Ki-tok-hoà ka-têng ê pún-chit
Lō͘-ka 19:1-10
Chiā Chài-seng
1961年5月868期 5-7
Lâng chhut-sì tī sè-kan, beh chiâⁿ-chò chi̍t ê ū ì-gī ê koè ji̍t; chū-kó͘ í-lâi, bô chi̍t ê lâng ê thang kap i ê ka-têng keh-lī tit. Chiū-sī chin hó oân-kiat ê chi̍t-sì-lâng, lóng ū chin hó ê ka-têng khoân-kéng só͘ chō-chiū ê. Chit khoán ê sū-si̍t sī lán muí-lâng só͘ khoàⁿ ē tio̍h, á-sī só͘ bat ē tio̍h, tī koè-khì ê le̍k-sú-siōng kap hiān-chāi ê siā-hoē-siōng só͘ teh chèng-bêng ê khak-si̍t. Nā án-ni chit khoán hó ê ka-têng khoân-kéng sī sím-mi̍h? Kiám-chhái lán beh kóng tio̍h ū keng-chè ki-chhó͘, chiū-sī tio̍h ū hù-jū ê seng-oa̍h, iā tio̍h ū tē-uī, sè-le̍k kap ū siong-tong ê chhù-the̍h lâi tit-tio̍h hó koè ji̍t, nā án-ni hit ê khoân-kéng ún-tàng ē chin hó, thang lâi chō-sêng gâu chò lâng, lâi hióng-siū chin ū ì-gī ê chi̍t-sì-lâng chiah tio̍h. Che sī it-poaⁿ ê lâng só͘ teh ǹg-bāng ê lí-sióng. Chóng-sī lán nā tuì Lō͘-ka 19:1---10 chit toāⁿ ê Sèng-keng chiū beh khoàⁿ chhut, tng-sî lâng só͘ khoàⁿ ê hó ka-têng khoân-kéng ê tiâu-kiāⁿ sī bô kàu-gia̍h. Lán nā tha̍k chiū ē bêng-pe̍k hit sî-tāi ê Sat-kai, sī chi̍t ê hó-gia̍h lâng, siōng-chhiáⁿ sī ū tē-uī ê thiu-hiòng thâu-lâng; i ê chhù-the̍h ún-tàng bē bái, nā án-ni i ún-tàng sī chi̍t ê hó koè ji̍t, ū hēng-hok ū khoài-lo̍k, thang hióng-siū i ū ì-gī ê chò lâng chiah tio̍h. Chóng-sī lán chai i ê sim-lāi iáu ū khoeh-khiàm, bô ū chin-si̍t ê khuì-la̍t thang oá-khò. Só͘-í i chiah siūⁿ-tio̍h Chú Iâ-so͘ ê hó hong-phêng, ài beh thau khoàⁿ Chú ê khoán-sit, ǹg-bāng tuì Chú Iâ-so͘ ū só͘ tit-tio̍h. Kó-jiân chiàu i jia̍t-sêng ê só͘ hāu-bōng, kàu tit-tio̍h Chú Iâ-so͘ hoaⁿ-hí kap i saⁿ-kìⁿ liáu-āu, Chú chiū soan-giân lâi chèng-bêng kóng, ‘Kin-á-ji̍t chín-kiù kàu tī chit ê ke.' Lán thang siong-sìn tuì hit sî khí Sat-kai ê ka-têng tek-khak toā koh-iūⁿ, hoaⁿ-hí khoài-lo̍k. Che kiám m̄-sī hō͘ lán thang koh chhim chai ‘Ki-tok-hoà ka-têng ê pún-chit' ê ò-pì. In-uī lán Ki-tok-tô͘ ê sìn-gióng m̄-sī kan-ta khǹg tī chiong-lâi thian-tông ê hok-khì nā-tiāⁿ, iā sī beh kiàn-li̍p sêng-chiap Siōng-tè só͘ èng-ún sù-hok ê khoài-lo̍k kap hēng-hok ê ka-têng, lâi keng-koè chi̍t ê ū ì-gī ê jîn-seng. Taⁿ chit khoán ê ka-têng sī sím-mi̍h khoán, í-hā lâi thê-khí kuí tiám thang saⁿ-kap bián-lē.
