"P.A.R.S."kap ECUMENICAL FELLOWSHIP
Phó͘-sè kàu-hoē chong-kàu ko-kip gián-kiù pan kap bêng-ū chióng-ha̍k-kim
(Chāi Bí-kok Khó͘ Heng-jîn pò)
1958年3月831期 p.20-21
Sū-giân:
Iâ-so͘ Ki-tok ê hok-im m̄-sī kan-ta beh hō͘ te̍k-soán ê bîn-cho̍k, á-sī chi̍t pō͘-hūn te̍k-sû kai-kip ê lâng hióng-siū. Sī beh hō͘ choân sè-kài phó͘ thiⁿ-ē, bān peh-sìⁿ lóng ū hūn(Lō͘-ka 2:10). Iâ-so͘ kóng, " Lín tio̍h khì chio bān peh-sìⁿ lâi chò ha̍k-seng, kā in kiâⁿ sé-lé, hō͘ in kui tī Pē, Kiáⁿ, Sèng-sîn ê miâⁿ"(Má-thài 28:20). Siat-sú chò Iâ-so͘ ê ha̍k-seng sī kan-ta uī-tio̍h kò-jîn ê hēng-hok, pêng-an á-sī beh siám-pī chiong-lâi ê sím-phoàⁿ. án-ni sī chin khó-lîn, oē hō͘ siā-hoē thó-iàm, lī-kí chú-gī bē hoat-kng, sī bô chok-iōng ê Ki-tok-tô͘. án-ni chiū-sī bô bêng-pe̍k thiⁿ-téng ê Siōng-tè tuì I ê to̍k-siⁿ Kiáⁿ Iâ-so͘ Ki-tok só͘ hián-bêng hō͘ lán ê chí-ì.
Jī-cha̍p sè-kí kho-ha̍k, bu̍t-chit bûn-bêng ê chìn-pō͘ kap kau-thong ê hoat-ta̍t. Sè-kan lâng pí í-chêng put-chí khah chai-iáⁿ lâng só͘ teh toà chit ê sè-kài koh-iūⁿ ê chêng-hêng. Tuì án-ni kin-á-ji̍t ê Ki-tok-tô͘ ū tuì chiah ê sin ê chhì-kek só͘ sán-seng ê chū-kak. Koh chit pái pek-chhiat teh siūⁿ tī chit ê sî-tāi ê chek-jīm kap kú-thé(sic.) ê kang-chok.
Kám-siā Siōng Chú ê un-tián, tāi-ke put iok jî-tông hoat-hiān tio̍h m̄-bat Iâ-so͘ ê lâng sī pí bat ê lâng khah-chē,( kin-kù 1949 nî ê thóng-kè, sìn Iâ-so͘ ê lâng put-kò sī choân sè-kài jîn-luī ê saⁿ-hūn-chi̍t nā-tiāⁿ). Tāi-ke án-ni kám-kak choè Ki-tok-tô͘ ū sit-liáu pún-hūn. "Iâ-so͘ sī sè-kài ê î-it ê ǹg-bāng. Lán ê pún-hūn chiū-sī ài chiong Iâ-so͘ Ki-tok ê hok-im thoân tī bān peh-sìⁿ ê tiong-kan."Che m̄-sī sin ê ūn-tōng á-sī kháu-hō, chit ê sī lán ê Chú tuì ta̍k sî-tāi ê Ki-tok-tô͘ só͘ kau-tāi Thiⁿ-pē sûn-choân ê chí-ì; put-kò ū ēng chit-kù sī kū koh sī Sèng-keng ê oē, chóng-sī tī Eng-gú tuì 20 sè-kí í-lâi chiah khah ū teh ēng ê oē lâi piáu-hiān koh chi̍t-pái ê hùn-hoat kap ló͘-le̍k. Koh kî-thāi ū saⁿ-kap hia̍p-chok saⁿ-kap kè-e̍k, tuì án-ni oē-thang siu khah toā ê hāu-kó. Chit kù oē kiò-choè "Ecumenical,"lán kiám-chhái thang hoan-e̍k choè Phó͘-sè kàu-hoē á-sī chiàu hit ê loē-iông, chiū-sī Phó͘-sè kàu-hoē liân-bêng(chit kù oē sī hêng-iông-sû, só͘-í oē ēng tī chin-choē bêng-sú(sic.) ê thâu-chêng), goân-lâi sī tuì Lō͘-ka 2 chiuⁿ 1 chat " Thiⁿ-ē," Hi-lia̍p goân-bûn ê ì-sù chiū-sī chí lâng só͘ toà ê tê-kiû(sic.), koh pau-hâm chhin-chhiūⁿ tāi-ke lóng toà tī chi̍t keng chhù ê khoán-sit(Khoàⁿ tê-thâu ê sè-tiuⁿ oē).
Pún-tê:
Tuì Bîn-kok 44 nî, (Chú-āu 1955 nî), tī Bí-kok New York Hia̍p-hô Sîn-ha̍k-īⁿ(Union Theological Seminary, chhiáⁿ khoàⁿ 27 bīn ê siōng-phìⁿ) ū chhòng-pān bī-cheng-iú(sic.) ê kè-e̍k, chiū-sī chiām tēng 5 nî kú, siat-hoat muí nî tuì choân sè-kài kok tē-hng lâi thiau-soán nî chheng, chiân-tô͘ iú-uî ê Ki-tok-tô͘ chí-tō chiá 25 ê, hō͘ in chi̍t nî kú saⁿ-kap chò-hoé seng-oa̍h, tâm-lūn, kau-poê, gián-kiù. Tuì án-ni chhim-chhim ǹg-bāng oē toā-toā kòng-hiàn tī tâng-sim ha̍p-it kóng-khoah Chú ê hok-im.
