Hō-chhoan Hong-gān kap i ê soat-kàu
"Iâ-so͘ ê siā-hoē ūn-tōng ê pún-chit"
(Lō͘-ka 4:17,18)
Chiap chêng-goe̍h hō 13 bīn
Chiu Thian-lâi
1958年3月831期 p.16-17

iáu ū put-khó su-gî(sic.) ê chiū-sī Iâ-so͘ ê si̍p-jī-kè. Si̍p-jī-kè ê būn-tê m̄-sī kan-ta kóng hi-seng ê lâu-huih chiū oē-tit kái-koat. Iâ-so͘ chai kiâⁿ sé-lé Iok-hān siū thâi liáu-āu, I ê ūn-miā iû-goân kap i kāng hong-hiòng ; in-uī Iâ-so͘ ka-kī ū-giân , ha̍k-seng sui-jiân chó͘-tòng, nā-sī Iâ-so͘ ǹg tī chin-lí ū tiong-si̍t, só͘-í i ê koat-sim chiū ná kian-tēng. Iâ-so͘ chai pún-sin ê siū-lān sī èng-giām Sèng-keng, in-uī sian-ti lóng ū chhàm-gú gī-lâng ê sí,. Í-sài-a 53 chiuⁿ kap Si-phian 22 phiⁿ lóng ū biâu-siá gī-lâng ê sí. Só͘-í I chai-iáⁿ chit ê sū, chiū koat-sim sūn-chiông, ka-kī ì-sek tī sio-chè ê toâⁿ tio̍h hiàn iûⁿ-ko ê huih, chiū-sī I pún-sin ê huih; iā ū ì-sek chit ê huih sī beh chheng-khì jîn-luī ê choē-ok, gī-lâng ê sí sī sio̍k-choē ê sí; só͘-í tī choè-āu ê boán-chhan Iâ-so͘ kóng, "Chit ê sī goá ê huih, chiū-sī bêng-iok ê huih, uī-tio̍h choē-choē lâng lâi lâu-chhut ê, tì-kàu choē tit-tio̍h sià-bián"(Thài 26:28)
Iâ-so͘ bô iông-ún put-gī, chin un-jiû, ū thiàⁿ-sim moá-moá ê Iâ-so͘ , tī choè-āu chi̍t chiu-kan, tī Iâ-lō͘-sat-léng ê hêng-tōng hō͘ lâng chin thang kiaⁿ; chiū-sī chheng-khì sèng-tiān, chek-pī ké-hó, pìⁿ-choè chi̍t ê ióng-kám ê sian-ti! I uī-tio̍h beh thiaⁿ, oàn-hūn ké-hó, uī-tio̍h beh thiàⁿ lâi kéng si̍p-jī-kè. I in-uī ū oàn-hūn choē-ok, só͘-í hoaⁿ-hí chún-chò choē-jîn lâi sí. oàn-hūn tuì-te̍k ê choē-ok, pìⁿ-chò, pìⁿ-chò sià-bián tuì-te̍k ê si̍p-jī-kè ê sí! Jîn-luī choè-āu ê lân-koan m̄-sī sí, sī choē-ok. I m̄-kiaⁿ sí lâi tam-tng choē-ok, m̄ iông-ún choē-ok , lâi chín-kiù lâng thoat-chhut choē-ok! Kin-á-ji̍t ê chong-kàu-ka kap siā-hoē ūn-tōng-chiá ê khùn-lân, chiū-sī beh kiù choē-ok iā tio̍h kap choē-ok thò-hia̍p. Nā-sī Iâ-so͘ sī bô iông-ún choē-ok lâi kiù choē-ok; só͘-í I ka-kī tio̍h siū tèng tī si̍p-jī-kè, chiong chit ê si̍p-jī-kè ín-siū khí-lâi! Lán tī Ki-tok ê tāi-lí hi-seng, sio̍k-choē, chiah ē thang bat Siōng-tè ê thiàⁿ; kan-ta kóng Siōng-tè ê thiàⁿ, nā bô si̍t-chāi hián-chhut hō͘ lán khoàⁿ, sī chi̍t phìⁿ ê khang-sióng jî-í; chóng-sī hit ê ài nā ū si̍t-chāi piáu-hiān chhut-lâi, lán chiū bêng-pe̍k Siōng-tè ê pún-chit chiū-sī thiàⁿ(I Hān 4:10-12).
