Tī A-mi cho̍k ê bûn-jī thoân-tō

Soan-kàu-su: Bêng Lo̍k-tō

1960年6月858期       9-10

  Thâu chi̍t pái ēng A-mi bûn siá ê tù-chok chhut-pán í-lâi í-keng ū saⁿ-nî kú lah! Kàu-taⁿ í-keng chhut-pán ê tù-chok ū Jī-bó , Tit-kiù ê lō͘(soán Sèng-keng chat lâi soat-bêng kiù-sio̍k ê hong-hoat), Ngá-kok-su, Má-khó hok-im, Sèng-si, Chú-ji̍t-o̍h kàu-chhâi tiong. Í-goā iáu ū teh chún-pī chhin-chhiūⁿ ē-bīn só͘ kì ê ポスタ- á-sī bûn-su: "Chú ê kî-tó-bûn," "Cha̍p-tiâu-kài, " "Sù-tô͘ sìn-keng" í-ki̍p koan-hē kàu-gī, Sèng-keng gián-kiù, kî-tó ê chióng-chióng soè -pún chheh.

  Tuì kū-nî 10 ge̍h khí, kàu-hoē ū khai-sí ēng A-mi oē kap Kok-gú tuì-chiàu ê Chú-ji̍t-o̍h toaⁿ-tiuⁿ kàu-chhâi, tī thâu chi̍t kuì ū boē chhut 2,000 hūn, tī téng-kuì ū boē-chhut iok 4,000 hūn. Kî-thaⁿ ū boē khah-choē chhut-khì ê, chiū-sī Má-khó hok-im toān, iok 8000 pún, Sèng-si iok 3,000 pún. Khoàⁿ chiah ê tāi-khài chiū oē chai-iáⁿ kàu-taⁿ ēng A-mi oē só͘ phian-e̍k ê bûn-su sī sím-mi̍h chiah tio̍h.

  Tī chiah ê chheh chhut-pán í-āu , iáu koh ū chi̍t ê toā būn-tê, chiū-sī beh cháiⁿ-iūⁿ kà-lâng tha̍k. Tī A-mi cho̍k tiong, kàu choè-kūn chiah ū chit ê pí-kàu khah ún-tēng ê bat-jī ê hoat-tián. Chóng-sī ū nn̄g ê sū-si̍t khak-si̍t chó͘-gāi bat-jī ê chìn-pō͘: Tē-it chiū-sī A-mi oē pún-sin ū kuí-nā chióng ê thó͘-oē, só͘-í hiah ê chheh chhut pán liáu-āu, ū chin-choē só͘-chāi ê lâng, kám-kak tī hit lāi-bīn ū chin-choē boē bêng ê oē. Koh chi̍t ê chó͘-gāi chiū-sī ū chin-choē lâng, iû-kî sī hiah ê chí-tō-chiá tuì Ji̍t-pún ê tha̍k kap kóng, lóng chin cheng-thong ê sū. Choè chho͘,kàu-hoē ê chí-tō-chiá, bô kám-kak lâng ē-hiáu tha̍k in ka-kī ê giân-gú ê tiōng-iàu-sèng, chóng-sī hiān-chāi toā pō͘-hūn ê chí-tō-chiá lóng oē kó͘-lē in khì tha̍k ka-kī ê bûn-jī lah. M̄-nā án-ni , hiān-chāi iā ū chhái-iōng khah phiau-chún ê "Hong-giân," ia̍h ná lâi ná chē lâng teh ha̍k-si̍p. Koh-chài Sèng-si kap Chú-ji̍t-o̍h kàu-chhâi ê chhut-pán iā ū toā-toā kek-lē in ài ha̍k-si̍p cháiⁿ-iūⁿ tha̍k. Kî-thaⁿ bat-jī ê hoat-tián sī tuì tī Sèng-keng Kong-hoē ū phài-lâng kàu ta̍k só͘-chāi khì kà lâng tha̍k, koh-chài tuì tī chióng-chióng ê káng-si̍p-hoē tiong ê kó͘-lē só͘ tì. Tuì í-siōng chiah ê, lán thang khoàⁿ-kìⁿ ū choē-choē iàu-sò͘ teh chhiok-chìn bat-jī ūn-tōng. Kiám-chhái choè toā ê sū-si̍t chiū-sī tuì tī ēng ka-kī ê oē lâi tha̍k Sèng-keng , liáu-āu chiah thâu chi̍t pái hoat-kiàn tio̍h Sèng-keng lāi ò-biāu ê chin-lí só͘ thé-giām tio̍h ê toā hoaⁿ-hí.

  Hiān-sî A-mi cho̍k ê cheng-liân ū teh ha̍k-si̍p Kok-gú, iā ū chin-choē oē-hiáu kóng Tâi-oân oē. Nā-sī án-ni, kó͘-lē tī Tâi-oân ê jîn-kháu tiong chiàm ke̍k chió-sò͘ ê A-mi cho̍k khì o̍h in ka-kī ê giân-gú kiám thang kóng sī teh khui tò-thè chhia mah? Siōng-chhiáⁿ í-keng ēng Ji̍t-bûn á-sī Tiong-bûn siá ê Ki-tok-kàu su-che̍k , sī pí ē thang hoan-e̍k choè A-mi oē ê chheh khah chē.

  Chóng-sī tī chia ū chit ê kî-biāu koh sī chin ê sū-si̍t, tông-sî iā-sī sè-kài ta̍k só͘-chāi chèng-bêng chhut-lâi ê sū-si̍t, chiū-sī tng chi̍t ê sió cho̍k, khai-sí beh o̍h in ka-kī ê giân-gú ê sî, kiû-ti-io̍k(求知慾) chiū cheng-ka tuì chit ê kiû-ti-io̍k ín-khí in khì ha̍k-si̍p lēng-goā ê giân-gú, iû-kî-sī kap in ū chú-sio̍k koan-hē ê toā-cho̍k ê giân-gú.

  Chóng-sī tuì lán Ki-tok-tô͘ koh-khah tiōng-iàu ê, chiū-sī lán siong-sìn muí chi̍t ê lâng uī-tio̍h beh chin-si̍t liáu -kái kap sêng-si̍t chiap-siū, chì-chió iā tio̍h ē-hiáu tha̍k Siōng-tè ê oē ê tē-it iàu-kín ê pō͘-hūn.