T.K.C. hoē-oân kap khîn-lô(勤勞)
1959年7月847期 p.17-19
Tuì keng-chè-ha̍k ê li̍p-tiûⁿ lâi kóng khîn-lô sī seng-sán só͘ boē thang bô--tit ê, in-uī nā bô khîn-lô chin bô ū seng-sán, bô seng-sán chiū boē thang kióng-kip su-iàu, boē thang èng-hù su-iàu, keng-chè chiū khiā boē tiâu, keng-chè nā khiā boē tiâu, hit ê jîn-seng chiū hoat-seng būn-tê lah!
Só͘-í bô-lūn tī siā-hoē, á-sī kò-jîn, khîn-lô sī boē thang khoat-siáu ê, khîn-lô sī lâng uī-tio̍h sū-gia̍p lâi iōng sim sîn, pêng-siông kán-chheng lô-sim kap lô-sîn.
Khîn-lô sī Ki-tok-kàu ê te̍k-teng, kî-thaⁿ ê chong-kàu iā kóng-khí jîn-ài chû-pi, chóng-sī toā-poàⁿ sī chú-tiuⁿ chhut-sè siau-ke̍k-tek, nā-sī Ki-tok-kàu sī ji̍p-sè ê chek-ke̍k-te̍k, khoàⁿ-kìⁿ siā-hoē ê hú-pāi, lâng-lâng tîm-lo̍h tī choē-ok tiong, Ki-tok-kàu m̄-sī iô-thâu thàn-sek(搖頭嘆息) lâi siám-pī, chiū-sī thoân hok-im lâi chhiúⁿ-kiù(搶救), uī-tio̍h án-ni, Ki-tok-tô͘ tio̍h chiàu Chú ê kà-sī chò kng, chò iâm tī ka-kī ê chit-he̍k chò lī-ek lâng, ho̍k-bū lâng ê kang-chok. Só͘-í khîn-lô thang kóng sī Ki-tok-kàu chong-chí chi̍t-ê pō͘-hūn.
1.Kīn-tāi ê khîn-lô-koan
Lán Tiong-kok goân-lâi ê tha̍k-chheh-lâng(士大夫) khoàⁿ khîn-lô chò hā-chiān ê su-siúⁿ, í keng pī khîn-lô sī sîn-sèng(勤勞是神聖) ê hiān-tāi su-siúⁿ só͘ thè-oāⁿ.Kok-hū kóng, "Jîn-seng í ho̍k-bū uî bo̍k-tek"(人生以服務為目的). Tī Ki-tok-kàu ê li̍p-tiûⁿ lâi kóng, Chú Iâ-so͘ sui-jiân bat kóng, "Lâng ê oa̍h m̄-nā oá-khò piáⁿ, "lâi kà-sī lâng chù-tiōng sio̍k-lêng-tek ê seng-oa̍h, chóng-sī I ê it-seng si̍t-chāi sī khîn-lô ê it-seng. I seng-tióng(sic.) tī sió chng-siā Ná-sat-le̍k, chū-sè chiū chò ba̍k-chhiūⁿ lâi khîn-lô, kàu tī ji̍p kong seng-gâi iā sī uī-tio̍h thian-kok ê sèng-kang lâi tio̍h-boâ. Má-thái 4:23, 24 kì-chài, "I piàn kiâⁿ tē, kok hiuⁿ-siā lâi kà-sī soan-thoân thian-kok ê hok-im, iā i-hó ta̍k iūⁿ ê chèng-thâu kap pēⁿ-chèng." I ê khîn-lô m̄-sī chhin-chhiūⁿ keng-chè-ha̍k só͘ teh kóng uī-tio̍h seng-sán, á-sī kò-jîn seng-chûn lâi khîn-lô. I ê khîn-lô sī ho̍k-bū-tek, m̄-nā bô siu tāi-kè, iā bô hi-bōng lâng ê pò-siû kap chheng-chàn. I uī lâng ho̍k-bū khîn-lô, sī chhut tī thiàⁿ lâng, lîn-bín lâng, iū-koh sī bô tiâu-kiāⁿ--ê. Só͘-í ka-kī soan-giân kóng, "Jîn-chú lâi, m̄-sī beh chhe-ēng lâng, sī beh hō͘ lâng chhe-ēng, koh hiàn I ê sìⁿ-miā lâi sio̍k-hoê choē-choē lâng" (Khó 10:45).
