首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 關係婚姻面談的實際問題
關係婚姻面談的實際問題
卷期：第868期 本次： 日期：1961/4 刊名：台灣教會公報 頁數：19
篇名：關係婚姻面談的實際問題 [ Koan-hē hun-in biān-tâm ê si̍t-chè būn-tê ]
作者：鄭連坤 Tīⁿ Liân-khun
  顯示 : 漢羅 全羅 並列  

家庭講座(4) 關係婚姻面談的實際問題

鄭連坤

1961年4月 868期      19-22

 

  （基督化家庭既然成做咱台灣教會的關心，實在是通歡喜佮感謝的所在。

總是結婚問題一旦若發生困難的時，á是對結婚問題愛得著拄好的指導的時，真濟人欲來找牧者對這个問題無有啥物特別的訓練佮研究，致到有時撿彩會用拄好的方法來指導設法，毋過有時實在欲對to̍h-lo̍h來處理想無方法。過去我去真濟位指導婚姻問題的時，常常捌實際tek擔當這款面談(Co͘neelling的翻譯，有時譯做商量，á是接談)的工作。愈擔當這的工愈感覺彼的困難，今這pang有機會欲出國專門研究這个問題。拄拄佇出國前受託，所以佇遮提起來相佮想，siâng時通做佮大家相辭的話。請佇祈禱中向望替小弟祈禱，予我所欲學習的以後會通利益咱台灣教會。）

佇2月號我有好膽喝喊講：咱牧會者著閣再教育。佇彼時所講的實在是出佇真好意，總是撿彩寫了無完全致到會生起誤會。今閣一擺懇切來想這項事。譬喻有人欲來佮咱講起婚姻問題的時咱著採取啥物款的態度？著對啥物問起？著怎樣共in指導？實在這款問題就是真技術上的事，總是若毋知有時欲失落真好機會，致到袂通指導幫贊in。自然欲做一个好的面談者（co͘nselor）的確著考慮伊本人的性格有合這款工á無？閣著經過特別的訓練，續學習有關需要的學問（親像社會學、心理學、生理衛生的智識，以及對結婚有關係的法律等），也著有明確的判斷力來找問題性的中心。今遮的事欲叫每一个牧會者隨時來得著自由是困難，(向望以後佇神學院會特別指導這方面的工作。)今我佇遮只有對實際上咱所需要的方面簡單來講起通做目前的需要。

  (1)牧會者的態度。

代先第一需要的就是緊確立接續點。予來面談的人安心信賴將問題的一切排列佇咱的面前。為著按呢著注意的就是下面的事。

  a) 著成做真好、gâu聽話的人。既然有問題的人伊來親近咱的時，較要緊的就是欲吐露伊心內的事。欲來問咱的意見實在是第2問題。所以咱著gâu共聽，有時著共抽出來予伊閣較好勢講明一切。

  b) 著保持非常冷靜的態度的確著徛佇真客觀tek的立場。雖然以前有聽著風聲，猶過遮的攏著放棄，毋通有先入主來聽。

  c) 著用同情佮體貼來對待伊.

  d) 平常時著培養有吸引力的人格。

今來找咱的人將一切排列的時，咱著進入第2的工作。就是趕緊發見問題的中心佮事情的實際狀態。實在佇這時牧會者已經成做一个醫生teh診斷患者！所以著判斷彼的症頭（？），續來替伊診斷通下藥。著真謹慎才通找出最後的解決方法。有時彼的面談著幾擺，有時著經過幾若點鐘久（我捌佮一位姐妹相與談論5點外鐘久！）。佇遮的中間牧會者著想佇咱面前的人實在是一個羊無牧者的款式。主耶穌早前為著憐憫遐的人就行濟濟神蹟，咱著學主這款心境才會通達成這个困難的工作。

  2)所著問的事是啥物？

咱著成做gâu聽話的人，的確著予伊本身一直講：總是彼的人欲講的時有時不得要領，有的想感情tek致到攏teh主張家己，有時要緊的無講將無要緊的一直lô-lô so-so牽規點鐘。按呢毋若了時間續無法度通找出解決。為著按呢咱著準備所著問的事，拄拄親像醫生對患者teh問伊的病歷一樣。我佇下面將我所準備，也家己teh用的排列來予咱做參考。

