首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 祝禱的意義II
祝禱的意義II
卷期：第833號 本次： 日期：1958/5 刊名：台灣教會公報 頁數：14
篇名：祝禱的意義II [ Chiok-tó ê ì-gīII ]
作者：許德謙 Khó͘ Tek-khiam
  顯示 : 漢羅 全羅 並列  

祝禱的意義(II)

接前月號第12面

許德謙記

1958年5月833期        14-15

 

  2、祈求上帝的施恩。

    「願耶和華予伊的面的光照你-耶穌基督的恩典。」

上帝的面的光thang指耶穌基督的 恩典。耶穌基督是上帝的面的光(哥林多後書4：4-6)。

佇舊約已經預表欲來的耶穌基督是上帝的光。上帝的施恩是對耶穌基督的 恩典。上帝賜日光予世間萬項物，siāng時也賞賜耶穌基督予人類做心神的光佇烏暗的世界。對伊贖罪的功勞予咱知上帝就是光，是疼(伊約翰1：5，4：8，9)。有耶穌基督的 恩典，才知爸上帝的疼痛。請咱注意保羅的 祝禱 的順序：代先講願耶穌基督的 恩典，後來才講上帝的疼佮聖神的相通。這个意思是講，咱欲得著上帝的祝福，若無耶穌基督的恩典就袂通得著。在早摩西祈求上帝愛看上帝的面的榮光(出埃及記33：18)。總是看袂著。因為百姓犯罪，上帝受氣伊，摩西祈禱上帝憐憫百姓的 過犯。上帝講，「我欲施恩佇我所憐憫的 (出33：19)」。摩西teh祈求愛看上帝的面的光，可惜看未著上帝的面，只有看伊的 ka-chiah後。總是後來上帝佇耶穌基督的 恩典是甚物？就是應該死的罪人只有對信耶穌白白會得著赦罪。這是恩典。上帝欲施恩佇伊所施恩的。咱對耶穌基督的 恩典也欲得著上帝的施恩。願咱得著耶穌基督的恩典佮上帝閣和，也倚靠伊，閣向望上帝的榮光來歡喜。詩篇4：6 ，「耶和華ah，求你用你的面的光來照阮。」咱愛親像按呢佇耶穌基督的 恩典來祈求伊的面的光來照咱。

  3、祈求上帝的神同在。

  「願耶和華歡喜的面看你，賞賜你平安-願聖神的相通佮恁佇teh」。

耶和華歡喜的面就是親像老父對伊的囝用歡喜的 面看你，予你得著平安。就是願耶穌基督的神運行佇你的身上。上帝賞賜耶穌基督的神做保惠師引chhoā你，予你得著平安。保惠師就是聖神，做咱的先生引chhoā咱的生活。

咱的思想，感情，意志，全人格予上帝的神感化，就會得著安慰平安。摩西佇曠野有祈求上帝的神佮伊同在(出埃及記33：15)。上帝對耶穌基督的 恩典賞賜聖神予信伊的人。(約翰14：16，17) 使徒佇五旬節得著聖神的充滿以來，in有確信到世間的末日聖神欲佮in佇teh。所以in對外有勇敢通傳道理，對內大家有合一相通，這攏是聖神的恩賜。今仔日世界 的教會需要聖神的相通佮合一。咱的台灣教會也是按呢。「耶和華欲賞賜氣力予伊的百姓，耶和華欲用平安賜福伊的百姓」(詩篇29：11)。氣力佮平安攏是聖神的恩賜。

今日的教會不時著祈求聖神的合一才有氣力。家庭著祈求聖神的同在才有平安。每一个人著有聖神的充滿才有歡喜。聖神若佮咱佇teh，才會khah贏魔鬼。所以每禮拜的 祝禱就是著祈求聖神的同在佮引chhoā才有意義。願耶和華每日用歡喜的面看咱，就是聖神的相通佮感動。

每一擺的聚會的最後牧師的 祝禱，對佇咱有真大的意義。就是替會眾祈求三位一體爸，囝，聖神上帝賞賜眾人有這款的福氣。

  (1)願耶和華祝福保護你，就是咱得著上帝的疼。

  (2)願上帝的榮光的面照你，就是予恁會得著耶穌基督的 恩典。

  (3)願上帝歡喜的面看你，賞賜你平安，就是予恁會得著聖神的相通。

按呢就是祈求上帝的祝福佮保守，祈求上帝的施恩，祈求上帝的神同在。咱已經佇爸，囝，聖神的名受洗禮。咱也著不時佇三位一體的上帝的疼痛的內面得著祝福對這霎到永遠。每禮拜的 祝禱毋通看做形式上的事。咱著相信彼个祝禱有teh實現佇咱的身上，對佇地上到佇天頂。願榮光，福氣，權能歸佇三位一體的上帝。阿們。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461