Pí-tek ê seng-gâi kap kàu-hùn.
Tân Kàng-chhiong
1958年7月835期 9-10
Sím-mi̍h khoán ê lâng chiah sī Siōng-tè só͘ tiōng-iōng ê jîn-bu̍t? Iâ-so͘ tuì Pí-tek kóng, " Lí chiū-sī Pí-tek , tī chit ê chio̍h poâⁿ téng goá beh khí-chō goá ê kàu-hoē, im-hú ê koan-ài iā boē iâⁿ i,"(Má-thài 16:18).
Ū lâng siūⁿ Siōng-tè só͘ tiōng-iōng ê lâng tek-khah I beh kéng ū siong-tong ê ha̍k-le̍k, sī thian-châi, láu-liān koh boē sit-pāi ê lâng, chiàu goá siūⁿ m̄-sī án-ni, tāi-khài Siōng-tè só͘ tiōng-iōng ê lâng ū saⁿ ê te̍k-tiông.
1. Hoaⁿ-hí hō͘ Chú ēng, hó-táⁿ, bô the-sî.
2. Gâu thun-lún khah-iâⁿ sit-pāi
3. Khiam-pi ê cheng-sîn.
Ū lâng kiám-chhái phāu gî-būn Siōng-tè kiám ū tiōng-iōng Pí-tek mah? I kiám m̄-sī toà tī Ka-lī-lī ê Pek-sài-tāi kap i ê lāu-pē chi̍t-iūⁿ thó-hî lâng mah? Kap lāu-pē saⁿ-kap thó-hî ê sî í-keng chiū kiat-hun, ū bó͘, ū kiáⁿ(Má-thài 8:14), chóng-sī i tè Chú liáu-āu, Iâ-so͘ chō-chiū Pí-tek kap kî-thaⁿ ê ha̍k-seng chi̍t-iūⁿ chò Siōng-tè kok ê toē-ki, sui-jiân Pí-tek kàu Chú ê siū-lān ū siông-siông sit-pāi. Nā-sī i tī Ki-tok koh-oa̍h liáu-āu, Sèng Sîn kàng-lîm ê sî, ū la̍t ê káng-tō thoân Chú koh-oa̍h ê hok-im kap hoán-hoé ê tō-lí, hit ji̍t hoán-hoé niá soé-lé ê iok-lio̍k ke-thiⁿ saⁿ chheng lâng(Hēng-toān 2 chiuⁿ). Hoê-sióng Pí-tek ê it-seng chhin-chhiūⁿ i ê miâ chi̍t-iūⁿ, ‘chio̍h-thâu'. I siông-siông sit-pāi ná chhin-chhiūⁿ sit-pāi kàu tah-té ê khoán-sit. Kai-chài ū khek-ho̍k sit-pāi, sui-jiân ū sit-pāi kàu thiat-té, chóng-sī bô sit-pāi kàu choè-āu.
Siat-sú lí nā gián-kiù Pí-tek ê sit-pāi ê sî, lí beh ka-kī kám-kak goá sī chi̍t ê hó lâng , iā beh tuì hit ê tè Chú saⁿ nî poàⁿ kú ê Pí-tek, phāu toā ê sit-bāng te̍k-pia̍t Iâ-so͘ hù Ka-ná hun-in ê iân-sia̍h Pí-tek iā chāi-lāi (Iok-hān 2:1-11). Iâ-so͘ hō͘ Gâi-ló͘ ê cha-bó͘-kiáⁿ koh-oa̍h, te̍k-pia̍t toà Pí-tek khì (Má-khó 5:37). Iâ-so͘ tī soaⁿ-téng ê piàn-māu(Má-thài 17:1-4), Iâ-so͘ tī Khek-se-má-nî-hn̂g ê khó͘-tó(Má-thài 26:36,37). Iâ-so͘ ta̍k-pái to toà Pí-tek chāi-lāi , te̍k-pia̍t Chú beh la̍p teng-sè bô chîⁿ, hoan-hù ha̍k-seng tiong ê chi̍t lâng khì hái-piⁿ tiò-hî tuì hî ê chhuì the̍h chhut gûn chi̍t ê, hit lâng iā sī Pí-tek (Má-thài 17:25-27). Chit khoán ê Pí-tek i oē saⁿ-pái m̄-jīn Chú(Lō͘-ka 22:55). Lán siūⁿ kàu chia ê sî, kám-kak lán toà tī ok-to̍k kan-îm ê sè-tāi, chhin-chhiūⁿ iā sit-pāi m̄ jīn Chú ê khoán-sit, chóng-sī lán gián-kiù Pí-tek ê sêng-kong ê sî, sim beh piàn-choè khoài-lo̍k, liân hit-ê bô siū kàu-io̍k ê thó-hî lâng, i oē tī Gō͘-sûn-choeh káng-ián hō͘ saⁿ-chheng lâng hoán-hoé(Hēng-toān 2:41). iā ke-thiⁿ kàu gō͘-chheng(Hēng-toān 4:4). I iā ū siá Pí-tek chiân-hō͘-su. I ê sêng-kong beh chiâⁿ-choè lán ê ǹg-bāng.
