首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 青年T.K.C.會員kap傳道
青年T.K.C.會員kap傳道
卷期：第848號 本次： 日期：1959/8 刊名：台灣教會公報 頁數：17
篇名：青年T.K.C.會員kap傳道 [ Chheng-liân T.K.C. hoē-oân kap thoân-tō ]
作者：胡Bō͘-seng Ô͘ Bō͘-seng
  顯示 : 漢羅 全羅 並列  

T.K.C. 會員佮傳道。
胡Bō͘-seng
1959年8月848期 p.17-19
(1)頭序
基督教是傳道的宗教，傳報福音做咱的活命佮特色。傳道是上帝本身的工作，上帝差伊所有一个囝來世間也是只有為著傳道，閣為著傳道放拺性命。閣再主的遺言也是叫咱著傳道（馬可16:15）。咱看對原始基督教到現在有教會，有信徒，就有人無停接紲傳十字架拯救的福音做in唯一的使命　耶穌為著傳道理，雖罔有上帝的形狀榮耀，總是無掠佮上帝平等，謙卑屈低，拼空家己，取奴僕的形狀，才會通完成。咱T.K.C.會員若欲傳道理，這个根本精神毋通袂記得，這个精神若無-去，就是袂通傳道理。
現在台灣的信徒差不多猶袂到2%，98%的人欲沈淪，彼个責任kiám毋是咱大家。總是in所猶未信的汰討會求叫伊？所袂聽見的汰討會信伊？若無人傳汰討會聽見？通知若無傳就無人聽著，無聽著就毋知通信，若無信就未通得著救，按呢彼个責任確實就是佇咱代先得著的的責任，「因為若無傳福音我就有災禍」（哥林多 I 9:16）。彼个理由是在佇遮。
(2)傳福音最好的時期猶未過。
不論對甚物所在來的宗教領袖á是遊行佈道家到台灣就是異口同音講台灣就是傳道最好閣最有機會所在，理由我毋免佇遮說明，逐人攏知；這个機會毋知猶大偌久咱毋知，毋通閒閒徛teh講我袂曉，我無力通做啥工。葛理翰博士講，「人欲到地獄攏毋免犯甚物罪，kan-ta恬恬無做工就到地獄」
咱看領一千的奴僕有做甚物毋著？Kiám毋是只有恬恬無做工nā-tiāⁿ mah？列位會員，你我有做所受交代的工á無？
(3)傳道的目的
傳道的目的毋是為擴張教勢人額加添努力予獻金額增加；受主差派的學生去做工倒轉來報告趕鬼的事，人額加添的事，總是主看遐的毋是第一義的的問題，「就是為著咱的名記佇天來歡喜。」傳道的目的就是chhoā人到主得著十字架的救恩欲予信的人重頭生脫出罪惡得著真的活命。
路德馬丁講，「對所寫的上帝的話，魔鬼是毋驚伊，總是將所寫的上帝的話大聲來宣言的時魔鬼就會敗退，」予咱知聖經內的真理若無人來傳出是袂通發生效力。
人的心內有罪惡，若聽著真理的時，魔鬼就會敗退。毋若按呢，為著咱所傳的福音的真理若有一人悔改的時，會驚天動地。天使也欲為著彼人歡喜。咱的確著有份佇這个驚天動地的成功。
(4)現在欠145人以上
聽傳道幹事章牧師講，1959年7月現在kan-ta咱平地教會無工人的教會有174間，今年畢業會通派去蹛教會只有29人，猶有145的教會無牧者，主kiám無叫你講，稻今熟熟欠工人。你kiám無感覺使命，閣若欲去做工最好的機會的人kiám毋是咱T.K.C.的會員mah？145間無工人你kiám會無感覺甚物？列位你kiám毋將你本身，將你的囝，將你的孫，將你的小弟，獻佇福音的第一線mah？咱看145間無工人，kiám攏無有甚物感覺；欠祈禱，欠精神，欠奉獻，欠鼓舞，欠幫贊，毋若按呢，南洋海外也teh欠咱的工。
(5)請saⁿ-kap反省。
現在佇咱教會中濟濟得著好的地位，好的景遇，經過好的生活。Kiám毋是伊的阿祖，阿公，阿pa遮的人做主的忠僕，受祝福後裔受致蔭；偌濟人袂記得這款的恩典，毋若袂通幫幫傳道理的工，反轉做傳福音的阻礙。
若問伊講怎樣毋獻你的囝？坦白的人講，毋甘我的囝去做遮艱苦的工，做平信徒較快活；婉轉的人講，我的囝袂堪得，予我的囝做別物事業趁大錢才奉獻做傳福音的路用。到底遐的得著機會趁大錢的人奉獻偌濟做傳福音的路用？也有常常聽熱心款的姊妹講，神學生，傳道，牧師真感心，真犧牲，真可取；若講，按呢將你的查某囝獻做牧師娘好毋？就應講，我的查某囝無合。撿彩有影有無合的。常常聽某信徒的查某囝嫁某事業家，某醫生掛樓仔，田園做嫁妝；kiám毋將這嫁予傳教者？若遐的會通幫贊做伊傳道的路用，kiám毋是幫贊真大？咱做父母的人kiám無責任。牧師的囝怎樣毋接紲老父的工？
(6)結論
佇幾年前予世界的新聞雜誌大振動，就是佇南美洲殉教5个宣教師，in為著Ò-ka族的人殉教，後來有in的某，in的小妹接紲閣去遐傳福音。遐的人怎樣會按呢？In的老父已經失落後生，怎樣欲閣送in的新婦á是查某囝去遐，總是Ò-ka族的人已經得著福音改變in ê生活入佇光明lah！
真實「傳福音的人，in的跤跡媠到怎樣？」（羅馬10:15）。
士提反為傳福音殉教，毋kú伊的恐毋是空空的。有叫醒掃羅變做保羅。咱若有認明福音是甚物，咱無傳是擋袂牢，連遐的石頭也欲出聲喝。咱有喙kiám通恬恬無出聲，kiám通徛teh講我袂曉，我無力通做啥工？T.K.C.的兄姊起來聽主的聲，著好膽進前主teh呼召你。「我閣聽見主的聲講，我通差chī-chuī矣？我就講，我佇遮通差我」（以賽亞6:8）
5角銀獻金
收支報告書
6月份所獻的
T.K.C. 金額 T.K.C. 金額
星中
雙連 50.00
北中
艋舺 81.00 延平 106.50
李春生
紀念教會 120.00
三重埔 57.00
竹中
東中
玉里 40.00 信義 100.00
關山 20.00
中中
田中 32.00 牛眠 8.00
嘉中
西門 125.00
南中
左鎮 24.00 南門 45.00
玉井 45.00 善化 50.00
頂山跤 60.00
高中
舊城 10.00 仁武 29.00
九如 8.00
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461