1. Pek-chhiat him-bō͘ Chú Iâ-so͘.
Chiàu tē 3 chat só͘ kì I ài beh khoàⁿ Iâ-so͘ sī sím-mi̍h lâng. Tuì chit chām ê àm-sī, ū piáu-bêng Sat-kai ū him-bō͘ ài khoàⁿ-tio̍h Chú Iâ-so͘. In-uī chit khoán ê him-bō͘-sim, só͘-í i ū kè-e̍k gián-kiù ēng kang kap ló͘-le̍k. I chiū cháu chìn-chêng, peh chiūⁿ sng-châi-chhiū, àn-sǹg beh thau khoàⁿ mâi leh! I m̄-nā ū him-bō͘, ia̍h ū pek-chhiat ê jia̍t-chêng tī-teh; in-uī nā bô pek-chhiat ê jia̍t-chêng, chit khoán lâng thài beh peh chiūⁿ sng châi-chhiū téng nih? In-uī án-ni Chú Iâ-so͘ bô hō͘ i khang-khang ê tio̍h-boâ, kàu uī kiò i kín-kín lo̍h-lâi, hō͘ i bīn tuì bīn lâi khoàⁿ-kìⁿ Chú Iâ-so͘. Che sī beh hō͘ lán thang bêng-pe̍k Ki-tok-hoà ka-têng ê thâu chi̍t pō͘, chiū-sī tio̍h ū pek-chhiat him-bō͘ Chú Iâ-so͘ ê sim-chêng chiah ê thang lâi khai-sí khí-chō.
2. Sêng-sim hoé-kái ê seng-oa̍h.
Tī siā-hoē-siōng lán siông-siông bat thiaⁿ-kìⁿ lâng teh chú-tiuⁿ tio̍h siu-ióng, tio̍h ū hó ê phín-sèng, ti kò pit kái(知過必改), á-sī kóng, kò chek bu̍t tān kái(過則勿憚改). Sui sī án-ni teh kó͘-lē, si̍t-chāi beh chhoē-tio̍h chi̍t ê chin-si̍t ē-hiáu hoán-hoé ké-pìⁿ ê lâng bô hiah khoài. Chóng-sī lán khoàⁿ Sat-kai í-chêng ê seng-oa̍h kiám-chhái iā sī put chhut chit khoân siā-hoē jîn-sū ê í-goā, sui-jiân chai m̄-tio̍h, m̄-kú bô hiah-nih khoài ké-pìⁿ. Chóng-sī kàu i kìⁿ-tio̍h Chú, tuì chèng-lâng ê bīn-chêng hó-táⁿ lâi jīn i koè-khì ê sit-chhò kap put-hoat, soà hoaⁿ-hí lâi poê hiah ê bat hō͘ i áu-hoâiⁿ ê lâng, í-ki̍p hoaⁿ-hí chiong i só͘ ū ê chi̍t poàⁿ lâi chín-chè sòng-hiong lâng. Tuì chit ê sū-si̍t, thang chèng-bêng Sat-kai tit-tio̍h Chú liáu-sū, ū sêng-sim hoán-hoé i chêng ê koè-sit, taⁿ í-āu i hoaⁿ-hí poê-choē; soà lâi kiâⁿ jîn-ài tī chia̍h ê tio̍h siū pang-chān ê lâng ê tiong-kan. Che iā thang kóng beh kiàn-li̍p Ki-tok-hoà ka-têng ê tē jī kai-toāⁿ.
3.Hoaⁿ-hí chiap-la̍p Chú.
Chiàu tē 6 chat kì-chài, ‘Chiū kín-kín lo̍h-lâi, hoaⁿ-hí chiap-la̍p Chú Iâ-so͘.' Loā-nih chē lâng bat thiaⁿ-kìⁿ Chú ê hok-im, chi̍t sî siū kám-tōng, iā ū lâu ba̍k-sái jīn choē, chi̍t-sì-lâng koat-sim beh chò chi̍t ê tiong-si̍t ê Ki-tok-tô͘, chóng-sī kàu keng-koè chi̍t ê sî-kî, m̄-nā bô ké-píⁿ, liân lé-pài-ji̍t ê kèng-pài Siōng-tè, soà bô tì-ì, bē kì-tit. Thài ē án-ni? Chiū-sī sim-lāi si̍t-chāi bô ū chiap-la̍p Chú ê chèng-kú, i ê koat-sim sī chí-ū chi̍t sî kú ê kám-chêng chhiong-tōng nā-tiāⁿ, kàu boé bô tèng kin, chiū bô oa̍h-miā, khoài lian-khì. Chhin-chhiūⁿ Chú bat kóng, siâ-sîn koáⁿ-chhut liáu, chhoē bô so͘-chāi thang tiàm, chiū koh tò-tńg lâi í-chêng só͘ lī-khui ê só͘-chāi, khoàⁿ-kìn piàⁿ-sàu chheng-khì, koh sī khang-khang chiū khì chio 7 ê pí chêng khah pháin ê lâi ji̍p tī hit lāi-bīn, hit ê lō͘-boē ê kéng-hóng koh-khah pháiⁿ ê kiat-kó(Má-thài 12:43-45). Taⁿ chit ê Sat-kai m̄-nā ū hoán-hoé, iā si̍t-chāi chiap-la̍p Chú tī i ê ke, che sī chin iàu-kín ê só͘ chò. Kin-á-ji̍t loā nih che Ki-tok-tô͘, á-sī siā-hoē jîn-sū, chin ài thiaⁿ Chú ê hok-im só͘ kà-sī ê, chóng-sī m̄-sī chiap-la̍p Chú, che sī chin khó-sioh ê tāi-chì. Só͘-í nā beh kiàn-li̍p Ki-tok-hoà ê ka-têng nā bô chiap-la̍p Chú Iâ-so͘ chiū bē thang chìn-pō͘.
