SIĀ-LŪN
Ngiâ-chih sin ê nî!
Tīⁿ Liân-khun
1961年1月 865期 3-4
Kin-nî sī Tiong-hoâ Bîn-kok khai-kok tē 50 nî, koh 1961 nî 1 ge̍h ji̍t sī lé-pài-ji̍t, iū-koh 12 ge̍h 31 ji̍t iā sī lé-pài-ji̍t; chit khoán chin ū ì-gī ê nî-thâu, sió-tī ū ki-hoē thang kap tâng siū un ê hiaⁿ-chí saⁿ-kap siūⁿ Chú kî-biāu ê thiàⁿ, si̍t-chāi tio̍h kám-siā Kong-pò-siā chú-pit ê ngá-ì, khiok chhim-chhim kám-kak ka-kī ê chhián-ha̍k hui-châi kap sìn-gióng keng-giām ê jio̍k-siáu; chhiáⁿ goān-liōng. Ji̍t-pún lâng tī chiaⁿ ge̍h chhoe ū chit ê si̍p-koàn kiò-choè hatxu-yume(初夢), ì-sù chiū-sī tī nî-thâu só͘ bāng-kìⁿ chin hó ê bîn-bāng thang choè chi̍t nî kú ê hó chhut-hoat. Taⁿ goá tī chia beh siá ê kiám-chhái pìⁿ choè goá pún-sin ê chho͘-gāng, chong-2-sī chin kî-thāi thang choè hō͘-siong ê saⁿ bián-lē.
Chhòng-sè-kì 15 chiuⁿ ū kì-chài chi̍t hāng chin chhù-bī ê kò͘-sū. Tng A-pek-lân uī-tio̍h bô hō͘-sû teh kan-khó͘ sim ê sî, Iâ-hô-hoa tī īⁿ-siōng tiong chhut-hiān kà-sī i, soà chhoā i chhut-khì goā-bīn kóng, "Lí khoàⁿ thiⁿ, sǹg hiah ê chhiⁿ" (15:5). A-pek-lân chiū sìn Iâ-hô-hoā, I chiū kā sǹg choè gī (16 chat). Goá kám-kak chit ê sū m̄-sī teh kóng-khí A-pek-lân nā-tiāⁿ. Lán kiám boē thang tuì chit ê kì-sū saⁿ-kap tit-tio̍h hó ê kà-sī.
(1) Khui-khoah koh toā ê tián-bōng.
A-pek-lân uī ka-kī ka-têng ê sū ut-chut, thó͘-khuì. Chóng-sī Iâ-hô-hoa ài i chhut-khì goā-bīn, khoàⁿ hiah ê êng-kng chhàn-lān, khoàⁿ koh khah khui-khoah koh toā ê kéng-tì. Lán tī chit nî-thâu, kiám m̄-sī tio̍h chhin-chhiūⁿ án-ni khiā tī khah khui-khoah ê só͘-chhāi lâi tián-bōng só͘ beh kiâⁿ thâu-chêng ê lō͘-chām. Kè-khì chit nî tit-tio̍h Chú toā ê un-tián, chóng-sī lán siông-siông ko͘-hū I ê thiàⁿ. Lán ê kang-chok, P.K.U. ê kang, thoân-tō, Ki-tok-kàu kàu-io̍k, chheng-liân sū-kong, hū-lú sū-kong, pīⁿ-īⁿ, ha̍k-hāu, téng; tī Chú ê bīn-chêng hoán-séng ê sî, kám-kak só͘ kiat ê ké-chí bô kàu-gia̍h. M̄-kú Chú ài chhoā lán chhut-khì khoàⁿ thiⁿ-chhiⁿ! Khoàⁿ koh khah toā ê īⁿ-siōng!! Koh 5 nî lán beh ngiâ-chih 100 chiu-nî lah, lán ê kàu-hoē, lán ê sìn-tô͘ ê liōng ū ke-thiⁿ, m̄-kú tuì sò͘-chit(素質) hong-bīn kiám ū si̍t-chāi toā chìn-pō͘ neh? Te̍k-pia̍t tuì bûn-su thoân-tō hong-bīn iáu-kú bî-bî put-chìn, kàu taⁿ iáu bô chi̍t phō Sin-iok Sèng-keng ê chù-kái tuì lán Tâi-oân kàu-hoē chhut-pán. Ū-sî goá siūⁿ án-ni, sim ut-chut kan-khó͘. Tī chit sî Chú beh chhoā lán chhut-khì khoàⁿ téng-bīn ! Khoàⁿ Siōng-tè uí-tāi ê chok-uî, gióng-bōng I ê êng-kng kap khuì-la̍t!!
(2) Khoàⁿ thiⁿ, sǹg chhiⁿ.
