Thài-ngá-ní kàu-hoē ê hoat-tián
(Chiap chêng-goe̍h hō tē 7 bīn)
Kang Thian-sūn
1958年7月835期 11
2. Kian-chhî sìn-gióng ê La-oái.
Chha-put-to hit ê sî-chūn, ū chi̍t ê soaⁿ-tē chheng-liân, m̄-kiaⁿ kéng-chhat ê chó͘-tòng, ióng-kám chhoā i ê bó͘ khì Tām-chuí tha̍k chheh, i si̍t-chāi sī uī chin-lí m̄-kiaⁿ sí ê lâng, i nn̄g nî āu iā tńg-khì toà Ka-lé-oan pang-chān Chi-oang, i chiū khì ta̍k só͘-chāi thoân tō-lí, sìn ê lâng chiū tī saⁿ-keⁿ poàⁿ-mî kàu Chi-oang hia thiaⁿ tō-lí, hit ê m̄-kiaⁿ sí, m̄-kiaⁿ phah, m̄-kiaⁿ koaiⁿ ê ióng-kám ê chheng-liân, chiū-sī La-oái(ū lâng kóng chò Lô͘-ui). Taⁿ hit-sî ê san-tē lâng ēng choáⁿ-iūⁿ lâi thiaⁿ tō-lí neh? In-uī kiaⁿ kéng-chhat, chiū tī àm-sî 10 tiám kàu 3 tiám ê tiong-kan lâi thiaⁿ tō-lí, ū lâng toà tī chin hn̄g, tio̍h ài poêⁿ-soaⁿ koè-niá kiâⁿ 5 tiám cheng, ū ê tio̍h 8,9 tiám cheng chiah ē kàu. Khí-thâu Chi-oang ê sin-thé put-chí ióng, āu-lâi in-uī ta̍k àm tio̍h ài kà lâng, nā-sī khah kīn lâi ê, tio̍h kàu thiⁿ-kng, só͘-í sin-thé chi̍t-ji̍t chi̍t-ji̍t soe-lám. Sui-jiân sī án-ni, Siōng-tè iā te̍k-pia̍t pó-hō͘, hō͘ i ióng-kám lâi chīn i ê sù-bēng. I ū chi̍t ê ióng-lú hō chò La-bai(羅梅), i kóng tio̍h ta̍k-àm uī-tio̍h hiah-nī hn̄g lâi ê lâng chí-pn̄g hō͘ in chia̍h pá chiah hō͘ in tńg-khì, in ta̍k àm to bô it-tēng ê lâng lâi, tuì tang-sai lâm-pak lâi 5 ê, 10 ê chiap-soà lâi, só͘-í kang-chok ê lâng si̍t-chāi iā sī uî-lân, chóng-sī uī-tio̍h oa̍h-miā ê hok-im iā sī boē kì-tit it-chhè lâi kám-siā.
3. Sìn-gióng eng-hiông Ui-lan.
Tī Eng-hoa chhoan(櫻花村) ū chi̍t ê tē-it kia̍t-chhut ê sìn-gióng eng-hiông, chiū-sī Ui-lan thak-ko,i thang kóng chêng sī chi̍t ê hèng chiú phî-khì chin toā ê lâng, chi̍t-ē thiaⁿ-tio̍h Chi-oang kóng tō-lí suî-sî chiū sìn, pêng-sî khoàⁿ chiú choè sìⁿ-miā ê , suî-sî khoàⁿ choè tuì-te̍k, hiong-ok ê phî-khì piàn choè thiàⁿ-sim moá-moá ê lâng. I ū uī-tio̍h tō-lí siū chin toā ê pek-hāi, tng tāi Tang A chiàn-cheng chin kek-lia̍t ê sî, Ji̍t-pún kéng-chhat gî-sim àm kuí, giâu-gî Ki-tok-tô͘ chhin-chhiūⁿ cheng-thàm, Ui-lan in-uī lâi Hoe-liân kàu-hoē chò lé-pài siū lia̍h, Ji̍t-pún kéng-chhat ēng pe̍h-siám-siám ê to kóng beh kā i thâi, kiò lâng khì ku̍t khut beh kā i tâi. Ui-lan khoàⁿ hit ê pān-sè sī chin-chiàⁿ ê khoán, chiū pek-chhiat kî-tó, chóng-sī kî-tó liáu-āu, i ê sim-koaⁿ piàn choè hoaⁿ-hí, chiū-sī nā oē-thang tī chia uī Chú khiā-khí là. À! Sìn-gióng khah-iâⁿ lāi to là, i iā bat hō͘ Ji̍t-pún ê kéng-chhat phah kàu chin thiám , 3, 4 mê-ji̍t lóng bô hō͘ i khùn, tì-kàu khí siáu, āu-lâi kéng-chhat chhòng chi̍t ê kian-kò͘ ê chhâ-tû koaiⁿ i tī hit lāi-bīn poàⁿ nî kú, ēng toā tiâu ê thih-soàⁿ liān--teh, i iau-kiû ài tha̍k Sèng-keng kéng-chhat iā m̄-khéng hō͘ i, āu-lâi ko͘-put-chiong ēng Sèng-keng hêng i tha̍k, i ê pīⁿ chiū chiām-chiām ho̍k-goân, in-uī ài tit-tio̍h chū-iû, chí-ū kìm-chí i boē ēng-tit thoân tō-lí , chóng-sī i iā sī it-bī thoân.