Chhòng-pān ê sian-kak-chiá kā chit ê te̍k-pia̍t chiat-bo̍k hō miâ kiò "PARS" (Program of Advanced Peligio͘s Studies), bô ēng Sîn-ha̍k siōng, á-sī Ki-tok-kàu chò bêng-sû, ēng "Religio͘s" (chong-kàu)ê tōng-ki chiū-sī ài pau-hâm khah-khoah ê hoān-uî. (Só͘-í kin-nî thâu chi̍t pái ū chi̍t ê Hoê-kàu-tô͘ ê Tāi-ha̍k kàu-siū chham-ka).
Chit ê kè-e̍k 5 nî kú ê só͘ huì it-chhè tuì chio̍h-iû ki-kim uí-oân-hoē hōng-hiàn kau-tāi táng-sū-hoē kap Hia̍p-hô Sîn-ha̍k-īⁿ siat-hoat chit tiâu chióng-ha̍k kim hō miâ kiò chò Ecumenical fellowship, kiám-chhái chiàu goá só͘ lí-kái tio̍h ài e̍k chò Phó͘-sè kàu-hoē bêng-ū chiong-ha̍k-kim(sic.). Tuì án-ni " PARS" pia̍t miâ kiò Ecumenical Program(Phó͘-sè kàu-liân te̍k-pia̍t chiat-bo̍k).
Kám-siā Siōng Chú ê an-pâi, tit-tio̍h bó-hāu Tióng-êng Tiong-o̍h ê chhui-chiàn, siū tio̍h Chóng-hoē soán-sàng uí-oân-hoē ê thê-poa̍t. Koh choè-āu tit-tio̍h Bí-kok chú-pān tông-kio̍k(sic.) bô khì-hiâm, hō͘ goá tit-tio̍h chin toā ê kong-êng, chò lán Tâi-oân ê kàu-hoē thâu chi̍t pái ū hūn tī chit ê hok-khì. Goá ài chioh choá-bīn tuì chu-uī sian-poè chhim-chhim kám-siā kap piáu kèng-ì.
Tī chia seng-oa̍h kok-hāng ê loē-iông hui-siông ê hong-hù; nā beh siông-sè lâi siá kiám-chhái oē chiâⁿ-chò chi̍t pún sió-chheh, sū-si̍t-siōng choá bīn iā bē iông-ún, só͘-í goá ài ēng choè kán-tan ê hong-hoat hun choè ē-bīn kuí-hāng lâi siá, nā oē tàng choè tāi-ke tām-po̍h ê chham-khó chiū chin bān-hēng.
(I) Jī-gō͘ ê lâng tuì tó-uī lâi, sím-mi̍h khoán ê lâng lâi tī chia.
Kin-nî tō͘(1957-1958) sī tē 3 nî , tuì sè-kài kok-kok ê kàu-hoē ki-koan thê-miâ chham-ka, chho͘-sím ê ū 200 goā ê. Chho͘-sím liáu-āu 75 ê, siū kéng chham-ka ho̍k-sím āu lâi tuì chit tiong-kan chhú 25 ê lâng.
(1) Tuì kok-che̍k lâi hun:
Tuì 17 kok lâi, chū-iû Tiong-kok 1, Eng-kok 2, Hoat-kok 1, Tek-kok 1, ìn-tō͘ 4, Ji̍t-pún 2, Hân-kok 1, Nî-gâ-lī-a(Nigeria Hui-chiu) 1, Pa-ki-su-thàn 1, Pho-to-lī-ko (Puerorico) 1, Hui-li̍p-pin 2, Lâm Lô-tí-se-a (So͘th Rodesia, Hui-chiu) 1, Thó͘-ní-kî 1, Eng-kok se ìn-tō͘ 1, Lâm Hui-chiu Kiōng-hô-kok 1, Bí-kok 3, (tiong-kan chi̍t ê sī Hawaii), Yogoslavia 1, (chiàu Eng-bûn ê jī-bó ê sūn-sū).
(2) Tuì só͘ sio̍k ê kàu-hoē he̍k-sī chong-kàu lâi hun:
M̄-bián kóng, chí-ū chi̍t ê Hoê-kàu tô͘ í-goā, lóng sī Ki-tok-tô͘ hit ê só͘ sio̍k ê kàu-phài chhin-chhiūⁿ ē-bīn: Tiúⁿ-ló Kàu-hoē 9, Bí-í-bí-hoē (Methodist)4, Sèng-kong-hoē 3, Cho͘-ha̍p Kàu-hoē 3, Hô-lân Kui-chèng Kàu-hoē 1, Lō͘-tek-hoē 1, Chìm-sìn-hoē 1, Hi-lia̍p Chèng-kàu-hoē 2.
(3) Tuì sèng-piat kap nî-hoè lâi kóng:
Lâm--ê chiàm choè-toā to-sò͘ 22 ê, lú--ê 3 ê ; choè nî-khin--ê 29 hoè, choè chē hoè--ê 46 hoè, chóng-sī toā-pō͘-hūn lóng tī 32-35 hoè ê tiong-kan.
(4) Tuì kok lâng ê kang-chok chit-gia̍p lâi khoàⁿ:
Toā-pō͘-hūn sī bo̍k-su , Sîn-ha̍k-īⁿ ê kàu-siū; ū 6 ê pêng-sìn-tô͘, tiong-kan nn̄g ê sī Y.M.C.A. ê chóng-kàn-sū; kî-thaⁿ 4 ê sī kàu-io̍k-ka, ha̍k-hāu ê sian-siⁿ. (Boē-oân).