Si-phian 8 phiⁿ sī chi̍t siú chin suí ê si, si-jîn tī hit lāi-bīn biô-siá Siōng-tè chhòng-chō ê uí-tāi; siāng-sî siūⁿ kàu ka-kī ê ke̍k-kî pi-bî jio̍k-siáu. Kho-ha̍k ê chìn-pō͘ ū sî hō͘ jîn-luī siⁿ-khí kiau-ngō͘ kap kè-thâu ê chū-chûn-sim. Tì-kàu ū sî siūⁿ beh kū-choa̍t chhòng-chō ê Chú, ēng ka-kī choè it-chhè ê chú-chái. Lán sui-jiân bô poa̍h-lo̍h tī chiah ê lī-keng ê chhò-gō͘, iáu-kú ū sî lán uī-tio̍h kang-chok, uī-tio̍h sū-chêng, tì-kàu tuì chhòng-chō ê sîn-pì sit-lo̍h kám-kak. Te̍k-pia̍t boē kì-tit lán ê loán-jio̍k, tāng choē. Si-jîn kóng, "Sè-kan lâng sī sím-mi̍h, Lí siàu-liām i? Lâng ê kiáⁿ sī sím-mi̍h, Lí koàn-kò͘ i ? ".Khiā tī ú-tiū ê sîn-pì ê bīn-chêng, te̍k-pia̍t khiā tī sèng ê Siōng-tè ê bīn-chèng, ǹg-bāng lán put-sî ū chit hō kèng-khiân ê kám-kak. Sèng ê Siōng-tè kap pî-bî, ù-oè ê jîn-luī tiong, í-keng sit-lo̍h óng-lâi kau-poê, chóng-sī tuì Siōng-tè bô hān-liōng ê un-tián, hō͘ lán thang chhin-kūn I. Tī chit ê nî-thâu, koh chit pái uī-tio̍h chit ê toā ê sū-si̍t siⁿ-khí sin ê kám-kek kap kèng-uì ê sim.
(3) Tio̍h tuì pò͘-pîⁿ chhut-khì.
A-pek-lân tiàm pò͘-pîⁿ lāi ê sî, i ê gán-kong oe̍h koh soè, uī-tio̍h sió-sió ê sū khoà-lū sit-chì. Tì-kàu boē kì-tit i ū chhòng-chō ê Chú thang oá-khò, koh boē kì-tit Siōng-tè kap i só͘ iok-sok ê. Chiong Siōng-tè kap i ê iok-sok lia̍h choè chi̍t chióng ê khài-liām, bô khak-si̍t ê. Lán kè-khì ê sìn-gióng seng-oa̍h m̄-chai ū hām-lo̍h tī chit khoán ê chōng-thài bô? Chú kin-nî beh chhoā lán chhut-khì khah khui-khoah ê só͘-chāi lâi kia̍h-thâu gióng-bōng I. Lán tek-khak tio̍h tuì lán ê pò͘-pîⁿ chhut-lâi. Tio̍h hō͘ Chú chhoā chhut-khi! Lán ê sìn-tô͘ sò͘ sui-jiân m̄-sī chin choē, chóng-sī lán nā hó-táⁿ khîⁿ-tiâu bān koân-lêng ê Siong-tè, hō͘ I chhoā chhut-khì I ài lán khì ê só͘-chāi; lán tek-khak beh keng-giām tio̍h kè-khì só͘ m̄-bat thé-giām tio̍h koh khah toā ê sū. ēng Chú ê ji̍t khai-sí koh ēng Chú ê ji̍t lâi kiat-sok ê kin-nî, ǹg-bāng oē chiâⁿ choè hō͘ Chú chhoā chhut-khì khoàⁿ thiⁿ, sǹg chhiⁿ ê chi̍t nî.
Lán tio̍h choè ê sū hui-siông choē, te̍k-pia̍t choân kàu-hoē, bô lūn thoân-kàu-chiá, tióng-chip, koh khah sī sìn-tô͘ lóng tio̍h khí-lâi uī Chú choè hó ê kiàn-chèng, cheng-chiàn sìn ê hó cheng-chiàn.
Saⁿ-kap siong-sìn chá-chêng sǹg A-pek-lân choè gī ê Chú, kin-á-ji̍t iā beh chheng lán choè gī, chiap-la̍p lán choè I só͘ thiàⁿ ê kiáⁿ-jî.
Kiû Chú ín-chhoā lán kin-nî ê lō͘-chām, hō͘ lán tek-sèng kàu ū chhun.
Kiong-chiok kok uī sìn-gióng toā chìn-pō͘!
Pit-chiá:
Goân-che̍k: Tâi-tiong koān.40 hoè.
Ha̍k-gia̍p: Tâi-oân Sîn-ha̍k-īⁿ.
Hiān-jīm: Sin-tek kàu-hoē bo̍k-su.
Kong-chit: Chóng-hoē Gī-tiúⁿ.
