Kò͘ Hân Liân-ô͘ Bo̍k-su
1960年8月860期 20-21
Chhit goe̍h 19 ji̍t oá beh ji̍t-tàu, tī Tâi-lâm chhī ke-lō͘ tiong , ū chi̍t ê poàⁿ ló-lāu ê sin-sū hut-jiân tó--lo̍h-khì, chū án-ni koè-khuì , ke-lō͘ ê lâng chin gông-ngia̍h, uî kàu chin-chē lâng lâi khoàⁿ keng-koè kéng-chhat ki-koan kiám-cha kiat-kó, chiah chai-iáⁿ sī lán ê Hân Liân-ô͘ Bo̍k-su. I choè-kīn sin-khu koh khiàm-an, tuì jīm-tē Ko Tiong Lîm-hn̂g kàu-hoē tńg-lâi kò͘-hiong Tâi-lâm chiū-kīn i-seng, bô phah-sǹg soà án-ni tī lō͘-tiong-ng sòng-sit sìⁿ-miā; chiàu kiám-cha, chiū-sī in-uī sim-chōng-pēⁿ lîm-sî hoat-choh lâi sí ê, hō͘ thiaⁿ-kìⁿ ê lâng bô m̄ gông-ngia̍h koh siong-sim.
Kò͘ Hân Bo̍k-su kin-nî tú 60 hoè, tuì Tiong-o̍h, Tâi-pak Sîn-ha̍k-īⁿ chhut-sin, iā bat khì Ji̍t-pún chìn-siu, hiān-jīm tī Lîm-hn̂g chò Bo̍k-su , chêng tī Hái-po͘; Gû-taⁿ-oan , Tek-san, Chheng-chuí, Hó͘-boé, Liông-chéⁿ, khoàⁿ-sai-ke, Thài-pêng-kéng, Tâi-tang, Pang-kiô chiah ê kàu-hoē, í-keng 33 nî kú. Chò lâng phoh-si̍t koh un-jiû, m̄-bat kap lâng kè-kàu saⁿ-chiⁿ lī-ek kap koân-le̍k tē-uī, ta̍k só͘-chāi thoân tō-lí ho̍k-sāi kàu-hoē to sī chīn-tiong hô-khì, hō͘ lâng hó chhin-kīn.
I chêng ū gâu pang-chān ê bo̍k-su-niû khó-sioh 10 goā nî chêng koè-sin, liáu-āu koh ū hiān-sî ê bo̍k-su-niû, iā sī gâu pang-chān i, khó-sioh lóng bô sè-kiàⁿ, kai-chài ū chi̍t uī ióng-chú, í-keng 14 hoè.
Jī-it ji̍t tī i chêng bat ho̍k-bū kú-kú ê Khoàⁿ-sai-ke kàu-hoē kú-hêng kò-piat-sek, hn̄g kīn kàu-hoē chē-chē lâng lâi kap i sek-pia̍t, kiû Chú an-uì uî-cho̍k.
