Soán-bîn ê chek-jīm(II)
A-mô͘-sū 3:2
Chiap chêng goe̍h hō tē 10 bīn
Dr. MacLeod siá
1958年5月833期 11-12
Taⁿ chit khoán ê sìn-sek tuì Í-sek-lia̍t lâng lâi khoàⁿ m̄-sī sin ê. Í-sek-lia̍t peh-sìⁿ sìn in pún-sin sī siū kéng-soán ê peh-sìⁿ, in ê kok-ka sī siū Siōng-tè kéng-tiàu, beh chiâⁿ-chò Siōng-tè te̍k-pia̍t koàn-kò͘ ê tuì-siōng. Siōng-tè sī tháu-pàng in thoat-lī Ai-ki̍p, chhoā in keng-koè khòng-iá, chiong Ka-lâm tē hō͘ in ê kiáⁿ-sun, tuì in peh-sìⁿ ê tiong-kan heng-khí sian-ti, beh thang hō͘ in chai-iáⁿ Siōng-tè ê tō-loō. Chiah-ê Í-sek-lia̍t peh-sìⁿ sī ū te̍k-koân ê peh-sìⁿ, Siōng-tè tī koè-khì ū koàn-kò͘ in. Só͘-í tī A-mô͘-sū ê sî-tāi ê peh-sìⁿ lóng siūⁿ chò koè-khì án-ni, chiū-sī chiong-lâi iā beh án-ni koàn-kò͘ in. Chhin-chhiūⁿ án-ni, tī koè-khì siū-tio̍h Siōng-tè hiah-nih toā ê chiok-hok, in soà kám-kak í-keng thò-tòng, tiāⁿ-tio̍h ē kè-sio̍k ài-sioh in.
A-mó͘-sū kóng, "Tī tē-chiūⁿ bān-cho̍k tiong goá chí-ū bat lín , só͘-í goá beh pān lín it-chhè ê choē-koà." Chiū-sī kóng, "Lín kì-jiân ū tit-tio̍h te̍k-pia̍t ê te̍k-koân kap hó ki-hoē, án-ni chiū-sī ū pau-hâm te̍k-pia̍t ê chek-jīm tī-teh . In-uī lín bô hū-khí chit ê chek-jīm , só͘-í sím-phoàⁿ sī bē tô-siám--tit ê."
Tī chia án-ni kóng, sī ū chi̍t hāng chin iàu-kín ê chong-kàu siōng ê goân-lí tī-teh. Lán ê te̍k-koân m̄-thang siūⁿ chò sī lán ū sím-mi̍h hó só͘ kiâⁿ só͘ tit-tio̍h ê pò-siúⁿ(m̄-sī chhin-chhiūⁿ koai ê gín-á tit-tio̍h chi̍t pau ê thn̂g-á.) Tit-tio̍h chit khoán te̍k-koân , sī beh hō͘ lán hó-hó lâi lī-iōng , si̍t-chāi lán sī ū chek-sêng chiong só͘ tit-tio̍h ê hó ki-hoē hó-hó lâi kā i lī-iōng.
Chit keng lú ha̍k-hāu kin-á-ji̍t kú-hêng chit ê 70 chiu-nî ê hāu-khèng, thang kóng sī tuì tī koè-khì só͘ sêng-siū--tio̍h ê in-sù. Chhiáⁿ hoê-sióng sú lán ha̍k-hāu ē-thang chiâⁿ chò kin-á-ji̍t, hit ê koè-khì ê kang-chok, hi-seng kap kî-tó. Chhiáⁿ hoê-sióng chiah-ê ū oán-kiàn ê lâng chio-chi̍p kuí-ê-á ha̍k-seng lâi khai-sí chit keng ha̍k-hāu. Chhiáⁿ hoê-sióng tong-sî ū ióng-khì kap chiah-ê kū sî-tāi ê phian-kiàn tí-khòng hiah-ê lâng. In-uī in ū hoán-tuì bô beh sêng-jīn kóng lú-chú kàu-io̍k sī bô lō͘-ēng. Chhiáⁿ hoê-sióng tong-sî ēng jím-nāi, ēng in-khîn lâi thê-ko ha̍k-hāu ê chuí-chún hiah-ê chē-chē sian-siⁿ , iā ló͘-le̍k lâi cheng-chhú chèng-hú ê li̍p-àn, koh chīn só͘ ē ê uī-tio̍h ha̍k-seng lâi pī-pān siōng hó ê kàu-io̍k. Chhiáⁿ hoê-sióng chiah-ê ēng hi-seng lâi hōng-hiàn chiah-ê kiàn-tiok-bu̍t thang chò ha̍k-hāu ê lō͘-ēng ê lâng. Chhiáⁿ hoê-sióng sui-jiân ū tú-tio̍h goā-kài ê chó͘-gāi , iáu-kú ū khó͘-sim ló͘-le̍k lâi pó-chhî ha̍k-hāu ê Ki-tok-kàu te̍k-sek. Koh chhiáⁿ hoê-sióng koè-khì ēng chin kiān-choân ê Ki-tok-kàu kàu-io̍k poê-ióng chē-chē iú-iōng ê jîn-châi kòng-hiàn tī kàu-hoē ê kiàn-siat.
