Bē tit thang bô kóng
1959年7月847期 p.19-20
In-uī goá chhin-ba̍k khoàⁿ-kìⁿ hit ê toā kî-biāu ê chok-uî; sī Siōng-tè ê êng-kng, só͘-í bē tit thang bô kóng. Sió-tī tī 23 nî chêng khì Má-keng choè sûn-hoê bo̍k-su. Jiân-āu chiū-chit tī tong-sî ê Phêⁿ-ô͘ thiaⁿ, thâu boé tī Phêⁿ-ô͘ moá 10 nî. āu-lâi lī-khui Phêⁿ-ô͘ chu kàu-hoē.
Ū hoat-hiān 3 toā kî-biāu ê sū tī hiān-chāi ê Phêⁿ-ô͘, chi̍t hāng sī kan-thong ê toā chìn-pō͘, tē jī hāng sī bûn-hoà ê toā chìn-pō͘. Taⁿ kau-thong kap bûn-hoà chhiáⁿ àn-hā, tī chia ài kóng-khí kàu-hoē ê chìn-pō͘.
Lo̍h-chhia tāi-seng kàu Má-keng Má-keng ê pài-tn̂g goá thâu boé tiàm oá 10 nî. Pài-tn̂g ê chêng-bīn chin bīn-se̍k. Khiā tī pài-tn̂g chêng gêng-chiap lâng, chē-chē sī chhiⁿ-hūn lâng. Pài-tn̂g siok-sià lóng khok toā, choân-hoē ngiâ-chih lâng-kheh chin ū oa̍h-khì. Kàu uī hit ji̍t ê ē-po͘ chiū chē chhia khì sûn-sī Tìn-hái, Khó͘ Pêng-jîn Sian-siⁿ sin lâi hù-jīm, soà soán-tēng Tìn-hái beh khí sin pài-tn̂g ê tē. āu-lâi khì khoàⁿ sûn-hoê bo̍k-su Kí Bo̍k-su ê chū-chāi tē Chhiah-khàm, chit keng pài-tn̂g sī sin khí--ê, chin ha̍p-ēng. āu-lâi khì Hiā-tâng, Hā Ú Sian-siⁿ tī hia, ta̍k keng kàu-hoē kàu-sè lóng ū chín-pō͘. Hiā-tâng ū suí-suí ê siok-sià chin ha̍p-ēng, kap chá lóng bô tâng. āu-lâi khì Thong-niû , tī hia khiok iáu-bē ū kàu-hoē , nā-sī ū jia̍t-sim ê bō͘-tō-iú.
Keh-ji̍t tī Sió-tî-kak kí-hêng hiàn-tn̂g tián-lé.Hiān-chāi Khu Sìn-tián Sian-siⁿ tī hia, chá goá tī hia, Sió-tî-kak lóng bô hoē-iú, khiok ū lâng teh bō-tō, goá hán-hán-á bat tī hia pò͘-tō. Nā-sī bô phah-sǹg chit sî tī hia ū tông-hông ê sèng-tiān. Pài-tn̂g tē ū 212 phêⁿ poàⁿ, chóng kang-huì 12 bān 4 chheng goā kho͘. Lán Chóng-hoē èng-oān in 5 bān 4 chheng kho͘, Tâi-lâm Sîn-ha̍k-īⁿ èng-oán in khí siok-sià ê chhâi-liāu, kî-û chiū-sī in ka-kī chhut-la̍t. Hit-ji̍t ū oá 200 liân lâng lâi chham-hoē koan-lé.
Siāng hit chá-khí tī Tek-ko-oan iā kú-hêng hiàn-tn̂g-sek. Chá Tek-ko-oan chí-ū 2,3 hō͘ hoē-iú, bô phah-sǹg chit sî iā hoat-tián kàu khí tông-hông ê pài-tn̂g, chin-chiàⁿ sī kài-tó hit tē-hng tē-it suí ê kiàn-bu̍t, siok-sià iā chin hó sè, hiān-sî Tiuⁿ Chhoan Sian-siⁿ tī hia. Chóng keng-huì khai 10 bān 7 chheng goā kho͘, lán Chóng-hoē pang-chān in 5 bān 4 chheng kho͘,kî-û--ê chiū-sī tuì in ê lô-le̍k. Hit ji̍t ê koan-lé-chiá kap Sió-tî-kak pêⁿ-pêⁿ hiah sēng-hóng. Chit hoê tuì lán Tâi-oân chha-put-to ū oá 60 lâng , jia̍t-sim ê tióng-chip kap hiaⁿ-ché khì chham-ka, ke-thiⁿ chin toā ê kong-chhái, hō͘ Phêⁿ-ô͘ ê hiaⁿ-ché toā-toā kám-kek lán bó-hoē ê koan-sim.
Koh ū Hui-li̍p-pin ê Hoa-kiâu hōng-hiàn chi̍t phit chîn , ǹg-bāng bô goā-kú Tìn-hái iā ē tit khí pài-tn̂g, koh àn-sǹg tī Chiong-kun-ò iā ē tit siat-hoat tú-hó ê pài-tn̂g.Tī ba̍k-chêng Hó͘-chéⁿ kap Lāi-oan iā ū su-iàu tī bô kú ê chiong-lâi , ài heng-kiàn tú-hó ê hoē-tn̂g.
Chit pái khì, Táng-sū-tiúⁿ kap Tēⁿ Liân-khun Bo̍k-su táng-sū khì sûn Chiong-kun-ò, Hoe-the̍h kap Chhit-bí, tī hia choè kang. Liāu Kan-siok Bo̍k-su khì Sió-tî-kak, Lāi-oaⁿ, Hiā-tâng choè kang. Chiu Kim-iāu Bo̍k-su khì Tek-ko-oan choè kang. So͘ Chóng-hoē Gī-tiúⁿ kap sió-tī tī Má-keng choè-kang.
Sió-tī tī Má-keng 3 àm ê poê-lêng, muí àm pêng-kin iok 80 goā lâng, chó-thian ê kî-tó-hoē pêng-kin 20 goā lâng. Lé-pài téng-po͘ 180 liân lâng, ē-po͘ 200 khòng lâng. Goá siong-sìn, nā ū thoân-kàu-chiá chù-chāi tī hia ún-tàng ē khah chìn-pō͘.
Ū nn̄g ê khò-tê tio̍h su-iàu chīn-la̍t lâi kî-tó.(1) Lán ê Lîm Táng-sū-tiúⁿ beh chhin-sin koh chhut-má, kàu chiân-soàⁿ tok-tō, koh kap Sun Bo̍k-su-niû hia̍p-le̍k lâi tián-khui sin ê thoân-tō sū-gia̍p.(2)Má-keng kàu-hoē hiān-chāi bô bo̍k-chiá, jî-chhiáⁿ ū iàu-kín ê būn-tê táu-hāu(sic.) kái-koat. Goá ǹg-bāng tuì Siōng-tè ê Sîn chhin-sin ê léng-tō,ē hián chhut I toā ê êng-kng. Chiah ê sū sī lán ê, lán sī "Bó-hoē". Sin ê kéng-siōng tī lán ê ba̍k-chêng teh tián-khui, lí hoaⁿ-hí pang-chān sím-mi̍h? Choá-bīn chin té, siá kàu chia khǹg pit. Pêng-an.
Tē, Loā Jîn-seng siá.
