Soán bîn ê chek-jīm
A-mô͘-sū 3:2
Dr. MacLeod siá
1958年4月832期 9-10
Chit phiⁿ sī Bó-hoē ê tāi-piáu Lâu Phok-sū (Dr. MacLeod), tī Tióng-êng Lú-tiong 70 chiu-nî hāu-khèng kì-liām lé-pài ê sî só͘ kóng ê. Kì-chiá tuì i ê goân-kó hoan-e̍k, chhut tī chia, liōng-pit m̄-nā Lú-o̍h ē thang tit-tio̍h bián-lē, chèng tho̍k-chiá iā beh tit-tio̍h kà-sī chiah tio̍h.
Kin-á-ji̍t goá ū hūn thang tī chia chham-ka chit keng Lú-ha̍k-hāu 70 chiu nî ê sēng-tián, kám-kak chin êng-hēng. Tuì Eng-kok Bó-hoē lâi ê chhéng-an, pún-ji̍t ē lēng-goā tha̍k, put-kò goá ài piáu-sī goá kò-jîn chhin-ài ê chhéng-an kap goá só͘ tāi-piáu ê Eng-kok chē-chē lín ê hó pêng-iú ê hó-ì lâi hō͘ lín.
Tī che 70 nî hāu-khèng ê sî, ēng lé-pài lâi khai-sí si̍t-chāi sī èng-kai ê. Lán soó teh khèng-chiok ê ha̍k-hāu m̄-sī lâng ê só͘ chò, si̍t-chāi sī Siōng-tè ê in-sù. Lán tī chia m̄-sī kan-ta beh siàu-liām lâng ê sêng-chiū , sī beh uī-tio̍h Siōng-tè só͘ chò ê lâi kám-siā. Só͘-í lán tī chia chiū-sī beh chhoē lō͘ thang kap Siōng-tè saⁿ-kap kìⁿ-bīn, ēng án-ni lâi khai-sí lán ê khèng-chiok.
Goá só͘ beh kóng ê Sèng-keng chat sī A-mô͘-sū 3 chiuⁿ 2 chat. "Tī tē-chiūⁿ bān-cho̍k tiong goá chí-ū bat lín, só͘-í goá beh pān lín it-chhè ê choē-koà." Kî-si̍t tī chit khoán sēng-tián ēng chit khoán ê Sèng-keng chat sī chhin-chhiūⁿ khah bô sek-tòng. Tī hoaⁿ-hí ê sî, bô kóng-khí hoaⁿ-hí kap kám-siā, lâi kóng sím-phoàⁿ. A-mô͘-sū sī khiā-khí tī Í-sek-lia̍t cho̍k choè khoàⁿ-oa̍h ê sî-kî. Kú-kú ū chiàn-sū saⁿ-chiⁿ tī in só͘ khiā-khí ê Ka-lâm tē, hiān-sî kok-ka í-keng pêng-hô lah. Só͘-í ki-hoē chin hó, seng-lí ū thàn-chîⁿ, Í-sek-lia̍t lâng lī-iōng nn̄g tiâu thong-siong ê lō͘-soàⁿ, thang chū-chi̍p kó͘-tāi kok-kok ê châi-hù. Thàn-chîⁿ chin khoài, chì-chió iā ū pō͘-hūn peh-sèⁿ seng-oa̍h ê thêng-tō͘ ū ti̍t-ti̍t thê-ko. Chit khoán hó ê sè-kéng lâng khoàⁿ chò sī Siōng-tè thiàⁿ-thàng ê kì-hō. Só͘-í chong-kàu ê lé-sek chi̍t-tiám-á to bē hō͘ lâng siū kám-bêng , chí-ū chin toā koh ta̍t-chîⁿ ê seng-lé, chiàu siông tī-teh pâi-siat. Peh-sèⁿ kan-ta jia̍t-sim ài khoàⁿ chong-kàu gî-sek jî-í. Koh chêng-hêng m̄-sī kan-ta án-ni nā-tiāⁿ, sui-jiân in ài hiàn hó-khoàⁿ ê seng-lé, iáu-kú in tuì Siōng-tè kong-gī kap lîn-bín ê iàu-kiû sī chin léng-tām kok hong-biān to ū ap-chè, kai-kip khah koân ê lâng tō-tek hú-pāi, hó-gia̍h lâng le̍k-sek sòng-hiong lâng, in bē sòng-hiong lâng lâi tit-tio̍h gîn, ū sî hit ê kè-siàu sī ta̍t chi̍t siang chháu-ê ê chîⁿ nā-tiāⁿ. Sū-gia̍p kài bô láu-si̍t, só͘-í thian-pêng bô kong-pêⁿ, niū-chhut khi-chà, niū-ji̍p khek-po̍k.
