Lín pe̍h-pe̍h tit-tio̍h, tio̍h pe̍h-pe̍h hō͘ lâng
Má-thài 10:8
Khó͘ Iú-châi
1961年6月870期 5-6
Tuì it-poaⁿ tō-tek ê goân-chek lâi siūⁿ, nā ū huì-liáu chin-chē ê sêng-pûn kap cheng-sīn lâi tit-tio̍h ê mih, á-sī chok-phin, khó͘-í siū-tio̍h khah koân ê pò-siû, á-sī choan-lī-koân. Chóng-sī chiū-sī pō-lī, sī put tō-tek ê sū. Nā-sī lí peh-pe̍h tit-lâi ê mi̍h nā bē chin kuì pō-lī, m̄-thang su-iú. lī-lūn(利潤) tio̍h hō͘ tâi-ke chiah ê ēng-tit. Chú kóng,"Pe̍h-pe̍h tit-tio̍h, tio̍h pe̍h-pe̍h hō͘ lâng." Chhiáⁿ lán saⁿ-kap lâi siūⁿ 2 hong-bīn.
Ⅰ. Ki-tok-tô͘ ê chek-jīm.
(A) "Pe̍h-pe̍h tit-tio̍h."
Lán tuì Siōng-tè só͘ sêng-siū ê mi̍h choè tiōng-iàu ê lóng-sī bián só͘-huì, pe̍h-pe̍h tit-lâi ê, chhin-chhiūⁿ hō͘-chuí, ji̍t-kng, un-tō͘, khong-khì téng, chi̍t-sî-á kú bē sái-tit bô--tit ê, tuì chhut-sì ê sùn-kan niá-siū kàu taⁿ. Nā-sī pí che koh khah pó-kuì ê un-sù, sī koan-hē lán éng-oa̍h ê tit-kiù. I ū chiong I to̍k-siⁿ Kiáⁿ Iâ-so͘ Ki-tok hō͘ lán, koh chiong pún-sin siúⁿ-sù lán, iā chiong I ê Sèng Sîn, chiū-sī oa̍h-miā ê Sîn sù hō͘ lán. Lán tuì sìn, chiū thang tit-tio̍h. Lán sìn siū sé-lé lâi kui tī Pē, Kiáⁿ Sèng Sîn sī lán ê. tuì chiap-la̍p Iâ-so͘ Ki-tok, lán ê choē-koà tit-tio̍h sià-bián, ū koân chiâⁿ-chò Siōng-tè kóng, "A-pa pē ah! "iā chheng Ki-tok chò "Goá ê Chú, goá ê Siōng-tè." M̄-nā án-ni, koh hō͘ lán tit-tio̍h chē-chē sio̍k Sîn ê un-sù, oē sèng-kiat, jîn-ài, ū hūn tī Siōng-tè ê sèng-chêng,ū éng-oán ê oa̍h-miā, lâi kè-sêng Thian-kok chò hō͘-sû. Pa̍t ji̍t lán beh chhin-chhiūⁿ Ki-tok êng-kng ê khoán-sit. Che lóng sī bô kè ê pó-poe, lóng sī bû-hān ê hok-khì, lóng sī lán put-phoè ê un-tián, m̄-sī ēng kè-chîⁿ thang bé ē tio̍h ê. Nā-sī Chú tuì I ê chû-pi lîn-bín, pe̍h-pe̍h hō͘ lán ê. Lán ū gī-bū tio̍h pe̍h-pe̍h pun hō͘ lâng.
(B) "Tio̍h pe̍h-pe̍h hō lâng."
