首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 牧師者所著關心的家庭問題
牧師者所著關心的家庭問題
卷期：第866期 本次： 日期：1961/2 刊名：台灣教會公報 頁數：21
篇名：牧師者所著關心的家庭問題 [ Bo̍k-hoē-chiá só͘ tio̍h koan-sim ê ka-têng būn-tê ]
作者：鄭連坤 Tīⁿ Liân-khun
  顯示 : 漢羅 全羅 並列  

牧會者所著關心的家庭問題

鄭連坤

1961年2月第866期  21-24

 

佇咱台灣教會teh喝喊基督化家庭的聲已經不止久。總會教育處也有任命成人家庭教育小組，也有設置家庭週(每年5月第2禮拜)，教育雜誌也有teh繼續刊載成人家庭教育的講座。女宣的月刊也常常看見家庭部的特別研究的記事。閣也有蘇牧師所編的家庭的朋友。事實佇咱台灣教會對這方面的關心毋是小可lah。 今這pang教會公報閣開始新的講座，撿彩有人欲想敢有彼的需要。這个敢毋是屋上加屋？

  今若容允小弟好膽來講：事實按呢攏猶無夠額，因為過去攏變做一个口號，運動；總是攏猶袂變做閣較深的研究佮十二分的關心。驚了只有趁流行teh罔講：事實攏無釘根，空空的喝喊。設使小弟的觀察若是過頭悲觀的，無掠著真象，請原諒。我按呢掛慮，就是感覺這个問題的重要性，特別佇這時的台灣切實有欠缺。咱無久欲迎接設教100週年的大日子，為著按呢咱teh強調倍加運動。這个運動確實是大的事，外國一下聽這款消息，實在真興奮，佮咱歡喜，也teh替咱祈禱。總是咱teh關心倍加的時，閣一面咱有注意信徒的量雖然有加添，毋過質無啥物進步。特別舊的信徒的囝兒紲失落信仰。教會倍加的閣一面實在著強調基督化家庭來做補網要緊的工程。對一个人信主了後若有將信仰做遺產直直傳予囝兒，閣要緊信徒佮信徒的結婚的時，30年後欲變做10倍的增加。佇這款自然增加閣加添倍加運動的時，彼的數量欲變做驚人的。 今為著這款想法，小弟今仔日特別愛提起牧會者所著關心的家庭問題來相佮提醒，紲來請教教界的諸位先輩的指導佮辯答。

  I. 婚姻的指導。

家庭的開始是對結婚主欲開始工生涯，伊事先去參加祝福一對的青年的結婚典禮。( 釋迦牟尼卻將美滿的家庭放棄，來開始追道的生活。)咱逐擺參加結婚式會感覺真快樂，實在對心底愛共in祝福。總是偌濟結婚的人佇結婚後發生問題。甚至佇基督徒的中間也鬧出離婚的事。夫婦相僥疑，冤家，為著性的生活生起困難，家族間的感情惡化， 對性格的各樣，致到袂通和平相處，經濟問題發生恐惶，為著世代的各樣，見解，思想大各樣。一旦發生這款問題的時，就欲來請教牧會者。毋過咱做牧會的人對遮的問題無特別的研究，觀察力，理解力；指導能力攏欠缺，致到無法度通指導。有人欲來教會請教，按呢 猶過真好。有人無愛來揣咱，紲予事情變做愈複雜。現在的醫學已經對治療醫學進入佇預防醫學；佇咱教會敢毋是也著進入新的階段。毋通等到問題複雜化，毋通等到結婚後發生困難。敢毋是著佇結婚前有好好的指導，通預防一切婚姻所發生的糾紛。今 欲達成這項事，咱著考慮以下三个時代，照所需要合時來指導。

  (a)結婚前。所著指導佮訓練的事排列親像下面：

  1) 著強調結婚的神聖，四正的結婚觀，結婚的責任，著祈禱聽候，通服從上帝的旨意。

  2) 著關心指導男女青年神聖的交陪(毋是監視，著用同情佮理解)。

  3) 著指導選擇的條件佮目標，特別著強調同信的人的結婚。

  4) 著訓練青年人有精神，心理，感情各方面有平均的發達；

  5) 著訓練建設家庭的責任，毋若干但女子，就是男的也有需要。

  6) 著指導性的教育。

在佇外國的牧師欲共青年人舉行結婚典禮的以前，一定叫兩人來，牧師親身佮 in斟酌結婚一切的問題的好好的指導了後，才共in舉行結婚式。我真期待佇咱台灣教會無久也會歡喜負起這款責任佮指導。

