"P.A.R.S."kap ECUMENICAI FELLOWSHIP
Phoó-sè kàu-hoē chong-kàu ko-kip gián-kiù pan kap bêng-ū chióng-ha̍k-kim
Chāi Bí-kok Khoó Heng-jîn pò
1958年4月832期 15-17
II. Teh gián-kiù tâm-lūn sím-mi̍h
(Goá tī chia chí-ū ē thang pò-kò tú-chiah kiat-sok ê thâu chi̍t ha̍k-kî.)
(1) Pit-siu ê kiōng-tông ê sián-kiù kap thó-lūn.
a)Ki-tok-kàu soan-kàu ê le̍k-sú:
Chú-jīm kàu-siū sī Bí-kok Iâ-ló͘ (Yale) Tāi-ha̍k ê le̍k-sú-ha̍k, bêng-ū kàu-siū Keⁿeth Scott Lato͘rette Phok-sū. I bat tī lán Tiong-kok chò soan kàu-su kú-kú . I ē tàng tha̍k 7,8 kok ê chheh. Kàu-chhâi sī tuì chong-kàu kái-kek āu khí, kàu hiān-kim ê Phó͘-sè soan-kàu ê le̍k-sú, tú-tú sè-kài se̍h chi̍t-chiu, Muí lâng tio̍h siá chi̍t phiⁿ ê lūn-bûn kap tha̍k i ê tù-chok, 3 pún iok 2000 bīn ê soan-kàu-sú, chham-ka chhì-giām.
b)Ki-tok-kàu kap hui Ki-tok-kàu ê sìn-gióng kap chú-gī:
Chú-jīm kàu-siū sī Phó͘-sè Kàu-liân Tang A ê kàn-sū Rajah B. Manikam Phok-sū.
Káng-gī liáu chiū chi̍t tiám-cheng kú ê chō-tâm thó-lūn , hióng-siū tê-piáⁿ. Muí lâng tio̍h ài kau lūn-bûn chi̍t phiⁿ, ū kài-siāu chiaⁿ cha̍p pún á-sī 3 pún. Chi̍t ha̍k-kî chù-tiōng tī ìn-tō͘ kàu, Hu̍t-kàu kap tī Tang A sin-heng ê chong-kàu.
c) Kàu-hoē ê chek-jīm kap só͘ biān-lîm ê būn-tê:
Chit ê lāi-bīn só͘ pau-hâm ê loē-iông hui-siông ê chē, chhin-chhiūⁿ Sîn-ha̍k kàu-io̍k ê būn-tê. Kàu-hoē só͘ pān tāi-ha̍k, tiong-ha̍k , kàu tī Chú-ji̍t-o̍h, ka-têng kàu-io̍k būn-tê, kàu-hoē chèng-tī būn-tê , ū sî gī-lūn kàu tī kok kàu-phài ê kàu-lí būn-tê.
Hū-chek chí-tō ê kàu-siū sī chit ê gián-kiù-hē(Program) ê chú-jīm, Phó͘-sè kàu-hoē gián-kiù(Ecumenical Study) ê choan-ka, Ralph.D. Hyslop Phok-sū. (I kū-nî chiaⁿ-goe̍h boé ū khì lán Tâi-oân). I kap i ê ka-cho̍k oân-choân kap chit 25 ê ha̍k-oân(學員) chò-hoé seng-oa̍h.
Chit ê chiat-bo̍k sī choè chhù-bī, koh choè ū jia̍t-khì. Muí lé-pài ê pài-it kap pài-sì tuì chò-hoé chia̍h àm-tǹg khai-sí, tāi-khài 3 tiám cheng-kú. Phó͘-sè kàu-hoē ê chí-tō-chiá. Hia̍p-hô Sîn-ha̍k-īⁿ ki̍p ki-thaⁿ kah chit ê Program ū koan-hē kàu-siū lóng chham-ka. Goán 25 ê lûn-liû chò chú-se̍k, hoat-tê káng-ián, chha-put-to chi̍t sió-sî, jiân-āu sûn-būn kap thó-lūn kok lâng hoat-piáu ì-kiàn. Ū te̍k-pia̍t ê lâng-kheh tuì Eng-kok, Tek-kok, Ka-ná-tāi lâi , iā ū pâi in ê chiat-bo̍k tī chit ê lāi-bīn. Tuì án-ni ē-thang kìⁿ tio̍h chin iàu-kín ê lâng kap bêng-pe̍k tī sè-kài ta̍k só͘-chāi, kàu-hoē ê chêng-hêng. Í-siōng só͘ kóng ê ha̍k-kho nā lóng ki̍p-keh, chiū tit tio̍h Ecumenical fellow ê kiat-gia̍p(結業)chèng-su, koh siu tit ê ha̍k-hun ē thang sǹg chò se̍k-sū á-sī phok-sū , ha̍k-uī ê chi̍t pō͘-hūn.