Koan-hē ho̍k-sāi Iâ-hô-hoa ê sū, chē-chē īⁿ-pang ê gî-sek lóng ho̍k-oa̍h. ēng hit hō m̄ ta̍t chîⁿ ê hong-hoat lâi teh kèng-pài Í-sek-lia̍t ê Siōng-tè. In ēng Siōng-tè ê miâ soó teh si-hêng ê kèng-pài bē thang hō͘ in koh khah ū jîn-ài kap kong-gī. Toā to-sò͘ ê lâng khoàⁿ in ê hiān-chōng chò boán-chiok, chhin-chhiūⁿ án-ni, hō͘ in jú lâi jú piàn pháiⁿ.
Taⁿ A-mô͘-sū sī hiuⁿ-ē chhut-sin chi̍t ê sim-koaⁿ sûn-chin, sìn-gióng jia̍t-chhiat lâi beh soan-pò sím-phoàⁿ ê lâng. I ū kong-bêng chèng-khak thoân-pò kóng Siōng-tè ê sím-phoàⁿ tek-khak beh kàng-lîm tī seng-oa̍h tuī-lo̍h, sìn-gióng oai-chhoa̍h ê peh-sìⁿ ê téng-bīn. I kóng pang-kok tek-khak tio̍h bia̍t-bô, bô beh lâu poàⁿ hāng, "Gâu-cháu ê boē-oē tô-thoat, ióng-chòng--ê bô la̍t bé,"(2:14). Che chiū-sī i só͘ thoân-pò ê lóng-chóng ê sím-phoàⁿ.
Taⁿ chit khoán ê thoân-pò chāi Í-sek-lia̍t lâng lâi khoàⁿ sī sin--ê. Í-sek-lia̍t peh-sìⁿ ka-kī siong-sìn chò sī siū kéng-soán ê peh-sìⁿ , sī Siōng-tè siū kéng-tiàu beh chiâⁿ-chò te̍k-pia̍t siū koàn-kò͘ ê tuì-siōng.
In tuì A-ki̍p tit-tio̍h tháu-pàng, siū ín-chhoā keng-koè khòng-iá, koh ēng Ka-lâm tē hō͘ in chò ke-gia̍p , tuì peh-sìⁿ ê tiong-kan heng-khí chē-chē sian-ti, thang hō͘ in bat Siōng-tè ê tō-lō͘. Í-sek-lia̍t peh-sìⁿ si̍t-chāi sī ū te̍k-koân ê jîn-bîn, Siōng-tè tī koè-khì ū khoàⁿ-khò͘ in, tī A-mô͘-sū ê sî-tāi lâng-lâng lóng siūⁿ chò Siōng-tè ún-tàng kú-kú ē koh khoàⁿ-kò͘ in. Koè-khì tit Chú chiok-hok, soà hō͘ in siūⁿ chò ji̍t-āu iû-goân ū thò-tòng ê pó-chèng thang chiap-soà tit-tio̍h chiok-hok. M̄-kú A-mô͘-sū kóng, "Tī tē-chiūⁿ bān-cho̍k tiong goá chí-ū bat lín , só͘-í goá beh pān lín it-chhè ê choē-koà" ì-sù chiū-sī kóng, Lín koè-khì ū tit-tio̍h te̍k-pia̍t ê koân-lī kap hó ki-hoē, chit ê sī ū pau-hâm te̍k-pia̍t ê chek-jīm tī-teh. In-uī lín bô hū-khí chit ê chek-jīm, só͘-í sím-phoàⁿ sī bē tô-siám--tit.
(Thāi-sio̍k).