  (b)結婚了後。

  1)對性的生活的指導。

  2) 著教示欲怎樣佮家族和平相處。

  3) 著協助in建設健全基督化的家庭。

佇外國濟濟教會有設夫婦團契（叫做co͘ples club）利用這款團體來切實訓練佮指導。佇阮的教會，對小弟由Hui-li̍p-pin轉來彼年起已經繼續一个研究會（阮叫做橄欖會），每月日一擺輪流佇會員的家庭聚會。赴會一定著夫婦兩人出席。阮過去所討論的題目排列佇下面予大家做參考。

  1955年：家庭佮禮拜，家庭佮教育，家庭佮健康，家庭佮經濟，家庭佮娛樂，家庭佮料理，家庭佮園藝，結婚的指導，家庭的行事，快樂的家庭。

  1956年：家庭佮聖經，囝兒講白賊著怎樣指導，家庭佮儲蓄，家庭佮生產，生囝 佮育兒，家庭佮交陪，家庭佮性的教育，營養佮健康。

1957年：讀聖經的指導，反抗期青年的指導，家庭和合的祕訣，檢討家庭經濟收支， 室內裝飾的方法，兩个料理方法，家庭的簡素化。

1958年：家庭的記念日的問題，如何指導兒童協助，產兒制限的諸問題，整理家庭內的秘訣，如何繼續家庭的禮拜，促進健康具體方法，兒童補習教育的問題，家庭佮教會的連絡，如何計劃預算生活。

1959年：神人的關係，夫婦的關係，爸囝的關係，兄弟的關係，親戚的關係，教會的關係，職業的問題，健康的問題，性的問題，經濟的問題。

1960年：子女的教育，男女的交陪，配偶的選擇，家族的計劃，養子佮養女，家族的調和，夫婦的調和，ta-ka新婦的調和，離婚佮再婚， 衣，食，住的問題。

佇這款會是用簡單的禮拜開始，了後簡單的發題講演，然後用討論做中心。所以會通揣出問題的中心，也互相加真明白困難的所在。阮感覺有這个會了後，佇阮教會加添大家的親密佮 對建設基督化家庭有熱情，關心佮努力。真期待kok教會也會關心這方面的工作。

II. 爸母的再教育

咱徛佇這个急變的社會，有時綴袂著，變做落伍者。總是猶過掠做家己是第一理想，第一有理解的人。常常聽見講阮hiâng當時怎樣好......！撿彩佇咱的過去有一時代是黃金的時代。毋過咱的確著跤徛牢佇這个時代。咱的囝兒正正徛佇這个時代，teh做時代中心的人。所以做父母的人著閣一擺用疼痛，體貼佮理解的心神來逐咱的囝兒。若無，常常為著時代的cheng-chha發生嚴重的問題。做父母的人著閣再努力來讀兒童心理，青年心理，注意看新聞，對科學的進步有淡薄的理解，若無咱欲失落佮咱的囝兒講話的資格。閣著做出佮囝兒講話的習慣，毋通予in感覺oh親近，若按呢，咱的囝兒有一日為著真要緊的結婚問題毋敢佮咱參詳。毋通想講教育囝兒就是ná準teh栽培搖錢樹，有一日欲叫囝兒怎樣來好款待咱；較要緊是著尊重囝兒的人格佮獨立的精神。絕對毋通霸佔家庭的主權，的確著歡喜將王座讓予主耶穌基督，所以對家庭教育也著強調基督教教育。第一要緊，著常常佮教會連絡，來完成咱的家庭教育。咱做父母著負起基督教教育的責任，總是siāng時也著不時承認咱本身也有需要受閣較懸，閣較深的基督教教育的一个。

III.牧會者的再教育。

講到遮的時，咱做牧會者敢袂感覺咱的氣力實在真無夠額？為著欲應付這款急變的社會，咱若無嶄然努力致意，不時受造就，咱有一日欲變做無力的器具。1946 E. Thurneysen有出一本牧會學的冊，佇彼內面伊不止teh主張咱今仔日的確著採用心理學佮精神醫學的智識。事實咱欲應付今仔日的時代，欲成做時代的工人，若無嶄然用功，實在欲成做綴時代袂著的人，咱所講的道理欲變做空空的話，因為咱無予道成肉體的努力。閣一項，咱本身著有好好的家庭生活，通做一般信徒的模範。 實在牧會者所領受的責任是非常重。咱欲 佮保羅相siâng感覺講"遮的事是誰會堪得當？（II哥林多 2：16）雖然是按呢，咱若歡喜予主用，伊的確欲造就咱。向望咱用謙卑的心相佮學習，對台灣教會的基督化家庭的運動saⁿ-佮負起責任。真期待兩神學院對方面有專門的講座，閣佇以外的機會常常相造就，對 按呢基督化家庭的事毋是只有一個喝喊，確實佮倍加運動同步調推行。這个是小弟對心底所有深深的期待佮向望。

筆者：

原籍：台中縣。40歲。

學業：台灣神學院

現任：新竹教會牧師

公職：總會議長

 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461