Ngá-kok ê seng-gâi kap sìn-gióng
(Tiuⁿ Sìn-tek siá).
1958年2月830期 p.13-14
[Phian-chiá chù: Chū kū-nî lâi chiū ū chiong Kū-iok lia̍t-chó͘ ê sìn-gióng kè-sio̍k kài-siāu tī pún Pò, chit chhù ū chhiáⁿ sin-chìn ê Tiuⁿ Bo̍k-su siá pún-phiⁿ tī chia, i ū chheng-sin ū la̍t ê sìn-gióng kap bûn-chiuⁿ, liōng-pit beh lī-ek tāi-ke chin chē chiah tio̍h].
Ngá-kok, tī Kū-iok nā thiaⁿ-tio̍h chit ê miâ, chiū suî-sî siūⁿ-tio̍h chit ê kan-chà koh tī i ê seng-gâi tiong ū keng-koè chē-chē hoān-lān ê lâng. Ngá-kok tī boán-liân, khiā tī Ai-ki̍p Hoat-ló bīn-chêng ê sî, i ka-kī iā án-ni kóng, " Goá it-seng ê nî-ji̍t ia̍h chió ia̍h kan-khó͘......" " Ngá-kok" ì-sù sī "Khîⁿ kha-āu-tiⁿ--ê." Chit ê miâ cha̍p-hun piáu-hiān i ê chò lâng. I tuì boē chhut-sì chiū kap i ê hiaⁿ Í-sò kè-kàu(Chhòng-sè-kì 25:22). āu-lâi ēng chi̍t oáⁿ ê âng-tāu-thng tuì Í-sò bé toā-kiáⁿ ê bêng-hūn; ēng chi̍t oáⁿ ê iûⁿ-bah-thng phiàn Í-sat, tit-tio̍h toā-kiáⁿ só͘ èng tit ê chiok-hok. Jiân-āu uī-tio̍h siám-pī Í-sò ê siū-khì, kàu Pa-tán-a-lân La̍h-pan ê só͘-chāi, uī-tio̍h bó͘, ke-gia̍p, 20 nî kú kap La̍h-pan kè-kàu. Kàu tī chòng-liân ê sî, iā kap Siōng-tè tàu-la̍t. Tuì i ê seng-gâi hō͘ lán tit-tio̍h nn̄g hāng ê kà-sī.
I. Chai-hō ka-kī chhú--ê.
Tī sè-kan, lán lóng ē tú-tio̍h hoān-lān, khùn-khó͘. Tī hit sî lâng siông-siông chiong hit ê hoān-lān ê goân-in kui tī Mô͘-kuí. In-uī Sèng-keng kì Mô͘-kuí siông-siông hō͘ lâng tú-tio̍h chhiⁿ-chhám; chhin-chhiūⁿ Iok-pek ê siū-lān á-sī tī Sin-iok só͘ kì hiah ê hō͘ kuí hū-sin ê lâng. Chóng-sī lán m̄-thang bē-kì-tit Sèng-keng iā ū kì chai-hō tuì lâng ê choē-ok lâi; chhin-chhiūⁿ A-tong ê siū koáⁿ-chhut lo̍k-hn̂g, á-sī Ngá-kok só͘ tú-tio̍h ê chhiⁿ-chhám Ngá-kok goân-lâi chhut-sî(sic.) tī hù-jū ê ka-têng, tī lāu-bú thióng-ài(寵愛) ê ē-bīn sêng-tióng. Cháiⁿ-iūⁿ i tio̍h lī-khui un-loán ê ka-têng, tī Pek-te̍k-lī ê khòng-iá tú-tio̍h ko͘-to̍k ê chhiⁿ-chham? I ê lāu-pē hó-gia̍h , iûⁿ-kûn chin chē, cháiⁿ-iūⁿ i tio̍h khì chò lâng ê lô͘-châi 20 nî kú mê-ji̍t siū khó͘?(Chhòng-sè-kì 31:40). Chiah ê chhiⁿ-chhám lóng sī ka-kī chhú--ê.