a)家庭背景。

  血統：老爸這爿老母這爿。

宗教：家族；丈夫、婦人人。

1. 老爸、老母的結婚生活有幸福無？

2. 囡仔的時代有幸福無？

3. 老爸老母有真和好無？

4. 對父母有感覺熱烈的感情無？

5. 家庭的教育訓練是啥物款？

6. 性的教育？

7. 對結婚的想法佮態度？

8. 佮家族間的關係啥物款？

b)對社會的適合（Social Adaptation）

職業：老爸；老母。

犯罪？

1. 學校生活有快樂無？

2. 有真濟朋友無？到這陣iáu有親友無？

  3. 對社會活動有興趣無？捌參加啥物團體無？

  4. 畢業後的生活如何？同事間有真順序無？

5. 對運動、政治、宗教、音樂等有積極tek趣味無？

6. 佮異性的關係啥物款？有男（女）朋友無？

7. 有自卑感（自卑感）無？

c)性方面的歷史。

1. 對性的智識是怎樣得著？

  2. 父母怎樣教示你？

  3. 第一次的月經啥物時到？彼時感想？

  4. 對性的心理有健全無？

  5. 對性的倫理（倫理）有健全無？

  6. 對自慰（自慰）的行為？

7. 關係性的教育捌讀著啥物冊無？

d)對結婚的接近。

1. 捌戀愛的經驗無？初戀的經驗？幾歲？

2. 啥物人介紹？有交陪無？

  3. 交陪的期間？訂婚的期間？

  4. 佇彼中間有啥物不和無？

  5. 彼時對結婚有甚物期待佮想法？

  6. 為著啥物動機想欲結婚？

  7. 結婚前捌討論性的事，囡仔的事無？

  8. 佮對方的父母有啥物等號的交陪？

  9. 對對方的性情，人格有知到甚物程度？

  e) 關係結婚的歷史。

幾歲的時結婚？（男）（女）。結婚已經有幾年？

Ⅰ.夫婦間的協助問題：

1. 有實在teh協力無？

2. 互相有共同的興趣無？Á是各人行家己的路？

3. 對人生的目標，生活的水準有一致無？

4. 捌為著錢意見袂一致？為著別項事捌無？

5. 有夫婦兩人共同的朋友無？

6. 對宗教、娛樂、休息，對別人的態度、個人的習慣有一致á無？

II.夫婦間的性生活？

1. 有啥物無拄好á無？

  2. 對性的生活有滿足無？

  3. 懷孕佮生產。有幾个囡仔

4.產兒制限的態度？

  III. 佮囝兒的關係：

1. 對囝兒夫婦意見會一致袂？

  2. 對教育囝兒訓練的方針有一致無？

  3. 對產兒制限對方有協力無？

  4. 設使若攏無生囝的時有啥物困難無？

  f)對環境方面。

是大家庭á是小家庭？

啥物人作伙蹛？

教養的程度：丈夫：婦jîn人：

職業：丈夫對這个職業有滿足無？婦人人有啥物職業無？

經濟狀態：婦人人對按家庭經濟有把握無？

健康的問題：佮厝邊的關係啥物款？厝來khang-khoè的分配怎樣？

對家庭的習慣（家風）管理方面：

性格：血型（血型）感情型？?理性型？有濟話無？

心理：自卑感、怨妒、僥疑、無力感、罪惡感、過份的自我意識、負責任的態度等等。

  g)對現在的狀態。

人佮人的關係：丈夫佮婦人人、佮厝內的人、ta-ke新婦的關係，同姒、小姑的問題，著扶養家族？

佇厝內啥物人較優位（優位）丈夫？婦人？平等？

互相的愛情啥物款？

互相的幸福感啥物款？

互相的適應性？（適應性）

對結婚生活現時感覺怎樣？

對結婚前的人對結婚後的人，á是為著翁某冤家的人；自然咱欲問的時強調點的確無相siâng！

(3) 著怎樣指導。

今既然用遮的來詳細問了後就著替伊想妥當的指示lah。佇這時著斟酌的有以下幾項：------

a) 到底這个人是為著啥物目的來？Kan-ta 愛得著智識方面，á是心理上的不安愛得著幫贊；á是切實有需要咱替伊解決無？

b)伊來參詳的內容是屬佇啥物種類的？醫學tek的事？心理上的事？精神tek、倫理tek的事？法律上的事？

  c) 閣著考慮彼的事情到底已經進行到啥物程度？拄拄iáu佇初期已經非常危險？進入佇慢性？

  d)到遮的一切的判斷攏明白就將攏總綜合起來詳細分析（分析）。才頭一擺找出拄好的教示，就是智識方面的指導。然後來共伊忠告，較好著幫贊伊本身來決斷的方法。相與chhiau找解決的路，選擇拄好的辦法。最後向望伊佇基督耶穌的內面歡喜改變一切的錯誤，用衫替祈禱來得著上主親身的幫贊佮指示。

以上所寫的雖然是一个真新的事，猶過咱佇牧會上的確著採用，著關心的要緊的事。

願上帝本身來施恩賜福佇咱一切的工作，特別對基督化家庭方面咱所努力的話大大榮光伊的聖名，是深深所向望。所講的有真濟無完全的所在，向望2年後轉來的時通 閣補滿，恭祝各位的健康佮奮鬥。

 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461