首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 精牲變做人
精牲變做人
卷期：第834號 本次： 日期：1958/6 刊名：台灣教會公報 頁數：9
篇名：精牲變做人 [ Cheng-siⁿ pìⁿ-choè lâng ]
作者：胡文池 Ô͘ Bûn-tî
  顯示 : 漢羅 全羅 並列  

精牲變做人

Bunun族按呢得救

胡文池

1958年6月834期      9-11

 無人愛予人罵精牲 iáu-kú無信主的人毋知人，是上帝的囝，致到in是「高等動物，」按呢嘛是精牲。特別無開化的 山地人閣較是按呢，因為in是親像囡仔，精神無發達，佮精牲 的分別無真明。十年前，我頭擺來山地傳道的時，人常常講，「番仔就是精牲，佮人彼中央的動物。」佇山地Bunun族是文化做kē，這个動物性是閣較明。

  (1)對Bunun 的話來看：

佇Bunun 話，人佮精牲攏叫做「minixomis」，意思是「動物。」

  (2)對in 的流傳來看：

流傳抑是講傳說是彼个民族的思想佮信仰。In無文字，自然無冊，in 的故事對古早對喙來傳教現在。所以無信主的 Bunun到現在猶teh信。我簡單介紹幾若 條 in 的傳說。

(1) In 的這族Tanapimma是講對雞母蟲來變化的。

(2)有一種山頂的老鼠是貧惰的 查某變的。(3)有一个枵饑個人食猶未熟 的 芋仔，致到嚨喉癢，直直jiàu身軀，soà袂曉講話，按呢變做猴。

(4)有歹的婦人人佮山豬姦淫soà予丈夫thâi死，對腹肚走出山豬佮豬。(5) 百步蛇是囡仔變 的，所以in毋敢thâi死伊，in叫百步蛇做朋友；in相信百步蛇會曉聽in 的話，所以若看見厝內就好喙叫蛇著走，才袂予人踏著，按呢講，蛇就會走。(6)有一人去拍獵，soà拍毋見伊的狗，逐日佇山裡teh kho͘ 伊的狗，致到變做一款的鳥，直直kho͘ 伊的狗「to，to，to，」到現在猶teh kho͘。

  (3)對in 的生活來看。

  In 10年前，查埔真濟是穿鹿，山羊的皮，致到有時予人看做是鹿，予人拍死。In無洗身軀，無洗跤，親像精牲 遐臭。In食佮精牲 siāng款，蕃薯，粟仔。無用碗，箸，只有用柴 的 湯匙直接對鼎iúⁿ來食，chhun--的用鼎予狗，雞，豬食。予豬狗，雞，睏佇厝內。無起便所，佇山裡抑是厝後無人看見的所在，隨便大便。常常phāiⁿ 豬，狗，羊，雞鳥去遠的所在thit-thô。Lim酒到醉，顯出動物的本性，倒佇土跤就睏。總講，衣，食，自住，逐項真親像動物。

信主變做人。

對1947年，咱就積極的對Bunun傳道。當時的政府官員對教會大開傳道的門，自由通用日本話佈道。到後來就禁止日本佮日語。總是到彼時我已經會講in 的話。佇1951年，咱也有出版羅馬字 的馬太佮in 的聖哥。起先咱是對東部開始傳道，到有信徒了後就派人去台中佮高雄的 Bunun佈道。彼个經費攏是對加拿大的母會。感謝上帝，對佇幾若方面的協力就到勢漸漸進展，到現在有50 間 的教會。若是慢 3年，予天主教來迷惑就撿彩無遐快。

    In對信主了後，思想佮生活大變遷。In知in是上帝的囝，是佮精牲無siâng。對心性換新，生活改變，變做人。若是遐的猶未信的 Bunun ，in佮早時的生活猶是siâng款。

親像初代的教會。

    (1)傳道有熱情。

  Bunun 50 間 的教會通講攏是in家己傳--的。In親像加利利的討魚人，無學問，iáu-kú無通親像in有對主3年間 的訓練，只有聽道無久就感覺責任愛救同胞，就去傳。彼中間幾若个教會是對婦人人的喙傳--e。主有對in 的中間揀選幾若个有才能閣有熱情的做工人。佇東部有劉傳，黃順利，中部有全日生，高雄縣有林天良，周天花等。孫牧師佮牧師娘，馬牧師，佮吳同燦先生，也有大的貢獻。

  (2)有疼心。

  Bunun若信主了後攏是叫兄弟，是親像一家的人。大家真有疼心，相幫贊。以前in若有人死，別人毋敢倚，致到家族較少的，某若死伊的翁著家己phāiⁿ冷冷的 某去tâi。信主了後in毋驚鬼，所以大家倚來相幫贊。有一个婦人人伊相soà死三个囝，iáu-kú對佇信徒的疼痛佮幫贊攏無失志。山地信徒無親像初代的信徒有園通賣，因為in 的土地攏是政府的 ，iáu-kú in較濟 的教會攏teh公家做工，相佮收成，按呢寡婦佮病痛的人攏免煩惱in 的園。若是一个 的人無夠伙食，別人就幫贊伊。

  (3)有神跡綴in。

  Bunun族信心真單純。In 散鄉無錢通予醫生看，閣較濟 的 番社離醫生真遠，閣再也毋捌青草的 藥，所以只有倚靠祈禱，致到有親像初代教會，真濟神跡綴in。In真濟有對祈禱來醫好，設使有藥通食in也著先祈禱才有食藥。無久以前佇延平鄉有一个人起痟，真傷重，警察佮衛生所參詳隔日欲送伊到台北的 病院。但是伊的家族去請教會來替伊祈禱，到隔日已經好好，予眾人攏著驚，對按呢彼个家族攏來信主，閣以外忽然加 30人入信。

有淡薄掛慮

現在真濟教派注目佇山地，特別天主教用物質teh欲引誘in。In真濟錢通起媠的拜堂予in，用錢倩山地人做宣道師，有衫褲通分予in。致到予咱真歹做工；閣軟弱的信徒驚了也會淡薄受迷惑。向望大家會替in祈禱，予in有聖神的 幫贊，免得入佇迷惑。

                                                             完。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461