首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 釘十字架的基督
釘十字架的基督
卷期：第833號 本次： 日期：1958/5 刊名：台灣教會公報 頁數：9
篇名：釘十字架的基督 [ Tèng si̍p-jī-kè ê Ki-tok ]
作者：歐晉安 Au Chìn-an
  顯示 : 漢羅 全羅 並列  

釘十字架的基督

歐晉安

1958年5月833期       9-11

 

  =本篇是今年受難週佇士林總統佮總統夫人播送正道的時，受選聘 siāng時去播送的 歐牧師的講道。每年一擺這款的播送已經成做全國所注重。歐牧師應記者的 要求將講播 的全文出佇遮，請讀者注意讀。=

今仔日是全世界敬虔的基督徒所無袂記得做感激的日子。咱記念耶穌基督佇世間33 歲 的今仔日，為著人類釘佇十字架。基督的死是世界歷史上最偉大的事件。伊的死是做改造人類，世界的 原動力。世界假使無有耶穌來，抑是伊無受釘十字架，這个世界一定佮今仔日的 現狀差真濟。

為甚物緣故耶穌基督的人生只有33 歲nā-tiāⁿ？伊若佮孔子平平活73 歲，抑是釋迦享壽80 歲 ，來相比較，精差真濟。為甚物因端伊無有善終，又且慘死佇十字架。

論耶穌受釘十字架，表面上的理由，是因為伊的對敵的勝利。耶穌佇世間的時，伊有真強惡的對敵。因為耶穌出頭傳道，伊的 人望親像早起時的日頭，日日那懸，濟濟人圍伊，綴伊，愛聽伊的講道。無久伊的 聲望就贏過當時的有力者，為著按呢惹起in 的怨妒心。

    又且耶穌的講道是憑照良心，講應該講的道理。伊也捌攻擊當時的 惡勢力的不法。這閣較惹起in 的毋願，所以計謀愛害耶穌。In 的詭計成功，耶穌就受釘佇十字架。

總是以上所講的，只有是表面上的理由nā-tiāⁿ，耶穌的死，實在有較深的意義。

耶穌一生有向這个目標，就是十字架。伊一生毋敢偏左，偏右，確信十字架是伊的使命。伊到該撒利亞腓立比的所在，有明明講伊著上耶路撒冷，予長老，祭司頭，以及經學士害死。彼得進前khan手阻止伊講，主毋通按呢想，這決斷無夠佇你。耶穌責備彼得講，撒旦退去。伊看彼得是予撒旦利用teh講話。伊掠向十字架做所插的 pio teh進前。

咱若看福音書，就會明白這項事；就是假使耶穌若毋是死，對敵的計謀是落空的。伊的對敵的本營是佇耶路撒冷，這个城信伊的人少，所以伊是無有需要去遐。伊知歹人設計欲害伊，彼个危險的所在是耶路撒冷。總是聖經記「時到，耶穌決意向耶路撒冷。」伊入城soà傳道理，對敵才派人掠伊。伊受掠的時間是暗時，地點是野外客西馬尼園，所以伊若愛逃走是無問題。總是伊看對敵來進前去問看欲掠chī-chuī？伊伸手予in縛。彼時彼得拔刀，愛為耶穌交戰，總是主講，收你的刀，我kiám 袂會對父求12 營以上的天軍來救我mah？伊毋肯逃避，甘願受掠。

    In toà主到羅馬政府，用3項無實 的大罪告伊；主攏無分訴，恬恬承受無實 的判決。我想當時主若有辯明，伊是免受罪，總是伊確信，伊死佇十字架，是上帝所定 的旨意。伊甘願承受。

    1、耶穌的死是為義。

耶穌是歷史上最偉大的義人。義人就是為著社會 的歹teh憂傷，teh奮鬥，為義毋驚死的人。這號人實在是社會的至寶，社會應該保惜珍重。總是可惜，自古及今，義人多數是受棄sak，你看希臘的 蘇格（拉）底，抑是中國的孔子，攏是按呢。總是人為義犧牲伊的性命，就是正義tek聖。對古早以來濟濟先知聖人為義phoe死，in 的死都毋是落空g。In 的勇氣有激勵真濟人綴in 的跤步加入正義的戰爭。

耶穌基督是正義的主，伊來是欲為義來鬥爭。伊的死，對不義罪惡是最大的打擊。因為以後濟濟信耶穌的人也綴伊為義捨身。你看美國的 林肯，抑是中國的孫總理等，以外濟濟信耶穌的政治家，軍人，以及伊的學生，也抱基督的精神為義奮鬥。In 的勇敢犧牲，攏是對基督來學習的。

耶穌是正義的主，所以凡若愛正義的人著綴耶穌。今仔日的社會真欠正義的人。古早希臘的議士名Tai-o-ni-su(ダイオヂニス)佇日--時kia̍h 燈 teh chhoē義人，伊看當時社會義人真少。今日Tai-o-ni-su若閣來，穩當閣較著驚。今仔日的社會實在大欠耶穌的精神，欠學伊的心的人。

  2、耶穌的死是為愛。

耶穌的死也有較深的意思，就是為著疼人。伊毋是為著家己的事來死，是為著別人的事來犧牲。伊講，「人為著朋友獻性命，疼無有比這較大的。」這是伊teh暗示伊欲犧牲性命來救人。英國蘇格籣山地有一个媠的故事，有一个散鄉 的寡婦，佮伊一个細漢的囝，經過山地欲去伊的親戚的所在。伊出發的時天氣溫暖；總是伊行山地的時，天氣突然變冷，風雪真大，所以欲到目的地真困難。隔日有人chhoē著彼个婦人人，伊褪theh凍死佇雪 的內面，邊仔有一間寮仔，佇這內面伊的囝活活；因為老母褪伊的衫予伊得著溫暖來救伊的性命。

濟濟年後，佇某城一个牧師teh主持佈道會。彼暗風雪大，赴會的人少；牧師所講的，是拄仔所講彼个婦人人的故事。伊用按呢干證耶穌的疼，為咱來獻身，予咱得永活。幾若日後有一個欲死的人請彼个牧師到伊的厝。彼人講，牧師，彼暗 teh佈道，我因為閃避風入拜堂，聽你講一个老母的故事；彼个老母是我的老母，伊為著我死，我常常teh數念伊。總是我毋知上帝親像按呢疼我。多謝牧師因為主差你講彼个故事。我今知我的老母為我死，為我祈禱，毋是落空。按呢彼个老母犧牲，予伊的囝明白神的疼。耶穌死佇十字架，也是親像按呢。伊為著欲救咱才著死，聖經講，「伊替咱死予咱捌仁愛。」

世間無有比耶穌的疼較大的，伊毋是為著家己，毋是為兄弟，毋是為著朋友來死。伊是上帝的囝，為著欲救世人降世，為著救萬民伊甘願死。伊是上帝為著人來死。這號的疼是千古未有 的，空前絕後的，奇妙的，彼个長，闊，koân，深，你捌袂盡。世間無一項的疼通比伊的疼。保羅一旦明白耶穌的疼的時，伊講，「基督的疼催逼我，」伊因為主的疼獻身，做伊差用，報答主萬份一份的疼。

親愛兄姊，今仔日是記念耶穌的疼的日，現在是數念伊疼咱的時間。向望主才大的疼催逼咱，伊的話進到佇你，佇我的心內。

                                                          (未完)。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461