(2) Soán-siu ê pō͘-hūn, pī-pān chiong-lâi choan-bûn ê kang-chok.
Chit ê oân-choân kin-kù kò-jîn ê choan-bûn kap su-iàu. Tī chú-jīm ê chí-tō hā thang tuì hū-kīn ê ki-koan, chhin-chhiūⁿ Hia̍p-hô Sîn-ha̍k-īⁿ á-sī Columbia Tāi-ha̍k soán khò chìn-siu.
III. Ki-thaⁿ ê chiat-bo̍k.
(1) Thè-siu-hoē.
Muí ha̍k-kî ê khai-sí í-chêng , chha-put-to chiân-āu saⁿ-ji̍t , khì chi̍t ê chin an-chēng ê kau-goā, kiò chò Pendle hill, tuì Liú-iok chē chhia chha-put-to 3 sió-sî, hia ū chi̍t ê chhut-miâ ê Kuì-kek-hoē ê tiong-sim(Quaker Centre). Tī hia ū ē-bīn ê chiat-bo̍k. (a) Ki-tó-hoē (b)Chò Ki-tok-tô͘ ê seng-oa̍h keng-giām ê pò-kò, (siū chí-miâ ê lâng ài kóng). (c) Hoat-tê chō-tâm (d) oán-chiok , thit-thô.
(2) Hóng-būn kàu-hoē.
Chham-koan, hóng-būn kàu-hoē kap hoē-iú ê kau-poê, sī chi̍t hāng chin iàu-kín ê chiat-bo̍k. Siông-siông tī chiu-boa̍t á-sī lī-iōng hioh-khùn ê sî, kàu-hoē ē lâi chhiáⁿ chiah-ê ha̍k-oân , ū sî chò(chó)-hoé, ū sî hun-khui , ū sî tī Liú-iok ê kau-goā, ū sî sī put-chí khah hn̄g ê só͘-chāi; chò chú-lâng ê hoē-iú siông-siông sái-chhia lâi kàu goán ê siok-sià poâⁿ-chhiáⁿ,pài-la̍k àm tī in ê ka-têng siū in hó khoán-thāi. Keh ji̍t lé-pài chò-hoē kàu sèng-tiān chò lé-pài , hóng-būn Chú-ji̍t-o̍h, ū sî siū chhiáⁿ tio̍h ài tuì hoē-chiòng á-sī Chú-ji̍t-o̍h ha̍k-seng tì-sû, hit ē-po͘ koh chài goán kàu goán ê siok-sià. Thang kóng ìn-siōng choè chhim ê chi̍t hāng chiat-bo̍k; tī kau-poê ê tiong-kan put-sî kám-kak lán sī sio-siāng kèng-pài chi̍t ê Chú, bô hun o͘ pe̍h ê bīn-sek, koh-iūⁿ ê seng-oa̍h, si̍p-koàn, chin-chiàⁿ Iâ-so͘ sī sè-kan lâng ê Kiù-chú; m̄-sī kan-ta pe̍h-lâng ê Kiù-chú.
(3) Lú-hêng.
Chēng-ka kiàn-se̍k sī chi̍t kiāⁿ chin iàu-kín ê kàu-io̍k , só͘-í chú-pān ê tong-kio̍k ū chún-pī chi̍t-tiâu só͘-huì hō͘ ha̍k-oân beh tò-khì ê sî sūn-lō͘ lú-hêng, tuì án-ni , ū-ê ē khì Pak Bí, Ka-ná-tāi, ū-ê ē khì Au-chiu Eng-kok.