3. Ki-tok ê thiàⁿ ê le̍k-sú-tek hoat-tián
Ki-tok ê chhut-hiān sī Siōng-tè ê thiàⁿ chin toā ê soat-bêng. Goá thong-koè hit ê thiàⁿ ê le̍k-sú-tek sū-si̍t, chhim-chhim siū Siōng-tè ê thiàⁿ ê le̍k-sú-tek hoat-tián. Tī hit ê lī-kí-tek Lô-má sî-tāi chhut-hiān hit khoán put-su-gī ê thiàⁿ, tuì lâng lâi khoàⁿ sī chin toā ê oân-sêng; siāng-sî tuì le̍k-sú lâi khoàⁿ sī thiàⁿ í-keng ta̍t kàu tī choè-āu ê koân-tiám. Jîn-luī bô pit-iàu siūⁿ Iâ-so͘ ê thiàⁿ í-siōng ê thiàⁿ; Iâ-so͘ ê thiàⁿ nā kā i khui-khoah, chiū thang ǹg-bāng lí-sióng kok kiàn-siat tī toē-chiūⁿ. Chit ê thiàⁿ ê oân-sêng-chiá chiū-sī Ki-tok , chit ê thiàⁿ ū chiap-chhiok-tio̍h ú-tiū ê pún-chit; só͘-í chit ê thiàⁿ só͘ thóng-tī ê siā-hoē lán kiò-chò Siōng-tè kok, kiám ū sím-mi̍h put-su-gī? Lán siūⁿ tī chit ê Siōng-tè kok ê lāi-bīn oē thang hoat-kiàn-tio̍h lí-sióng-tek siā-hoē ūn-tōng ê pún-chit.
Siā-hoē ê kái-chō , m̄-sī kan-ta keng-chè ê būn-toê nā-tiāⁿ, chiū-sī seng-lí-tek bô lêng-le̍k-chiá, sim-lí-tek, tō-tek-tek bô lêng-le̍k-chiá, ēng thiàⁿ lâi chòng in ê la̍t, tī hia chiah oē-tit khui-ǹg oân-choân ê sè-kài ê toā-lō͘. 19 sè-kí ê boé "tò-tńg lâi Ki-tok" ê siaⁿ chám-jiân ū hióng-èng; nā-sī koan-liām-tek kàu-gī chú-gī-chiá, tī thiàⁿ ê tiong-kan, boē thang khoàⁿ-tio̍h "Bô tio̍h-tak ê." In chiong Siōng-tè kap thiàⁿ pun-lī, chiong Ki-tok kap si̍p-jī-kè pun-lī, chiong tit-kiù kap si̍t-chāi pun-lī.In uī-tio̍h beh chō-chhut Siōng-tè , lâi thâi-sí Ki-tok. Chóng-sī beh bat oa̍h-oa̍h ê Siōng-tè, chiū-sī bat thiàⁿ ê Ki-tok sī tē-it kín! Cháiⁿ-iūⁿ tē-it sè-kí ê hiaⁿ-tī bô sioh châi-sán lâi saⁿ-thiàⁿ; cháiⁿ-iūⁿ tē-jī sè-kí ê Ki-tok-tô͘ m̄-kiaⁿ pek-hāi, tian-tò tī siū-khó͘-tiong lâi kiù pa̍t lâng; tē 10 sè-kí siāng o͘-àm ê sî, iáu-kú thang khoàⁿ-tio̍h hiaⁿ-tī-ài ê soàⁿ bô tn̄g; 13 sè-kí chiū tī Se-tek ū hia̍p-chō͘ siong-ài ê ūn-tōng kiat-sêng; 14 sè-kí chiū ū Sèng Hú-lân-si-su ê ūn-tōng, ti̍t-ti̍t lâu kàu kin-á-ji̍t; só͘-í thang thiàⁿ ê Ki-tok ūn-tōng, m̄-bián sit-bāng ê pit-iàu. "Jîn-ài éng-oán boē bô--khì." Sù-tô͘ Pó-lô só͘ kóng ê oē chin-chiàⁿ tio̍h! Goá in-uī sìn chit ê thiàⁿ sī sià-bián choē-jîn , kái-hòng lô͘-lē, hō͘ bîn-cho̍k thoân-kiat, hō͘ kai-kip hoè-tiāu; só͘-í éng-kiú sìn Iâ-so͘ só͘ kà-sī ê Siōng-tè kok ê ūn-tōng.
Chóng-sī chit ê Siōng-tè kok ê ūn-tōng, m̄-sī lí-lūn , sī tī éng-kiú ê si̍t-hêng, kap tī éng-kiú ê hōng-sū ê tiong-kan lâi hoat-hiān, kan-ta chheng-ho͘ " Chú ah, Chú ah ê bô it-chīn ji̍p thian-kok." Khoàⁿ-kò͘ sè-kài choè loán-jio̍k ê, bô thang chhēng ê hō͘ i chhēng , iau-gō ê hō͘ i chia̍h, chhuì-ta ê hō͘ i lim, hó khoán-thāi chhut-goā lâng, uì-būn pīⁿ-lâng, thàm-hóng tī kaⁿ-nih ê, tī hia chiah ū Ki-tok ūn-tōng ê éng-kiú-sèng!
Siōng-tè pí siā-hoē ūn-tōng khah toā, chóng-sī Siōng-tè tī siā-hoē ūn-tōng ê tiong-kan, hián-chhut I ê thiàⁿ. Ki-tok pí siā-hoē ūn-tōng khah toā, chóng-sī Ki-tok tī siā-hoē ūn-tōng ê tiong-kan hián-chhut I ê thiàⁿ, si̍t-chāi ū-iáⁿ. Iâ-so͘ tī kin-á-ji̍t iû-goân tuì lán kóng, "Kìⁿ-nā bô tī goá lâi tio̍h-tak ê, ū hok-khì." (Oân)