Chú Iâ-so͘ chit kù oē sī chhe ha̍k-seng beh khì thoân hok-im ê sî kóng ê. Tī chit kù ê téng-bīn bêng-bêng kóng, "Kiâⁿ ê sî tio̍h thoân kóng, thian-kok kūn lah." Só͘-í che sī kiò lán chiong hok-im pe̍h-pe̍h thoân hō͘ lâng ê ì-sù. Sè-kan lâng tī choē-koà ù-oè ê tiong-kan, in ê lêng-hûn teh tîm-lûn. In chhin-chhiūⁿ iûⁿ bô bo̍k-chiá, cheng-sîn bô ū Siōng-tè ê oē thang pá-chiok, ji̍t-ji̍t teh siau-sán. Lán tit-kiù ū hūn tī thian-kok, kiám bô kám-siā, kiám bô siūⁿ beh khì pò in chai mah? Lán pe̍h-pe̍h hō͘ lâng "Tio̍h " sī gī-bū, " Tio̍h" sī chek-jīm, "Tio̍h" sī bēng-lēng. Chhin-chhiūⁿ pa̍t só͘-chāi iā kóng, "Tio̍h khì phó͘ thiⁿ-ē thoân hok-im." 90 goā nî kú ê tiong-kan lióng Bó-hoē ê hoē-iú hoaⁿ-hí hōng-hiàn jîn-bu̍t, kim-chîⁿ lâi lán Tâi-oân kè-sio̍k kàu tī kin-á-ji̍t, thoân hok-im, siat kàu-hoē, khí pīⁿ-īⁿ, ha̍k-hāu, Sîn-ha̍k-īⁿ, san-tē thoân-tō. Gio̍k-san Sîn-ha̍k-su-īⁿ, Kheh Soan, nî-nî sǹg pah bān ê kim-chîⁿ, ha̍p 90 goā nî, he chiū-sī bē sǹg-tit lah. iáu ū kî-than ê iú-hoē ê sìn-tô͘, in pe̍h-pe̍h teh thoân hō͘ lán, lán pe̍h-pe̍h teh tit-tio̍h. Lán kiám m̄ eng-kai o̍h in lâi pun hō͘ lâng mah? Toā-toā sè-sè eng-kai tio̍h chīn só͘ ē lâi hōng-hiàn, ū hūn tī hok-im ê sū-gia̍p chiah sī eng-kai.
II. Thoân-tō lâng ê cheng-sîn.
Chit kù oē iā sī ti̍t-chiap teh kā beh khì thoân tō-lí ê lâng kóng ê.
(A) Hông-chí thoân-tō cheng-sîn ê hú-pāi.
Chit kù ê téng-bīn sī kóng. "I-hó ū pīⁿ ê, hō͘ sí-lâng koh-oa̍h, hō͘ thái-ko ê chheng-khì, koáⁿ kuí," jiân-āu chiah kóng, "Lín pe̍h-pe̍h tit-tio̍h, tio̍h pe̍h-pe̍h hō͘ lâng." Che sī kiaⁿ-liáu ha̍k-seng tiong ū ê oē siūⁿ, lán ū chiah-nih toā ê koân-lêng lâi i-tī lâng, lī-ek lâng, kiám bô tong-jiân siū lâng ê pò-tap mah? Ū iú-chì beh kì-hù kim-chîⁿ, kiám m̄ eng-kai siu mah? Nā-sī Chú toàn-jiân kìm-chí. Tû khí chia̍h-si̍t ê kiong-kip, thoân hok-im ê lâng tuì hok-im lâi tō͘-oa̍h (Má-thài 10:10), í-goā tio̍h sî-thè. Che sī beh tî-hông thoân-tō poa̍h-lo̍h chò thàn chîⁿ ê pè-pēng. Sè-kan siông-siông ū lī-iōng chong-kàu-siōng ê hiân-hu, sîn-pì lâi teh thàn chîⁿ ê lâng. Chong-kàu ê hú-pāi tuì che siⁿ-khí. Siōng-tè ê un-sù, Sèng Sîn ê koân-lêng, m̄-thang piàn chò choán chîⁿ ê ki-koan. Pí-tek ū sî-thè chit hō, soà chek-pī án-ni siūⁿ ê lâng (Hēng-toān 8:20-----22). Í-lī-sa ū sî-thè chit hō, soà hêng-hoa̍t án-ni chò ê lâng (Ⅱ Lia̍t-ông 5:16, 26, 27). Chú Iâ-so͘ chi̍t-bīn pó-chiòng thoân hok-im ê lâng tuì hok-im lâi tō͘-oa̍h, chi̍t hong-bīn giâm-kìm ēng che chò choán chîⁿ ê lō͘-ēng. Che ē hō͘ thoân-tō chit-gia̍p-hoà, hok-im seng-lí-hoà ê goân-in. Siōng-tè ê un-sù "pe̍h-pe̍h tit-tio̍h, tio̍h pe̍h-pe̍h hō͘ lâng." Tng che tham-ù ê sî-tāi, ū lâng liân thè hun-phoè kiù-chè-phín hō͘ sòng-hiong lâng ê sū, to káⁿ siūⁿ beh tuì che lâi choán chîⁿ. Che sī chhiúⁿ sòng-hiong lâng ê mi̍h, che sī choán-chia̍h lâng tuì chû-siān só͘ hōng-hiàn ê, che sī toā choē. Tī che sî-tāi, lán tio̍h koh khah tì-sim thiaⁿ Chú chit ê bēng-lēng. M̄-bián kiaⁿ, chin-sim kau-thok ê chiah oē thé-giām tio̍h "Iâ-hô-hoa Í-le̍k."
