Pí-tek ê seng-gâi kap kàu-hùn
(Chiap chêng-goe̍h hō tē 10 bīn)
Tân Kàng-chhiong
1958年8月836期 11-12
Siat-sú Pí-tek nā m̄-sī sù-tô͘-thoân chāi-lāi, Pí-tek nā bô kap ki-thaⁿ cha̍p ê sù-tô͘ toà tī lâu-téng ê sî, ha̍k-seng tiong choē-choē lâng beh phoe-phêng i ê só͘ choè, che chiū-sī lâng ê sèng-chit; siat-sú lí ê pêng-iú , hiaⁿ-tī hām-lo̍h tī sit-pāi ê sî, kiaⁿ-liáu m̄-sī beh pang-chān i, hoán-tńg beh thí-chhiò i, nā Pí-tek lī-khui sù-tô͘-thoân ê sî, kiám-chhái ha̍k-seng ê chi̍t lâng kóng, "Tàu-tí Pí-tek khì tá-lo̍h"? Koh chi̍t lâng beh kóng, " Lí ài Pí-tek lâi chia mah, I kiám oē sêng-kong kàu lō͘-bé?"?
Koh chi̍t lâng kóng, "Lí kiám bô khoàⁿ-kìⁿ Pí-tek kiâⁿ chuí-bīn, chí-ū kuí-pō͘ hó-sè nā-tiāⁿ, liáu-āu chiū tîm-lo̍h mah"?
Koh chi̍t lâng kóng, "Pí-tek che lâng chai-chai--teh. In-uī i só͘ choè m̄-bat chi̍t pái sêng-kong kàu lō͘-bé."
iáu chi̍t ê kóng, "Lí kiám boē kì-tit Chú kā lán chi̍t ê chi̍t ê sé kha ê sî, Pí-tek te̍k-pia̍t pí lán khah koài......" kóng, "Chú ah Lí koat-toàn m̄-thang soé goá ê kha".
Koh chi̍t lâng kóng, "Hit khoán ê lâng sî-siông to-sī teh iu-būn Iâ-so͘."
Ah, si̍t-chāi Pí-tek sī Chú só͘ thiàⁿ ê ha̍k-seng . Siat-sú lán nā chham-ka tī Iâ-lō͘-sat-léng ê lâu-téng ê sî, choân siâⁿ-chhī chí-ū chi̍t lâng uī Iâ-so͘ iu-būn kàu sit-bāng ê, hit lâng chiū sī Pí-tek. Ū chi̍t uī chí-bē siū kéng chò séng ê bô͘-hoān bú-chhin, i oē thang hit ji̍t siū chiau-thāi choân séng iû chi̍t khoân, siū séng-tiúⁿ, koān-tiúⁿ chiau-thāi iân-sia̍h. Chóng-sī chit uī chí-bē bô lia̍h án-ni chò kong-êng in-uī i só͘ kî-thāi chiū-sī hòng-tōng-chú hoê-thâu. Chhin-chhiūⁿ án-ni, khó-lîn ê pí-tek cháu-chhut Iâ-lō͘-sat-léng siâⁿ goā ê sî, tī hit ê o͘-àm bô-liâu ka-kī chi̍t lâng lī-khui sù-tô͘-thoân. Chiah-ê sù-tô͘ m̄-chai oē kî-thāi i tńg-lâi chhin-chhiūⁿ bô͘-hoān bú-chhin kî-thāi hòng-tōng-chú hoê-thâu pí chham-ka séng-tiúⁿ á-sī koān-tiúⁿ ê ián-sia̍h khah kî-thāi á boē?
Lán ê Chú Iâ-so͘ í-keng tī bōng-lāi saⁿ ji̍t ū saⁿ ê Má-lī-a toà hiuⁿ-iû kàu bōng-ni̍h , khoàⁿ-tio̍h bōng-chio̍h khui, Iâ-so͘ ê sin-si phah- m̄-kìⁿ, chiū toā gông-ngia̍h. Chóng-sī thiⁿ-sài tuì in kóng, " Iâ-so͘ í-keng koh-oa̍h......taⁿ tio̍h khì kā I ê ha̍k-seng kap Pí-tek kóng." Pí-tek kiám m̄-sī sù-tô͘ chāi-lāi, só͘-í "kā I ê ha̍k-seng kóng" kiám m̄-sī í-keng chin kàu-gia̍h , cháiⁿ-iūⁿ tio̍h ke chi̍t kù " kap Pí-tek kóng." In-uī Pí-tek chit sî lī-khui sù-tô͘-thoân, i tng ke̍k choa̍t-bāng ê sî, Chú m̄-ài phāu sit-bāng thàu-té.
Taⁿ kin-á-ji̍t lán nā ū lâng lī-khui kàu-hoē sit-lo̍h kau-poê, tī teh loé-chì choa̍t-bāng, Chú iû-goân beh ēng I ê un-jiû thiàⁿ-thàng ê siaⁿ chhe I ê chhe-ēng pò i hó ê siau-sit tńg-lâi pò Má-lī-a kap Pí-tek kóng, I tāi-seng lín khì Ka-lī-lī; lín tī hia beh khoàⁿ-kìⁿ I(Má-khó 16─8).