Taⁿ kin-á-ji̍t chiah-ê hāu-sià, chiah ê lú ha̍k-seng kap chit ê hó ê hāu-iú-hoē, chū-chi̍p tī chia saⁿ-kap teh kan-chèng kóng koè-khì ê kang-chok m̄-sī kui tī khang-khang. Lán taⁿ ū chham-ka ji̍p tī chit ê toā ê thoân-thóng-nih, chiah-ê hó thoân-thóng lóng tī chia beh hō͘ lán. Lán tio̍h ē kì-tit, thang hoê-tap Siōng-tè kóng I só͘ hō͘ lán ê in-sù lán beh cháiⁿ-iūⁿ oa̍h-iōng. Lán só͘ tha̍k Sèng-keng só͘ kì niá gîn ê lô͘-po̍k ê phì-jū chiū-sī teh chí chit ê ì-sù. Chit ê phì-jū ê iàu-tiám chiū-sī kóng tit-tio̍h 5 chheng ê lâng i ū cháiⁿ-iūⁿ lâi oa̍h-iōng i ê hó ki-hoē.Ū lâng tit-tio̍h 5 chheng, ū lâng tit-tio̍h nn̄g chheng, iáu-kú nn̄g ê pêⁿ-pêⁿ lóng ū hó-hó lâi ūn-iōng in só͘ tit-tio̍h ê. Tit-tio̍h 5 chheng ê ū koh thàn 5 chheng lâi tit-tio̍h koh khah toā ê bu̍t-chit siōng ê pò-siúⁿ. Put-kò nn̄g ê pêⁿ-pêⁿ ū lī-iōng in ê châi-lêng ê lâng, pêⁿ-pêⁿ to ū chiap-siū tio̍h chheng-chàn-" Hó ah, hó koh chīn-tiong ê lô͘-po̍k." Niá tio̍h chi̍t chheng ê khì kā tâi tī thô͘-nih, bô hó-hó khì kā lī-iōng. Lâng m̄-sī kî-thâi i tio̍h khì thàn 5 chheng, lâng sī kî-thāi i ē-thang seⁿ tām-po̍h lī-sek. I sī in-uī bô khì oa̍h-iōng i ê ki-hoē chiah siū sím-phoàⁿ.
Taⁿ lán kin-á-ji̍t ū chit ê te̍k-koân lâi sêng-chiap koè-khì só͘ lâu hō͘ lán ê chi̍t keng hù-iú toā ê kàu-io̍k thoân-thóng ê hó ha̍k-hāu. Lán beh cháiⁿ-iūⁿ lâi kiám-thó chit ê te̍k-koân. Lán bē thang kan-ta chē-teh lâi ka-kī khèng-hō. Lán ê chek-jīm chiū-sī tio̍h chai-iáⁿ lán só͘ sêng-chiap ê tio̍h ài hó-hó pó-sioh hō͘ i hoat-tián.
Siat-sú ha̍k-hāu nā ū su-iàu sin ê kiàn-tiok , lán ê pún-hūn chiū-sī thè i chún-pī. Chit ê ha̍k-hāu tī koè-khì ū hui-siông kòng-hiàn tī lán ê kàu-hoē. Lán ê chek-jīm chiū-sī tio̍h kî-thāi tī chiong-lâi thang koh khah ū hó ê kòng-hiàn. So͘-í lán ê te̍k-koân chiū-sī ū pau-hâm lán ê chek-jīm tī-teh.
Lán tī chit ê hāu-khèng kiám ū si̍t-chāi tuì Siōng-tè piáu kám-siā. Kin-á-ji̍t lâi chham-ka chit ê sēng-tián, hit ê si̍t-sim tī ji̍t-āu tio̍h hō͘ i chiâⁿ-chò chi̍t khoán ê koan-sim , ài beh hō͘ ha̍k-hāu ē thang tit-tio̍h hēng-hok.
Te̍k-koân sī ū chek-jīm ê. Chú Iâ-so͘ kóng, "Tit-tio̍h in-sù khah chē ê, tio̍h chò khah chē thang lī-ek pa̍t-lâng."
(Oân)