(B) Ū sím-mi̍h thang pe̍h-pe̍h hō͘ lâng?
Thoân-tō lâng ah! Lí ū sím-mi̍h thang hō͘ lâng? Pí-tek kóng, "Kim, gûn goá lóng bô, to̍k-to̍k goá só͘ ū ê hō͘ lí." Goá tio̍h siūⁿ goá ū che thang hō͘ lâng mah? Kàu-ông In-lô͘-sian tē 4 sè, khoàⁿ i ê châi-pó chin tek-ì kóng, "Pí-tek só͘ kóng ‘kim, gûn goá lóng bô' ê sî-tāi, í-keng koè-khì lah." Sèng To-má A-kui-ná ìn i kóng, "Siāng-sî ê kā pái-kha ê kóng, ‘tī Ná-sat-le̍k Iâ-so͘ Ki-tok ê miâ lí khí-lâi kiâⁿ' ê sî-tāi iā sī koè-khì lah." Taⁿ lán ū sím-mi̍h thang pe̍h-pe̍h hō͘ lâng? "Bô, iā ka-kī lia̍h chò ū ê , sī phiàn ka-kī" (Ka-lia̍p-thài 6:4). Lán tio̍h ka-kī séng-chhat. Bô ê tio̍h lâi tuì Chú thó, m̄-bián kè-chîⁿ thang tit-tio̍h (Í-sài-a 55:1; Khé 3:17). Tong-jiân Sèng Sîn ê un-sù chē-chē khoán, bô tek-khak lán lóng oē i pīⁿ, koáⁿ kuí, hō͘ sí-lâng koh-oa̍h. Nā-sī choè chió lí tio̍h ū Iâ-so͘. Tio̍h chiong Iâ-so͘ thoân-hō͘ lâng. Bô tit-tio̍h Iâ-so͘, beh thài ū Iâ-so͘ thang thoân hō͘ lâng.(Hēng-toān 8:5, 35) Ū Iâ-so͘ choè tē it iàu-kín. In-uī ū Iâ-so͘ chiah ū éng-oa̍h (Ih 17:3). Kiâⁿ sé-lé Iok-hān lóng bô kiâⁿ sîn-jiah, nā-sī i ū Iâ-so͘, i chin bat tio̍h Iâ-so͘, só͘-í tuì i ê soan-káng, chē chē lâng sìn Iâ-so͘(Ih 10:41).
Kiat-boé lâi kóng, goān lán chèng sìn-tô͘, chèng thoân-kàu-chiá tī che siat-kàu kì-liām ê sî, soaⁿ-tē thoân-tō ê kang tī ba̍t-chêng ê sî, P.K.U. toā chhui-chin ê sî, thiaⁿ I kā lán kóng ê kóng, "Lín pe̍h-pe̍h tit-tio̍h, tio̍h pe̍h-pe̍h hō͘ lâng."