Taⁿ ū chi̍t ê būn-toê, chiū-sī cháiⁿ-iūⁿ goá ài Pí-tek, tû Iâ-so͘ í-goā goá só͘ ài ê lâng iā sī Pí-Tek, goá teh àm-liām cha̍p-jī sù-tô͘ ê miâ ê sî, goá só͘ ài ê lâng iā sī Pí-tek, ū nn̄g ê lí-iû. 1) I sī Chú só͘ tiōng-iōng ê lâng. 2) Thiat-té-tek choè tāi-chì, siat-sú chhò-gō͘ ê sî, i thiat-té-tek ê chhò-gō͘, choè sì-chiàⁿ ê sî thiat-té-tek sì-chiàⁿ. Goá só͘ ài chiū-sī chit khoán ê lâng, cháiⁿ-iūⁿ Pí-tek hiah choē pái ê sit-pāi. In-uī i kap sè-kan lâng siâng-khoán sit-lo̍h chim-chiok. Siat-sú Lō͘-tek Má-teng nā iû-goân má-má hu-hu chiū bô cha̍p-la̍k sè-kí ê chong-kàu kái-kek, só͘-í chi̍t ê Ki-tok-tô͘ su-iàu chhin-chhiūⁿ Pí-tek ê jia̍t-sim kap thiat-tí, chhin-chhiūⁿ Lō͘-tek Má-teng ê chim-chiok, siat-sú nn̄g hong-bīn chiâu-pī ê hiaⁿ-ché Chú tek-khak toā-toā ēng i lâi êng-kng Chú ê miâ.
Pún-lâi Iâ-so͘ ê ha̍k-seng tè Iâ-so͘ ê bo̍k-tek, ǹg-bāng in ê Chú oē choè tē-chiūⁿ ê ông. In-uī I ū koân-le̍k , ū cha̍p-hūn ê lêng-le̍k táⁿ tó tuì-te̍k. Sū-put-ti Chú hō͘ lâng lia̍h, sím-phoàⁿ tèng si̍p-jī-kè, sí, goá iā beh sióng-siōng(siông) tû Iû-tāi í-goā cha̍p-it ê sù-tô͘ kap ki-thaⁿ tè Chú ê lâng chū-chi̍p tī Iâ-lō͘-sat-léng ê lâu-téng ê sî, chū-jiân Pí-tek iā chāi-lāi, i kám-kak koh bô kú oē-thang kap Chú kap ki-thaⁿ ê sù-tô͘ saⁿ-kap kau-poê peh-piáⁿ, chóng-sī lí oē hoat-hiān tio̍h i ka-kī chi̍t lâng cháu kàu tī Iâ-lō͘-sat-léng ê siâⁿ-goā, tī o͘-àm koh bô phoāⁿ ê tē-hng, chiâⁿ-choè sī chi̍t ê khó-lîn ê lâng.
(Í-hā thāi-sio̍k)