IV. Ta̍k-ji̍t ê seng-oa̍h.
Tuì í-siōng kán-tan ê kài-siāu thang chai ta̍k-ji̍t ê seng-oa̍h hui-siông ê bô êng, chóng-sī khoài-lo̍k koh ū ì-gī. Jī-cha̍p-gō͘ ê lâng lóng toà tī chi̍t keng 7 chàn ê chhù, ta̍k lâng ū kò-pia̍t ê pâng(pang)-keng, it-chhè siat-pī chiu-chì, ū tâm-oē kau-poê ê kheh-thiaⁿ, hiān-tāi-sek lī-piān ê tû-pâng, peng-siuⁿ, tiān-lô͘, put-koán-sî beh sio, beh léng lóng lī-piān, muí 4 ê lâng chiū ū kong-kiōng ê e̍k-keng, e̍k-tî, put-sî sio-chuí piān-piān. Chú-chí chiū-sī m̄ ài hō͘ goán ū phah-sńg ê sî-kan, chiah ê lâng ê seng-oa̍h chiâⁿ-chò Hia̍p-hô Sîn-ha̍k-īⁿ 600 goā ê ha̍k-seng só͘ him-soān ê bo̍k-phiau.
Tī chit keng chhù ê lāi-bīn ū chi̍t keng lêng-sèng seng-oa̍h ê tiong-sim, sè-keng lé-pài-tn̂g, kiò-choè "PARS CHAPEL" iáu koh chi̍t keng sī jio̍k-thé seng-oa̍h ê tiong-sim, chū-chhan ê chhan-thiaⁿ. Khiok chit ê chhan-thiaⁿ chi̍t lé-pài chí-ū ēng nn̄g pái, kî-thaⁿ lóng ài tī Sîn-ha̍k-īⁿ ê kiōng-tông chhan-thiaⁿ, bo̍k-tek ài beh hō͘ tāi-ke koh khah khoah ê kau-poê. (Hiān-chāi 協和神學院 ū 90 goā ê tuì 31 kok lâi ê goā-kok ha̍k-seng), muí chá-khí(khì) 8 tiám poàⁿ tī Sîn-ha̍k-īⁿ ê lé-pài-tn̂g (James Chapel), lé-pài choè chi̍t ji̍t ê khai-sí, muí eng-àm 10 tiám tī ka-kī ê sió lé-pài-tn̂g(PARS Chapel) tāi-ke lûn-liû chò chú-lí, kî-tó-hoē chò chi̍t ji̍t ê kiat-sok. Kî-tó-hoē thang ēng kok-lâng kàu-hoē thoân-thóng ê si̍p-koàn hong-sek, pêng-sò͘ sī lóng ēng Eng-gú, chóng-sī ū sî chú-lí ê lâng ài lâng ēng i ka-kī ê khiuⁿ-kháu lâi kî-tó , hit ê sî thiaⁿ ē-hiáu ê chí-ū A-men nā-tiāⁿ , hō͘ goá chiū siūⁿ-tio̍h Pa pia̍t ê thah. Hó ka-chài bat chi̍t kù "A-men", bô chiū m̄-chai kî-tó liáu á boē.
Taⁿ í-siōng bô sím-mi̍h hē-thóng chiong tām-po̍h ê kám-sióng kap só͘ chai pâi-lia̍t.
Goān Siōng-tè chiok-hok lán Tâi-oân ê kàu-hoē , ū kian-kò͘ khiā-chāi e sîn-ha̍k ki-chhó͘, hō͘ lán tī Phó͘-sè kàu-hoē ê tīn-soàⁿ bô khah su pa̍t-kok ê kàu-hoē , gâu chhoā lâng kui Chú êng-kng I ê sèng-miâ.
Pi-bi ê lô-po̍k: Khô͘ Heng-jîn.
Tī Bí-kok New York
Hia̍p-hô Sîn-ha̍k-īⁿ.
Chiaⁿ goe̍h 26 ji̍t siá.
