首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 現今的大問題
現今的大問題
卷期：第865期 本次： 日期：1961/1 刊名：台灣教會公報 頁數：16
篇名：現今的大問題 [ Hiān-kim ê toā būn-toê ]
作者：
  顯示 : 漢羅 全羅 並列  

家庭講座(1)現今的大問題

1961年1月 865期   16-18

 

▲得著主筆陳牧師的gâu計劃，對今年起會加添一篇「家庭講座」予咱通相與想家庭的註問題，實在夠額歡喜的事。

▲總是攏無拍算，續受命愛負擔頭一擺的工；因為毋是這方面的專家，我感覺不配無能。

▲向望對後月號，會得著專家的文章，通喚起咱對家庭問題的關心，相與盡基督徒的本份。

家庭是咱人頭一個出發點，因為攏佇這對父母的下面出世，佇遮頭擺見著世間。

家庭是一个小社會，是第一要緊的團結（原文誤做thoân-ché）；因為佇遮有發生關係，有「你」佮「我」會交陪。

家庭是生活的中心，是咱的基礎；因為人佇遮生長大漢，對敢teh出入。

  今雖然是按呢，最近常常聽見一句話，講，「某某人的家，實在毋成家庭」這是啥物意思？怎樣會變做按呢？若是有影有真濟毋成家庭的家，這敢毋是正正就是現今的大問題？因為咱的生活的基礎已經受搖動lah。

這霎相與來想幾項事：

  1。急變的社會

咱拍算著愛明白現今的時代，因為這个變遷的社會，事實有對外面大影響咱的家庭。

  照咱所在，現今就是未曾有的緊張的時代(1)有偌爾濟早時的失眠國家teh運動民族的獨立（按：原誤寫作「to̍k-ji̍p」）。(2)佇逐所在有真旺成的革命風氣。(3)有真複雜的東西國家的冷戰 (4)有真濟舊的宗教koh再teh復興。

總是這時我愛特別提起，幾項佇台灣所有的重要（按：原誤寫作「tiong-iàu」）事實。

  1) 人口（按：原誤寫作「Jî-kháu」）過多。

這陣的人口，已經欲倚光復彼時的兩倍。土地攏無較加，若是人直直加添，這會隨時直接影響咱的食佮住的問題。這敢佮家庭無關係？

  2)經濟困難。

  Oh找頭路，亦收入少，若是生活費用懸，經濟根本袂安定。為著按呢，連婦人人亦著出去外面找工作á是佇厝內做副業。這敢袂影響家庭？

  3)近代工業。

以前是農業國家，若是無工業化綴袂著。這个工業化佮一切都市集中，實在有直接影響經濟，社會，以及文化的不安。家族受四散，人亦ná機器化實在欲怎樣通尊重個人的人格？

  4)民主主義。

戰爭後所流行的民主主義，有偌濟人實在理解彼个精神？民主的精神是會約束家己，總是人攏誤會teh亂用「自由」這个錯誤；有影響佇新時代佮舊時代間的不和。

  5)西洋文化有偌呢濟的不良文化，猶原有進口成做大影響。因為按呢，予咱的東洋基本道德（按：原誤寫作「to-tek」）續混亂，致到影響到佇家庭的風氣。

  2。家庭危機。

  今咱來看家庭的時，欲發見著真濟困難點。原來應該是和氣ai-ai的家庭，今仔日濟濟變做怨妒，相爭，無理解，無協力，一人一路的團體。有濟濟家庭，in的厝不過是kan-ta變做食堂欲食飯，做旅館（按：原誤寫作「lú-khoán」）欲歇睏的所在nā-tiāⁿ。實在是可憐到極！這敢毋是危機？

  1)制度變換。

以前咱的傳統就是大家族制度，若是已經漸漸換做小家庭主義。總是到啥物程度通 按呢變換？有時為著毋成兩爿，反轉發生麻煩。

  2)欠缺團結。

夫婦，父囝，兄弟，ta-ke新婦，以及親人的中間，有欠缺相疼，相體貼的心。小社會的家庭袂-通成做一心，袂免得佇每日的新聞所看的離婚，刣人，自殺，相告等；攏是對遮起因。