Kin-nî lán T.K.C. uī-tio̍h beh hāu-hoat Chú Iâ-so͘ chit khoán uí-tāi chông-ko ê ho̍k-bū cheng-sîn, beh khui khîn-lô-iâⁿ lâi uī-tio̍h tī Hoa-liân ê Gio̍k-san Sîn-ha̍k su-īⁿ chò kang, liōng-pit lán tiong-kan í-keng ū lâng ióng-io̍k beh chham-ka, lâi ū hūn tī san-tē tông-pau kiù-lêng ê kang-chok. Chit khoán bô tiâu-kiāⁿ ho̍k-bū-tek ê khîn-lô, chiah sī chin-chiàⁿ sîn-sèng ê kang. Só͘-í "khîn-lô sī sîn-sèng, " chit ê su-siúⁿ thang kóng ti̍t-chiap-tek, kàn-chiap-tek tuì Chú Iâ-so͘ it-seng ê giân-hēng só͘ lâu ho̍k-bū-tek khîn-lô só͘ éng-hióng--ê.
2.Jû-hô soán-te̍k chit-gia̍p?
Khoàⁿ khîn-lô chò hā-chiān ê sî-tāi í-keng piàn-chiâⁿ "khîn-lô sī sîn-sèng" ê sî-tāi, só͘-í bô-lūn sím-mi̍h lâng eng-kai tio̍h ū i ê chit-gia̍p. Pó-lô kóng, "Nā ū lâng bô chò kang, i iā m̄-thang chia̍h(II Thiap 3:10)"Nā-sī án-ni, bô-lūn sím-mi̍h chit-gia̍p, lán lóng thang chò á m̄-sī?
Tng jîn-kháu cheng-ka, keng-chè khióng-hong, seng-chún kēng-cheng, iū-koh chhiong-moá siâ-ok ê kin-á-ji̍t, tī kok-chióng ê sū-gia̍p-siōng ū chin-choē bô chèng-keng, bô tō-tek ê chok-uî, sī lán Ki-tok-tô͘ só͘ tio̍h kín-sīn lâi soán-te̍k tî-hông ê; sui-jiân ū sî tī chèng-keng ê chit-uī teh ho̍k-bū, chóng-sī tī hit ê chit-bū-siōng tuì èng-siû kau-chè, á-sī tham-loân chîⁿ-châi lâi hām-lo̍h tī choē-ok, sī kin-á-ji̍t siā-hoē-siōng ê siông-sū. Lán siông-siông bat khoàⁿ-kìⁿ bó͘-bó͘ hiaⁿ-tī uī-tio̍h ho̍k-bū tī bó͘-bó͘ ki-koan, á-sī chò bó͘-bó͘ sū-gia̍p, tì-kàu sìn-gióng tuī-lo̍h lâi lī-khui Siōng-tè.
Bat thiaⁿ-kìⁿ chi̍t uī chin iú-uî ê bo̍k-su kóng, "ū chi̍t pái siū lâng àn-nāi beh khì kap chi̍t uī chin ū tē-uī koh ū miâ-siaⁿ ê bó͘-bó͘ phok-sū(Ki-tok-tô͘) saⁿ-bat, khì i ê chhù chhoē bô, jiân-āu chiah chai i uī-tio̍h kau-chè èng-siû khì tī bó͘-bó͘ chiú-ka." Hit uī bo̍k-su kóng, "Goá goān goá ê kiáⁿ-jî chò oē-seng ku-lí lâi jia̍t-sim kèng-pài Siōng-tè, m̄-ài ū tē-uī, miâ-siaⁿ lâi tuī-lo̍h tī choē-ok tiong." Pó-lô kóng, "Só͘-í lín he̍k-sī chia̍h, he̍k-sī lim, he̍k-sī choè sím-mi̍h, lóng tio̍h in-uī êng-kng Siōng-tè lâi chò"(I Lîm 10:31). Só͘-í lán Ki-tok-tô͘ m̄-thang kan-ta chù-tiōng chit-gia̍p ê ko-siōng, hā-chiān, á-sī pò-siû ê chē-chió, iàu-kín tio̍h soán-te̍k oē thang hō͘ lán chū-iû siú Chú-ji̍t, jia̍t-sim kèng-pài Siōng-tè, koh oē thang lī-ek siā-hoē chō-hok jîn-kûn lâi êng-kng Chú ê sèng-miâ.
