Kám-siā kap cheng-chìn ê bo̍k-phiau.
Chú-phian-jîn siá
1960年1月853期 9-10
Sàng liáu 1959 nî hoan-gêng 1960 nî, tāi-seng ài kám-siā choân-thé kàu-hoē kap tho̍k-chiá chu-uī tuì pún Pò ê chi-chhî kap ài hō͘, hō͘ pún Pò ē-thang chìn-ji̍p tē 74 nî; soà chiok chu-uī sin-sim lêng-sèng an-lêng kap tióng-chìn.
Tī chia phian-chiá chiàu-lē ài koh siá kuí-kù lâi siàu-liām koè-kì Siōng-chú si-lo̍h tī lán ê kàu-hoē í-ki̍p pún Pò ê hông-in, siāng sî soà uī-tio̍h tī lán ê chiân-tō͘ só͘ tio̍h cheng-chìn ê kuí hāng bo̍k-phiau lâi saⁿ-kap bián-lē.
Taⁿ lán ê kàu-hoē koè-khì chit nî kú ū ke kuí hāng thang kám-siā ê; chū-jiân lán m̄-sī ta̍k hāng moá-ì, chóng-sī iā m̄ sī ta̍k hāng uî-hām, ta̍k hāng put-boán, in-uī kū-nî tiong choè chió iáu ē-thang uī-tio̍h ē-bīn kuí-hāng lâi kám-siā.
I. Tio̍h kám-siā ê kuí hāng sū.
Kàu-hoē kap sìn-tô͘ ū cheng-ka joā-choē? Siōng-tè ê sò͘-jī tio̍h kàu 2 goe̍h tiong Chóng-hoē khui-hoē ê sî chiah ē-thang pò-kò, iáu kú kuí nî lâi Tiong-hoē ū ê sin chham-ka, ū ê kū chham-ka tī P.K.U. ê hō-tiàu ē-bīn khak-si̍t ū tī ka-kiông chìn-tián tiong. Iû-kî sī tuì kū-nî Chóng-hoē gī-koat P.K.U. chò choân-séng ê ūn-tōng í-lâi, chiah tī teh ài ka-kiông chhui-tián i ê kang-chok; khoàⁿ koè-khì ê P.K.U. si̍t-chè siōng ū siu liáu chē-chē hó ê hāu-kó, chhim-chhim kî-thāi si̍t-chāi ê só͘-jī, koh hoat-piáu ê sî ē-thang koh khah ke-thiⁿ tī Chú ê bīn-chêng ê hoaⁿ-hí kap kám-siā.
Koh chi̍t hāng sī Hái-goā Soan-tō-hoē si̍t-chè-tek ê chìn-chhut. Chū tī joa̍h-thiⁿ ê tiong-kan, chiū khai-sí chhiú-sio̍k keng-koè chē-chē sū-bū-siōng ê khùn-lân, kàu 12 goe̍h chhe 7 lán ê tē-it jīm ê Hái-goā Soan-kàu-su Tân Hāu-chàn Bo̍k-su kó-jiân chhut-hoat, taⁿ hiān-sî ún-tàng í-keng kàu Má-lâi-a poàn-tó ê sin-jīm-tē teh khai-sí kang-chok lah. Chit chhù ê Hái-goā Soan-kàu-su, nā-sī jîn-châi sǹg sī lán kióng-èng, chóng-sī keng-chè oân-choân sī Má-lâi-a ê Hoa-kiâu kàu-hoē hū-tam, só͘-í iáu m̄-sī si̍t-chit-tek lán iáu-kú tī chió ê ū chīn-tiong, Siōng-tè iā beh sia̍t-li̍p lán koán toā ê; hó ê khai sí chiū-sī sêng-kong ê chi̍t-poàⁿ, lán nā ū sêng-sim, ū jia̍t-chêng. Chú tuì chit hāng sū ê chiok-hok tek-khak ū bû khó hān-liōng ê chiah tio̍h.
Taⁿ tī san-tē, tī pîⁿ-tē á-sī iân-hái kheh-chng chì kàu Phêⁿ Soan, Lú Soan, á-sī chheng-liân siàu-liân kang-chok lán khoàⁿ i ê sū-kong ê chìn tián, ū ê sī béng-chìn, ū ê sī chiām-chìn; iáu-kú kám-siā Chú! Chin chió thiaⁿ tio̍h chí-ū teh hiān-chōng î-chhî, koh khah hán-tit thiaⁿ tio̍h kóng teh thè-pō͘, teh soe-bî; tuì án-ni khoàⁿ, thang chai Siōng-tè ū joā-nih tek-pia̍t ài hō͘ koàn-kò͘ tī lán kàu-hoē ê téng-bīn.