  3)道德腐敗（按：原誤寫作「hù-pāi」）

濟濟不良的娛樂，電影，á是小說有影響這个社會，致到男女間的關係續歪chhoah。Hiah呢濟的公共茶室á是軍中樂園，敢有影袂影響咱的家庭？

  4)失落教育。

父母的不和，á是無關心囡仔，有是對囡仔的教育完全用利己tek，無尊重囡仔的人格。遮的攏有成做今仔日的少年犯罪的大原因。出太保太妹的家庭內，根本有失落實在的教育。

  5)婚姻問題。

  欲成一个家庭是對結婚來開始，按呢若會事先好好指導婚姻，穩當通期待將來有媠的家庭。佇過去，實在有偌濟人關心佇這點？真可惜，咱若講婚姻指導，只有teh想「做媒人鬥介紹」nā-tiāⁿ。

  3。教會的課題

既然家庭是現今的大問題，到底死啥物人著這个指導的責任？敢通kan-ta期待社會的風聲á是傳統？

教會事實是愛徛佇社會的面前來行，雖然是少少的數額，咱應該愛有創造tek的氣力。

為著按呢，佇這霎教會的重要方針有兩項：

  1)家庭的教會。

每一的基督徒家庭就是教會的基，著愛成做這个小教會佇所徛起的所在干證耶穌基督。為著這个方針，咱愛致意家庭的教育，亦佇牧會上每家庭佮教會愛密切的連絡。

  2)信仰的生活化。

咱若看教會的歷史，活活的信仰攏有通過伊的生活表現出來。既然咱欲成做基督化家庭，咱若會用基督的信仰表現佇日常的生活，這才會利益咱的家庭以及整個（按：原誤寫作「chèng-kô」）的社會。

  今關係家庭問題的研究，相與簡單來想咱台灣教會佇過去所做--的，以及期待將來應該著做--的。

1)回想過去。

以前有幾位牧師，不止致意佇家庭生活問題的研究，不過這只有是佇in的牧會上淡薄teh提起而已。

到佇1954年11月2-16日，有10名（包含外教派），代表去參加，「東亞基督教家庭研究大會」」倒轉來。對這時起，大家的目睭有加較闊，亦認識這个重要性。

後來亦捌成立「基督化家庭生活研究會」，á是有代表出國參加1958年2月1-4月25 日佇泰國的「東南亞結婚、家庭問題研究會。」

事實已經有幾位真關心的人佇遐，佇敢teh喚起家庭生活問題，是通歡喜的事。

總是真可惜，到今猶袂通有啥物繼續性有力的組織，á是研究中心通推行佮供應濟濟的需要。

2)期待將來。

1。設立研究會。

用有心的人佮幾位專家，通設立一个同志的研究會；通過這个會發題，討論通提出指點予教會。

所著討論的問題，照下面：

家庭制度的問題。

性，愛情，結婚觀

婚姻的準備。

婚姻的協談。

父母的教育。

產兒的問題。

家庭教育。

日常生活。

家庭佮教會。

家庭佮社會。

家庭指導。

青年指導。

訓練指導者。

發刊家庭雜誌。

  2。強化家庭部婦女會。

中會家庭部欲研究的範圍tio̍h 愛 較闊，通指示各教會欲做的方針。婦女會是徛佇第一線teh工作，向望會研究全般tek「家庭生活問題」。

  3。訓練指導者。

切切需要有專門的人才，通負起這个重要的工。向望會對神學tek，醫學tek，心理tek，精神tek等，的各方面出領導的人（按：原誤寫作「âng」）。

  期待對今年起，會閣較濟人為著「基督是我家之主」（基督是我家之主）來努力。

筆者：

原籍：台中縣，34歲。

學業：台灣神學院。

美國Bangor神學院。

現任新店教會牧師，

  兼台灣神學院講師。

 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461