Kok-uī chhin-ài ê T.K.C.hiaⁿ-ché, lán kin-nî ê chú-tê sī "Chhú lô͘-po̍k ê hêng-siōng Iâ-so͘." "I pún ū Siōng-tè ê hêng-chōng, bô lia̍h kap Siōng-tè pîⁿ téng choè só͘ tio̍h chip-siú ê, hoán-tńg piàⁿ-khang ka-kī, chhú lô͘-po̍k ê hêng-chōng, chiâⁿ choè lâng ê iūⁿ-siùⁿ......khut ka-kī sūn-ho̍k kàu tī sí, sīm-chì sí tī si̍p-jī-kè, só͘-í Siōng-tè ko-seng I ke̍k koân, siúⁿ-sù I hit ê miâ poâⁿ-koè tī bān miâ ê téng-bīn ê." ǹg-bāng lán saⁿ-kap hāu-hoat I hi-seng-tek ho̍k-bū, chit khoán uí-tāi ê cheng-sîn, bô kéng kang-chok ê hù-kuì, hā-chiān, chīn-tiong siú-chit tī lán ê chit-chek, thang hō͘ Chú kóng, "Hó ah, hó koh chīn-tiong ê lô͘-po̍k, lí tī chió--ê í-keng chīn-tiong, goá beh siat-li̍p lí lâi koán choē--ê, thang ji̍p lí ê chú-lâng ê khoài-lo̍k."
5 KAK GÛN HIÀN-KIM
SIU-CHI PÒ-KÒ-SU
5 ge̍h-hūn só͘ hiàn ê.
T.K.C. Kim-gia̍h T.K.C. Kim-gia̍h
Chhīⁿ Tiong
Tang-soaⁿ 30.00 Sam-chhiⁿ 100.00
Koe-lâng 110.00
Pak Tiong
Báng-kah 810.00 iân-pêng 139.50
Tek Tiong 60.00
Tang Tiong
Gio̍k-lí 40.00 Tâi-tang 200.00
Tiong Tiong
Liú-goân 24.40 Gû-bîn 16.00
O͘-ji̍t 25.00 Jī-lîm sió-khu 108.00
Lâm Tiong
Chó-tìn 24.00 Lâm-mn̂g 132.00
Gio̍k-chíⁿ 35.00 Kong-lîm 72.50
Ko Tiong
iâm-tiâⁿ 130.00 Lâm-chú 120.00
----------------- -----------------------
Ha̍p-kè 1, 276.40
5 ge̍h lán só͘ pang-chān ê.
Tiong-hoē Kàu-hoē Kim-gia̍h
Chhit-chhiⁿ Chhit-tó͘ 600.00
Sin-tek Tâng-lô 200.00
Hù-kong 600.00
Tang-pō͘ Ti-pún 600.00
Tâi-tiong Chi̍p-chi̍p 600.00
Lō͘-siōng 300.00
Ka-gī Koè-lō͘ 300.00
Tâi-lâm Thô͘-siâⁿ 200.00
Ko-hiông Ka-tang 450.00
Eńg-an 300.00
-------------
Ha̍p-kè 4.150.00
郵局儲蓄第５６９９號
帳戶名稱：臺灣總會Ｔ.K.C.
(Tiuⁿ Hông-chhiong)
