà-sī ū thiat-tí, chiū-sî(sic.) bô kè-ta̍t ê, hō͘ i ū kè-ta̍t, seng-lí-tek khoat-hām ê hō͘ i ū kè-ta̍t, seng-lí-tek khoat-hām ê hō͘ i hó, sim-lí-tek khoat-hām ê kā i kiù, tō-tek-tek khoat-hām ê hō͘ i koh-oa̍h, tī hit ê hêng-uî ê lāi-bīn thang khoàⁿ-tio̍h Siōng-tè koh chhut-hiān ê si̍t-chāi kè-ta̍t! Iâ-so͘ chí-bêng chit hō kun-pún-tek ê ūn-tōng, chiū kóng, "Kìⁿ-nā bô tī goá lâi tio̍h-tak ê ū hok-khì".
Kin-á-ji̍t ê chong-kàu , nā-sī chi̍t-si̍t ê kè-ta̍t chhòng-chō ê ūn-tōng, chiū tek-khak chiâⁿ-choè chi̍t ê siā-hoē ūn-tōng. "Bô ū khàm-ba̍t iā bô lō͘-hiān ê, ún-ba̍t bô hō͘ lâng chai ê ," che sī sū-si̍t. Iâ-so͘ bô chù-tiōng koan-liām , sī chù-tiōng sū-si̍t. Chóng-kàu m̄-sī koan-liām ê iû-hì; tû-khì it-chhè ê pháiⁿ kap chai-hāi, tuì hia kā i kiù chhut-lâi, chi̍t khoán ê kiù-chè ūn-tōng, éng-oán sī Ki-tok ê sū-gia̍p. Sù-tô͘ Pó-lô uī-tio̍h beh kè-sio̍k chi̍t ê ūn-tōng, chiū kóng, " Goá uī-tio̍h Ki-tok ê seng-khu chiū-sī kàu-hoē , tī goá ê jio̍k-thé, pó͘-moá I só͘ bē ū chīn ê hoān-lān"(Ko-lô-se 1:24); nā-sī án-ni , chiū Iâ-so͘ choè Ki-tok ê kè-sio̍k ūn-tōng chiah tio̍h lah.
Pí-lia̍p-to kap Iâ-so͘ ê būn-tap(Hān 18:33-38), sī chin put-khó su-gī. Tī chit ê būn-tap ê tiong-kan, Iâ-so͘ chhin-chhiūⁿ ū kóng chi̍t hāng mâu-tún, chiū-sī bô ū kok-thó͘ ê só͘-chāi Iâ-so͘ ê ì-sù, sī teh kóng éng-oán chûn-chāi ê Siōng-tè kok, m̄-sī chiàu hiān-chāi án-ni oē tàng boán-chiok, m̄-sī sio̍k tī toē-chiūⁿ, chiū-sī sio̍k tī téng-bīn , éng-kiú thang him-bō͘ ê kok-thó͘! Iâ-so͘ tuì Pí-lia̍p-to sêng-jīn I pún-sin sī Ông, chóng-sī m̄-sī chi-phoè ê Ông, sī uī-tio̍h beh ho̍k-sāi lâng ê Ông, che sī I chài-saⁿ, chài-sì kóng-bêng ê sū; sui-jiân kàu siū-lia̍h choè-āu ê sùn-kan iā sī kóng, " Lín kì-jiân kiâⁿ i tī goá ê hiaⁿ-tī chì-bî-soè ê ê chi̍t-ê, chiū-sī kiâⁿ i tī goá"(Thài 25;40). Iâ-so͘ ê Siōng-tè kok ūn-tōng , sui-jiân ū ì-sek pún-sin beh choè Ông, chóng-sī m̄-sī chiàu it-poaⁿ só͘ khoàⁿ ê Ông, sī ū pa̍t khoán ì-sù lâi kóng ê Ông, tī chia I m̄-chún lâng tio̍h-tak.
(Thāi-sio̍k).