Ngá-kok pún-lâi ū kèng-uì Siōng-tè ê sim(piáu-hiān tī ài beh tit-tio̍h toā-kiáⁿ ê bêng-hūn). Che pí tham-loân sè-kan, khoàⁿ-khin Siōng-tè ê Í-sò(piáu-hiān tī khoàⁿ-khin toā-kiáⁿ ê bêng-hūn) ū khah khó-chhú. Sui-jiân i chhut-sì chò sió-tī, iáu-kú Siōng-tè chá ( Chhòng-sè-kì 25:23) chiū tiāⁿ-tio̍h beh hō͘ i sêng-chiap lāu-pē ê gia̍p.Nā-sī i m̄-nā boē thèng-hāu Siōng-tè só͘ tiāⁿ-tio̍h ê sî nā tiāⁿ, siōng chhiáⁿ ēng kan-chà ê hong-hoat beh thê-chá si̍t-hiān Siōng-tè ê chí-ì. Só͘-í ēng chi̍t oáⁿ âng-tāu-thng oāⁿ toā-kiáⁿ ê bêng-hūn ēng chi̍t oáⁿ ê iūⁿ-bah-thng(sic.) phiàn lāu-pē tit toā-kiáⁿ ê hok-hūn; tì-kàu tio̍h lī-khui lāu-bú ê thióng-ài, kàu tī chhiⁿ-chhìn ê khòng-iá ka-kī tī hia hioh mê iā tio̍h kàu tī bó-kū La̍h-pan ê só͘-chāi 20 nî kú chò lô͘-châi lâi siám-pī Í-sò ê siū-khì. Siat-sú Ngá-kok nā ē thang thun-lún thèng-hāu kàu Siōng-tè só͘ beh hō͘ i ê sî, kiám-chhái m̄-bián tú-tio̍h chiah ê sū. In-uī bān-mi̍h ê Siōng-tè só͘ tiāⁿ-tio̍h ê sî (Thoân-tō 3:1-11). Só͘-í liân Chú Iâ-so͘ tī sè-kan teh chò kang, nā m̄-sī ha̍p tī Siōng-tè só͘ tiāⁿ-tio̍h ê sî, m̄-káⁿ suî-piān thê-chá si̍t-hiān Siōng-tè ê ì-sù(Iok-hān 2:4,7:30,8:20 téng).
II. Ok iú ok pò.
Tī Ngá-kok ê seng-gâi-tiong, iā thang khoàⁿ-chhut chò pháiⁿ tiāⁿ-tio̍h ū phiáⁿ ê pò-èng. Ū sî bô liâm-piⁿ pò-èng, chóng-sī lán m̄-thang in-uī án-ni khoàⁿ chò bô pò-èng. Ngá-kok sui-jiân sī Siōng-tè só͘ kéng-soán ê lâng , iáu-kú Siōng-tè bô in-uī án-ni khoàⁿ i só͘ hoān ê choē chò bô iàu-kín. Pó-lô kóng, "Bo̍h-tit ka-kī chhò-gō͘ , Siōng-tè boē bú-bān tit; in-uī lâng só͘ iā ê sī sím-mi̍h, i iā beh siu hit hō." Ngá-kok phiàn lāu-pē tit-tio̍h toā kiáⁿ ê chiok-hok; āu-lâi ū tit-tio̍h pò-èng. Chiū-sī tī Pa-tán-a-lân 20 nî kú, siū La̍h-pan khi-phiàn, 10 pái ké-oāⁿ i ê kang-chîⁿ(Chhòng-sè-kì 31:7) M̄-nā án-ni, kàu tī boán-liân ê sî siū i ê kiáⁿ-jî khi-phiàn, chiū-sī bē Iok-sek lo̍h Ai-ki̍p, phiàn Ngá-kok kóng sī hō͘ iá-siù kā--sí. Lán khoàⁿ hit sî Ngá-kok ê khó͘-kéng!(Chhòng-sè-kì 37:34, 35)Chiah ê lóng sī Ngá-kok phiàn lāu-pē ê pò-èng.
Taⁿ Ngá-kok sui-jiân tī i ê seng-gâi tiong hō͘ lán khoàⁿ-chhut chiah ê khoat-tiám, iáu-kú iā ē thang khoàⁿ-chhut i ê sìn-gióng. Chiū-sī it-seng keng-koè kuí-pái ê chong-kàu keng-giām , hō͘ i iù-tī ê sìn-gióng chiām-chiām chìn-pō͘ kàu tī khah oân-choân ê sìn-gióng. Tī Chim-giân 17:3 kóng, "Khe-á sī beh thoàn-liān gûn, lô͘ sī beh thoàn-liān kim; to̍k-to̍k Iâ-hô-hoa thoàn-liān lâng ê sim." Lán khoàⁿ tī Ngá-kok ê seng-gâi tiong, Siōng-tè cháiⁿ-iūⁿ ēng kang teh chō-chiū i ê sìn-gióng kap jîn-keh.
(Í-hā thāi-sio̍k).