II. Sin chìn ê sū-kang.
Lēng goā ài koh thê-khí ê chiū-sī sin chhòng-pān ê kang-gia̍p chit-he̍k thoân-tō kap sin kó͘-bú ê Bûn-jī thoân-tō ê sū.
Chū tuì Tâi-lâm Sîn-ha̍k-īⁿ siat-li̍p Kang-gia̍p chit-he̍k thoân-tō káng-chō, jiân-āu koh tī 10 goe̍h ū Bí-kok Liân-ha̍p Tiúⁿ-ló kàu-hoē phài Tō͘ Chó-chì Bo̍k-su(Rev. To͘d) lâi chú-chhî liáu-āu í-keng ū chek-ke̍k tián-khai tiau-cha, kè-e̍k, si̍t-si̍p í-ki̍p si̍t-chè kang-chok , jû-kó kang-chok tit Chú si in, tuì tī chit hong-biān thoân-tō ū siu tio̍h só͘ kî-thāi ê sêng-chek, tī lán Tâi-oân chit khoán ti̍t-ti̍t teh kang-gia̍p-hoà ê siā-hoē, tek-khak beh koh toā ke-thiⁿ tit-kiù ê lâng tī lâng tī kang-gia̍p chit-he̍k hong-bīn chiah tio̍h.
Koh chhin-chhiūⁿ lán ê Bûn-jī thoân-tō ê sū, tī kū-nî lán ê Kong-pò-siā, í-ki̍p í-goā pa̍t kàu-phài, á-sī to̍k-li̍p ê bûn-jī thoân-tō ki-koan, só͘ piáu hiān ê, thang kóng sī ū siong-tong hoa̍t-phoat ê khì-siōng. Pún-siā tī chi̍t-nî tiong í-keng pêng-kin goe̍h-poàⁿ-ji̍t chiū chhut-pán chi̍t hāng chheh; iū koh muí goe̍h ū hoat-hêng pún Kong pò kap kok-bûn pán ê Hù-khan, í-goā uī-tio̍h Chú-ji̍t-o̍h, uī-tio̍h Lú Soan-tō-hoē, ta̍k goe̍h lóng ū seng-sán siong-tong pō͘-sò͘ ê "Ki-tok-kàu Kàu-io̍k " kap "Lú Soan ê goe̍h-khan"; tuì án-ni lâi khoàⁿ sui-jiân bē thang chū-khoa Bûn-ūn ê liông-chhiong(文運的隆昌), iáu-kú kok hong-biān chù-tiōng bûn-jī chò thoân hok-im chò chō-chiū ê khì-kū, í-keng ke chin siū chù-tiōng, jî-chhiáⁿ Pún-siā chē-chē kè-e̍k kap ló͘-le̍k ū tit-tio̍h kuí-uī goā-kok kàu-hoē ê chàn-tông, tuì Ka-ná-tāi á-sī Eng-kok, ū ê sī goân-iú ê, ū ê sī sim-poah ê, lóng ū siong-tong sò͘-bo̍k ê oān-chō͘ lâi kióng-ki̍p lán, jī-chhiáⁿ lán kàu-hoē lāi sui-jiân sī sò͘-bo̍k bô chē, iā ū tit-tio̍h pó-kuì ê hōng-hiàn, che lóng-sī lán uī-tio̍h bûn-jī sū-kang só͘ khoáⁿ chò pó-poè teh kám-siā ê.
III. Taⁿ só͘ kóng chiah ê lóng-sī thang kám-siā ê, chóng-sī lóng m̄-sī thang chū-boán chū-chiok ê. Pit-chiá só͘ ài kóng chiū-sī "Kám-siā kap cheng-chìn ê bo̍k-phiau " koan-hē chit hāng nā beh pâi-lia̍t sī ū chin-chē, chóng-sī choè chió chiàu téng-bīn só͘ kóng chiah ê ēng kám-siā lâi hoê-kò͘ ê ta̍k-hāng sū-kong, kî-si̍t chiū-sī ài hō͘ i koh ka-kiông koh cheng-chìn ê tiōng-iàu bo̍k-phiau lah.
Poē-ka ūn-tōng í-keng ū sin kè-ek ê chhui-hêng tāi-kong chhut tī pún Pò, kî-thaⁿ chhin-chhiūⁿ T.K.C. á-sī Kàu-io̍k-chhù, Châi-bū-chhù, in ê sin ê phāu-hū kap tián-bōng iā ū chhut tī pún pò. Kì-chiá tng tī che sin-nî ài kèng-hiàn kuí-kù chò kiong-chiok ê ì-sù ê sî, sūn-soà thê-khí í-siōng ê kuí-hāng kòng-hiàn hō͘ tho̍k-chiá, ǹg-bāng hō͘-siong bián-lē hō͘-siong chhiat-chho, tī Chú ê chiok-hok kap léng-tō ê ē-bīn koh khah ū kong-bêng ê chiân-tô͘ sī sim só͘ goān!