4. M̄ ta̍h sèng-siōng ê Chheng-thài.
Koh-chài ū chi̍t ê hō-chò N̂g Chheng-thài(黃清太,hiān-sî choè Kiàn-chheng kàu-hoē ê soan-tō-su), i chêng sī chin hòⁿ chiú ê lâng, bat chē gû-chhia khì Hōng-lîm, chí-ū gû-chhia tńg-khì , lâng khì chhoē chiah chai-iáⁿ liàn tī lō͘-piⁿ khùn. Chhin-chhiūⁿ chit khoán ê lâng, chi̍t-ē sìn tō-lí, Chú chiū kái-piàn i ê seng-oa̍h. Ū chi̍t pái kui 10 lâng hō͘ kéng-chhat lia̍h khì mn̄g, kiò in tio̍h poē-kàu, chiū ēng sèng-bó Má-lī-a kap Iâ-so͘ ê siōng hō͘ in ta̍h, toā to-sò͘ ê lâng in-uī kiaⁿ chiū ta̍h, to̍k to̍k N̂g sian-siⁿ choa̍t-tuì m̄ ta̍h, tì-kàu hō͘ Ji̍t-pún ê kéng-chhat phah chin thiàⁿ. Chóng-sī i tī hit-sî thang ióng-kám jīn Chú ê miâ , kàu hit ji̍t Chú iā beh jīn i ê miâ là.
5. Sûn-kàu-chiá Sa-ka ta-ni(坂谷)
Sa-ka ta-ni sī toà tī Thài-ló͘-kok ê soaⁿ téng, tuì soaⁿ kha peh khí tio̍h 5 tiám cheng ê lō͘-thêng. I ū tha̍k Lông-gia̍p ha̍k-hāu pit-gia̍p, sī thâu-náu chin iu-siù ê chheng-liân. Chóng-sī in-uī sìn-gióng ê iân-kò͘, Ji̍t-pún kéng-chhat ēng chióng-chióng ê hoat-tō͘ beh hāi i, i ū kiâⁿ 7,8 tiám cheng ê lō͘-thêng kàu Ka-lé-oan, thàu-chá tio̍h ài cháu tò-tńg khì, lō͘-bé hō͘ kéng-chhat chai-iáⁿ phah kàu kha-kut, chhiú-kut, pâi-á kut tn̄g-khì, hūn-khì koh chhéⁿ, chhéⁿ liáu koh phah, lō͘-bé uī Ki-tok ê miâ lâi sûn-kàu sí-khì. Goá bat kàu hia toà kuí-nā ji̍t, si̍t-chāi kám-khài bû-liōng. Kong-ho̍k āu hit ê kéng-chhat iáu kú tī hia, Gô͘ Thian-sù Bo̍k-su mn̄g i ê hū-jîn-lâng kóng, taⁿ uī-tio̍h phah-sí lí ê tiōng-hu hit ê kéng-chhat beh pò oan-siû á m̄? I kóng, m̄-thang , tio̍h thiàⁿ tuì-te̍k chiah sī Chú ê kà-sī, ē thâi lâng thâu-khak ê iá-bân lâng, taⁿ iā oē-hiáu thiàⁿ i ê tuì-te̍k là. Sa-ka ta-ni sui-jiân sí, si̍t-chāi sí liáu ián teh kóng-oē！ (Boē-oân).