4. Chú hoaⁿ-hí saⁿ-kap tiàm.
Chiàu tē 5 chat Chú èng-ún Sat-kai kóng, "Kin-á-ji̍t goá tek-khak tio̍h tiàm lí ê ke." Lán teh tha̍k chit kù ê sî, ū sî khin-khin chiū kā tha̍k koè, kî-si̍t hit ê ì-sù ū chin ò-biāu tī-teh. Só͘ kóng ê ‘kin-á-ji̍t' sī chí hiān-chāi, iā thang kóng sī ‘chit ê sî chūn,' m̄-sī thèng-hāu kàu bîn-á-ji̍t á-sī kuí nî āu, á-sī chiong-lâi, chiū-sī chit sî ê kin-á-ji̍t, thang kóng sī chi̍t ê pó-poè ê ki-hoē Iâ-so͘ hoaⁿ-hí kap in khiā-khí; chóng-sī tng-sî ê hoē-chiòng chin m̄-goān, ngia̍uh-ngia̍uh-liām teh kóng put-pêng, iáu-kú iā sī teh chèng-bêng ‘I ji̍p-khì hioh tī pháiⁿ-lâng ê chhù.' Kì-jiân Iâ-so͘ tiàm tī Sat-kai ê chhù, hō͘ lán thang chai Sat-kai m̄-nā kám-kek, hoán-hoé ké-pìⁿ nā-tiāⁿ, iā-sī sêng-sim kèng-tiōng Chú, chiap-la̍p i chò siōng-kheh kuì-pin, chiâⁿ-chò i ka-têng ê tiong-sim, choân ke-lāi ê Chú. Lán siong-sìn in ê it-kú it-tōng(一舉一動), it-giân it-hēng(一言一行) á-sī sim-su liām-thân lóng hoaⁿ-hí hâng-ho̍k Iâ-so͘ chò Chú lâi teh chìn-hêng. In-uī Chú Iâ-so͘ khoàⁿ thàu in ê sim-lāi. Bo̍k-koài Chú hó-táⁿ kan-chèng kóng, "Kin-á-ji̍t chip2(sic.)-kiù kàu tī chit ê ke."
Kiat-lūn: Tuì í-sióng(sic.) só͘ thê-khí chiah ê sū-sit hō͘ lán thang bêng-pe̍k, nā m̄-sī hâng-ho̍k Chú Iâ-so͘ chò lán ka-têng ê Chú, chiū bē thang kóng sī Ki-tok-hoà ka-têng. oāⁿ oē lâi kóng, Ki-tok-hoà ka-têng m̄-sī thiaⁿ-thâu koà Cha̍p-tiâu-kài á-sī koà Iâ-so͘ ê sèng-oē lâi piáu-sī nā-tiāⁿ, chit khoán sī goā-phoê ê piáu-bêng jî-í, só͘-í tio̍h ēng si̍t-chāi him-bō͘ ê jia̍t-chêng lâi chiap-la̍p Chú Iâ-so͘ tiàm tī láu ê ka-têng chò Chú hō͘ lánê ka-têng muí chi̍t ê to ū hoán-hoé têng-thâu-seⁿ, chiâⁿ-chò têng sin chhòng-chō ê lâng, chit hō ê ka-têng chiah ū si̍t-chāi tit-kuì ê khoài-lo̍k; iā chiah si̍t-chāi ē thang chheng-chò Ki-tok-hoà ka-têng.
