T.K.C. Ko Tiong ha̍k-seng Hā-lēng-hoē
Tiuⁿ Hông-chhiong
1958年9月837期 13-14
Kūn-lâi tī pò-choá siōng siông-siông khoàⁿ-kìⁿ só͘-uī thài-pó͘, á-sī thài-moē(太保或太妹) tī siā-hoē khí-sū ê siau-sit, chiah-ê toā-poàⁿ sī ko-tiong ê ha̍k-seng che sī sū-si̍t. Tī chit ê nî-hoē sī ke̍k guî-hiám ê sî-kî, in sī m̄-chiâⁿ toā-lâng ā m̄-chiâⁿ gín-á, sim-lí kap jio̍k-thé ê hoat-ta̍t ū mâu-tún, tì-kàu siông-siông ài kiâⁿ chhò͘-lō͘.
Chheng-liân-chhù Lí-sū-hoē ū koan-sim tī chit tiám, só͘-í tuì kin-nî khí, thâu chi̍t pái lâi uī-tio̍h ko-tiong ê ha̍k-seng chú-pān Hā-lēng-hoē, uī-tio̍h goá ū chin chá chún-pī, iáu-kú soan-thoân bô thiat-tí. iū-koh siáⁿ-chai kin-nî kok tē-hng ê Tiong-ha̍k ê ká-kî bô saⁿ-tâng, só͘-í tāi-seng ū sió-khoá khoà-lū sêng-chek m̄-chai cháiⁿ-iūⁿ? Chóng-sī kám-siā Chú, chiàu ū-tēng 7 ge̍h 14 ji̍t ē-pō͘ 7 tiám , hoē-tiúⁿ Chiong Bō͘-sêng Bo̍k-su chú-chhî khui-hoē, kiat-kó chhut-se̍k lóng-chóng ū 195 miâ, kî-tiong lâm-seng 104 miâ, lú-seng 91 miâ, nî-hè lâi khoàⁿ,in-uī ko-tiong ê ha̍k-seng, só͘-í lóng-chóng sī 16 kàu 19 ê tiong-kan khah chē. Kî-tiong iā ū te̍k-pia̍t 3 uī ê kàu-hoē chheng-lâin lâi chham-ka kap te̍k-sû ê chho͘-tiong seng í-goā sī chiông-lâi só͘ bē bat ū chê-pī.
Kin-nî sī chhiáⁿ Tân Bêng-tek Tiúⁿ-ló lâi kóng, " Ha̍k-hāu seng-oa̍h kap kàu-hoē sen-oa̍h." Lîm Chong-gī Tiúⁿ-ló kóng "Iú-chêng seng-oa̍h," toā poàⁿ sī kóng loân-ài(戀愛) būn-toê(oê). iā Tân Sek-chong Bo̍k-su kóng, "Kàu-phài būn-toê." iā te̍k-pia̍t ū chhiáⁿ Chóng-hoē Gī-tiúⁿ, Gô͘ Thian-bēng Bo̍k-su lâi kóng, "Chóng-hoē kap chheng-liân." Chiah-ê lóng sī choan-ka, só͘-í kóng lāi-iông hong-hù. Kin-nî kap koè-khì bô saⁿ-tâng, sī bô hun-chó͘ thó-lūn, sī chhái-chhú chi̍p-thé chit-sûn ê hong-se̍k, chiū-sī tāi-seng pun chit-būn ê toaⁿ hō͘ hoē-oân, chiàu in pêng-siông só͘ ū ê būn-tê siá chhut-lâi, āu-lâi tī kán-su káng-ián liáu-āu, it-it chiàu só͘ thê-chhut ê tī chèng-lâng ê bīn-chêng kái-tap. Chit ê hong-sek sī chhì-pān ê, āu-lâi hoē-oân khiok ū ì-kiàn kóng ài chhin-chhiūⁿ í-chêng hun-chó͘ thó-lūn khah hó-sè.
Í-goā iā ū Tīⁿ Gím-êng Bo̍k-su ê im-ga̍k chí-tō , ē-pō͘ sî ê khong-lo̍k sī Lí Ko͘-niû kap Ko Bo̍k-su-niû(Miss Greer & Mrs. Copland) chí-tō ê, iā chá-khí-sî sī Tiuⁿ Chheng-kiⁿ Sian-siⁿ ch2-lí chó-thian kî-tó-hoē, ē-po͘-sî ê sek-iog5-hoē sī Bí Bo̍k-su chhoā tāi-ke lé-pài.
Chit pang ê hoē tuì thâu chi̍t-ji̍t chiū tú-tio̍h hō͘ Tang-pō͘ toā sún-sit ê hong-thai, tì-kàu chêng saⁿ ji̍t lóng tī chhù-lāi, boē thang chhut-khì goā-bīn. Che sī hō͘ chiah-ê chheng-liân chin oh-tit thun-lún ê toā kan-khó͘ sū, chóng-sī iáu-kú oē thang tit-tio̍h chiông-lâi só͘ bē bat ū ê hó sêng-chek, che tong-jiân sī Siōng-tè ê un-tián, iáu-kú chi̍t hāng m̄-káⁿ boē kì-tit ài pò lín chai ê, chiū-sī chit pang ū chhiáⁿ tuì Hu-li̍p-pin lâi ê soan-kàu-su, Pì Su̍t-khái Bo̍k-su (費述凱 Rev. Frame) ê cha-keng kap poê-lêng ê kiat-kó, i tī Tiong-kok ê lāi-bīn thoân-kàu 20 nî-kú, sī Ka-ná-tài lâng, iā sī Loē-tē-hoē ê soan-kàu-su, i ēng hui-siông liû-lī ê Kok-gú lâi káng-tō, só͘ kóng ê loē-iông sī sin-sian koh ū la̍t, tì-kàu tī choè lō͘-bé àm ê hiàn-sim-hoē ū tit-tio̍h lâm ha̍k-seng 32, lú ha̍k-seng 6, kiōng 38 miâ, chiap-siū Chú Iâ-so͘ choè in ê Kiù-chú: iā tit-tio̍h lâm ha̍k-seng 38, lú-seng 31, kiōng-69 miâ, piáu-sī koat-sim beh hōng-hiàn hō͘ Chú, choè I ê sèng-kang. Che sī khong-chiân ê toā siu-sêng, iā sī thang toā kám-siā o-ló Chú ê sū. Goá iā ǹg-bāng tāi-ke oē siông-siông kì-tit chiah-ê, he̍k-sī chiap-siū Chú á-sī hiàn sin hō͘ Chú ê chheng-liân, uī-tio̍h in kî-tó bô soah.
Chit pang ê Hā-lēng-hoē sī Ko-tiong ha̍k-seng thâu chi̍t pái ê Hā-lēng-hoē, suî ū put oân-choân, iáu-kú thang hō͘ lán kám-siā , hit ê in-iû tī chêng goá í-keng kóng liáu lah. iáu-kú ū chi̍t hāng oē hō͘ chit pang ê hoē chiah-nih hó-sè chiū-sī 195 miâ ê tiong-kan, Tām-kang ê ha̍k-seng ū chiàm 119 miâ, thang kóng sī poàⁿ-sò͘ í-siōng, chiah-ê ū poàⁿ-sò͘ í-siōng ê Tām-kang ê ha̍k-seng tī hoē tiong ê éng-hióng la̍t sī chin toā, in tāi-ke chin kèng-khiân koh jia̍t-sim , só͘-í oē thang hō͘ choân-thé ê ha̍k-seng tī put-ti put-kak ê tiong-kan, siū kám-hoà, che iā-sī piáu-sī Tām-kang Tiong-o̍h pêng-siông ê Chong-kàu kàu-io̍k ê sêng-kong.
Lō͘-bé ji̍t kiàn-chèng-hoē ê sî-kan suî chin té, iáu-kú só͘ khí-lâi hoat-piáu choè kiàn-chèng ê lóng chin jia̍t-chhiat koh sêng-si̍t. Goān êng-kng kui tī Siōng-tè , iā goān Siōng-tè sù-hok tī chiah-ê chheng-liân só͘ tit-tio̍h ê kà-sī kap só͘ li̍p ê iok.
